‍ഡീസല്‍ ടാക്സ്: മാരുതിക്ക് നേട്ടം?

ഡീസല്‍ കാര്‍ ടാക്സ് വര്‍ധിപ്പിക്കാനുള്ള തീരുമാനം വരുന്ന ബജറ്റിലുണ്ടാകുമെന്നാണ് കരുതപ്പെടുന്നത്. നിലവില്‍ത്തന്നെ പെട്രോള്‍ കാറുകള്‍ അപേക്ഷിച്ച് ഉയര്‍ന്ന വിലയാണ് ഡീസല്‍ കാറുകള്‍ക്കുള്ളത്. ഇത് ഇനിയും വര്‍ധക്കുകയാണ് പുതിയ നടപടി മൂലം സംഭവിക്കുക. അതേസമയം ഈ നയം രാജ്യത്തെ ഏറ്റവും വലിയ കാര്‍ കമ്പനിയായ മാരുതി സുസുക്കിയെ കാര്യമായി ബാധിക്കാനിടയില്ലെന്ന് ചില നിരീക്ഷകര്‍ ചൂണ്ടിക്കാട്ടുന്നു. എന്നു മാത്രമല്ല, മാരുതിക്ക് ഇത് ഗുണകരമായിത്തീരുകയും ചെയ്യും!

മാരുതിയുടെ മിനി സെഗ്മെന്‍റ് വാഹനങ്ങളാണ് ഇന്ന് വിപണിയെ ഭരിക്കുന്നത്. മാരുതി ആള്‍ട്ടോ, വാഗണ്‍ ആര്‍, എസ്റ്റിലോ, ഈക്കോ, എ-സ്റ്റാര്‍ എന്നീ വാഹനങ്ങളാണ് ഏറ്റവുമധികം വിറ്റഴിക്കപ്പെടുന്നത്. ഇവയ്ക്ക് നിലവില്‍ ഡീസല്‍ പതിപ്പുകളില്ല. മാരുതി 800 ചുരുങ്ങിയ തോതിലാണെങ്കിലും വിപണിയിലുണ്ട്. ഇതിനും പെട്രോള്‍ പതിപ്പാണുള്ളത്.

ഡീസല്‍ കാറുകള്‍ക്ക് വില ഇനിയും കയറുന്ന സന്ദര്‍ഭത്തില്‍ ഒരു പെട്രോള്‍ ട്രന്‍ഡ് ഇന്ത്യന്‍ വിപണിയില്‍ ഉണ്ടാവുകയാണെങ്കില്‍ അത് മാരുതിക്ക് ഗുണം ചെയ്യും. പെട്രോളിന് ഇടക്കാലത്ത് വിലകയറിയ സന്ദര്‍ഭത്തില്‍ നടന്ന ട്രെന്‍ഡ് മാറ്റം ഇന്നും തുടരുകയാണ്. ഇന്ത്യന്‍ വിപണിയുടെ ഈ സ്വഭാവം കണക്കിലെടുക്കുമ്പോള്‍ ഒരു ട്രെന്‍ഡ് മാറ്റം തീര്‍ച്ചയായും പ്രതീക്ഷിക്കാവുന്നതാണ്.