ഇന്ത്യയിലെ ഏറ്റവും നീളമേറിയ ലക്ഷ്വറി കാർ! വിമാന സമാനമായ യാത്രാസുഖം നൽകുന്ന മെര്‍സിഡീസ് V-ക്ലാസ് എത്തി

ജര്‍മന്‍ ആഡംബര വാഹന നിര്‍മ്മാതാക്കളായ മെര്‍സിഡീസ് ബെന്‍സ് തങ്ങളുടെ ഏറ്റവും പുതിയ V-ക്ലാസ് (V-Class) ലക്ഷ്വറി എംപിവി ഇന്ത്യന്‍ വിപണിയില്‍ അവതരിപ്പിച്ചു. 1.40 കോടി രൂപയാണ് ഈ വാഹനത്തിന്റെ പ്രാരംഭ എക്‌സ്-ഷോറൂം വില. പൂനെയിലെ ചക്കന്‍ പ്ലാന്റില്‍ പ്രാദേശികമായി അസംബിള്‍ ചെയ്യുന്നതിനാല്‍ കുറഞ്ഞ ഉത്പാദന ചെലവില്‍ മികച്ച ആഡംബര അനുഭവം നല്‍കാന്‍ കമ്പനിക്ക് സാധിക്കുന്നു. ഇന്ത്യന്‍ റോഡുകള്‍ക്കും കാലാവസ്ഥയ്ക്കും അനുയോജ്യമായ രീതിയില്‍ പ്രത്യേകം വികസിപ്പിച്ചെടുത്ത ലോംഗ് വീല്‍ബേസ് (LWB) മോഡലാണിത്. മെര്‍സിഡീസിന്റെ പുത്തന്‍ ആഡംബര എംപിവിയെ കുറിച്ച് ചുവടെ വിശദമായി വായിക്കാം.

വാഹനത്തിന്റെ അകത്തും പുറത്തും വിപുലമായ മാറ്റങ്ങളാണ് കമ്പനി വരുത്തിയിരിക്കുന്നത്. ഒബ്‌സിഡിയന്‍ ബ്ലാക്ക്, ഹൈ-ടെക് സില്‍വര്‍, ആല്‍പൈന്‍ ഗ്രേ, സോഡാലൈറ്റ് ബ്ലൂ, ക്രിസ്റ്റല്‍ വൈറ്റ് എന്നീ അഞ്ച് ആകര്‍ഷകമായ നിറങ്ങളില്‍ ഈ ലക്ഷ്വറി എംപിവി ലഭ്യമാകും. നാല് സീറ്റുകളുള്ള ലക്ഷ്വറി ലേഔട്ടിലും ആറ് സീറ്റുകളുള്ള കോണ്‍ഫിഗറേഷനിലും V-ക്ലാസ് സ്വന്തമാക്കാം.

3,430 mm എക്‌സ്ട്രാ ലോംഗ് വീല്‍ബേസ് ഈ വാഹനത്തെ അതിന്റെ സെഗ്മെന്റിലെ ഏറ്റവും നീളമേറിയ മോഡലാക്കി മാറ്റുന്നു. സിഗ്‌നേച്ചര്‍ ത്രീ-പോയിന്റഡ് സ്റ്റാര്‍ ഗ്രില്ലും ഡിആര്‍എല്ലുകളോട് കൂടിയ മള്‍ട്ടി-ബീം എല്‍ഇഡി ഡിആര്‍എല്ലുകളും സ്‌പോര്‍ട്ടി ഹെഡ്‌ലാമ്പുകളും വാഹനത്തിന് അതിഗാംഭീര്യമുള്ള ലുക്കാണ് മെര്‍സിഡീസ് V-ക്ലാസിന്‌ നല്‍കുന്നത്.

വശങ്ങളില്‍, വാനിലെ പോലെ ഇലക്ട്രിക്കലി പ്രവര്‍ത്തിപ്പിക്കുന്ന സ്ലൈഡിംഗ് ഡോറുകള്‍, 18 ഇഞ്ച് അലോയ് വീലുകള്‍, എര്‍ഗണോമിക്‌സും സൗകര്യവും വര്‍ദ്ധിപ്പിക്കുന്ന ഒരു ഓപ്പണിംഗ് റിയര്‍ ഗ്ലാസുള്ള ഇലക്ട്രിക്കലി പ്രവര്‍ത്തിപ്പിക്കുന്ന അപറൈറ്റ് ടെയില്‍ഗേറ്റ് എന്നിവ ഇതിന്റെ സവിശേഷതകളാണ്. മുന്‍ തലമുറ മോഡലിന് സമാനമായി വെര്‍ട്ടിക്കല്‍ എല്‍ഇഡി ലൈറ്റിംഗ് ടെയില്‍ ലാമ്പുകളില്‍ ഉണ്ട്.

V-ക്ലാസിലൂടെ ഇന്ത്യന്‍ വിപണിയില്‍ ആദ്യമായി എല്ലാ സീറ്റുകളിലും ഹീറ്റിംഗ്, വെന്റിലേഷന്‍, മസാജ് ഫംഗ്ഷനുകള്‍ വാഗ്ദാനം ചെയ്യുകയാണ് മെര്‍സിഡീസ് ബെന്‍സ്. പ്രത്യേക ക്യാപ്റ്റന്‍ സീറ്റുകളും കാലുകള്‍ നീട്ടിവെക്കാനുള്ള എക്‌സ്റ്റെന്‍ഡബിള്‍ ലെഗ് സപ്പോര്‍ട്ടും യാത്രക്കാര്‍ക്ക് വിമാനത്തിലെ ഫസ്റ്റ് ക്ലാസ് യാത്രയ്ക്ക് തുല്യമായ അനുഭവം നല്‍കുന്നു. മികച്ച ലെഗ്റൂമും അത്യാധുനിക സൗകര്യങ്ങളും V-ക്ലാസിനെ ബിസിനസ് യാത്രകള്‍ക്ക് അനുയോജ്യമാക്കുന്നു.

പെട്രോള്‍, ഡീസല്‍ എഞ്ചിന്‍ ഓപ്ഷനുകളില്‍ വാഹനം ലഭ്യമാണ്. 2.0 ലിറ്റര്‍ ടര്‍ബോചാര്‍ജ്ഡ് എഞ്ചിനുള്ള V300d മോഡല്‍ 237 bhp പവര്‍ ഉത്പാദിപ്പിക്കുന്നു. പെട്രോള്‍ പതിപ്പായ V300 മോഡലിന് 231 bhp കരുത്താണുള്ളത്. രണ്ട് എഞ്ചിനുകളും 9-സ്പീഡ് ടോര്‍ക്ക് കണ്‍വെര്‍ട്ടര്‍ ഓട്ടോമാറ്റിക് ട്രാന്‍സ്മിഷനുമായി ബന്ധിപ്പിച്ചിരിക്കുന്നു.

സുഗമമായ യാത്രയ്ക്കായി എയര്‍മാറ്റിക് (AIRMATIC) സസ്‌പെന്‍ഷന്‍ സംവിധാനവും ഇതില്‍ ജര്‍മന്‍ ബ്രാന്‍ഡ് നല്‍കിയിട്ടുണ്ട്. ഇന്ത്യന്‍ റോഡ് സാഹചര്യങ്ങള്‍ക്കനുസൃതമായി പ്രത്യേകം ട്യൂണ്‍ ചെയ്ത അഡാപ്റ്റീവ് ഡാമ്പിംഗ് സഹിതമാണ് AIRMATIC എയര്‍ സസ്പെന്‍ഷന്‍ വരുന്നത്. വിനോദത്തിനായി 15 സ്പീക്കറുകളുള്ള 650W ബര്‍മെസ്റ്റര്‍ (Burmester) ഓഡിയോ സിസ്റ്റമാണ് നല്‍കിയിരിക്കുന്നത്.

ഡോള്‍ബി അറ്റ്മോസ് പിന്തുണയുള്ള ഈ സിസ്റ്റം മികച്ച ശ്രവ്യാനുഭവം നല്‍കുന്നു. ഇന്‍ഫോടെയ്ന്‍മെന്റിനും ഡിജിറ്റല്‍ ഇന്‍സ്ട്രുമെന്റ് ക്ലസ്റ്ററിനുമായി രണ്ട് കണക്റ്റഡ് ടച്ച്സ്‌ക്രീനുകളും ലക്ഷ്വറി എംപിവിയിലുണ്ട്. ആന്‍ഡ്രോയിഡ് ഓട്ടോ, ആപ്പിള്‍ കാര്‍പ്ലേ തുടങ്ങിയ മോഡേണ്‍ കണക്റ്റിവിറ്റി ഫീച്ചറുകളും ഇതില്‍ ലഭ്യമാണ്. ക്ലൈമറ്റ് കണ്‍ട്രോളുകള്‍ക്കായി സമര്‍പ്പിത ഫിസിക്കല്‍ ബട്ടണുകളും ക്യാബിന്‍ അന്തരീക്ഷം മെച്ചപ്പെടുത്തുന്നതിനുള്ള ആംബിയന്റ് ലൈറ്റിംഗും ഇതില്‍ ഉള്‍പ്പെടുന്നു.

സുരക്ഷയുടെ കാര്യത്തിലും വി-ക്ലാസ് വിട്ടുവീഴ്ച ചെയ്യുന്നില്ല. ഏഴ് എയര്‍ബാഗുകള്‍, ഇലക്‌ട്രോണിക് പാര്‍ക്കിംഗ് ബ്രേക്ക്, 360 ഡിഗ്രി ക്യാമറ, അഡാപ്റ്റീവ് ക്രൂയിസ് കണ്‍ട്രോള്‍, ഹില്‍ അസിസ്റ്റ്, ഡ്രൈവര്‍ മോണിറ്ററിംഗ് സിസ്റ്റം, ഓട്ടോ ഡിമ്മിംഗ് ഐആര്‍വിഎം, ടയര്‍ പ്രഷര്‍ മോണിറ്ററിംഗ് സിസ്റ്റംസ് തുടങ്ങിയ സജ്ജീകരണങ്ങള്‍ ഇതിലുണ്ട്. യൂറോ NCAP ക്രാഷ് ടെസ്റ്റില്‍ 5 സ്റ്റാര്‍ റേറ്റിംഗ് ഈ വാഹനം സ്വന്തമാക്കിയിട്ടുണ്ട്. ഡ്രൈവര്‍ മോണിറ്ററിംഗ് സിസ്റ്റം ദീര്‍ഘദൂര യാത്രകളില്‍ ഡ്രൈവര്‍ക്ക് കൂടുതല്‍ സുരക്ഷ നല്‍കുന്നു.

ഈ മാസം അവസാനത്തോടെ ഇന്ത്യയില്‍ V-ക്ലാസിന്റെ ഡെലിവറി ആരംഭിക്കുമെന്ന് മെര്‍സിഡീസ് ബെന്‍സ് അറിയിച്ചു. വിപണിയില്‍ ലെക്‌സസ് LM 350h, ടൊയോട്ട വെല്‍ഫെയര്‍ എന്നിവയുമായാണ് മെര്‍സിഡീസ് ബെന്‍സ് V-ക്ലാസ് പ്രധാനമായും മത്സരിക്കുന്നത്. ആഡംബരവും കരുത്തും സുരക്ഷയും ഒത്തുചേരുന്ന ഒരു സമ്പൂര്‍ണ പാക്കേജായാണ് മെര്‍സിഡീസ് ഈ പുത്തന്‍ എംപിവി അവതരിപ്പിക്കുന്നത്.