'ടെസ്റ്റ് ഡ്രൈവിന് പോകുവാണോ?'; പുതിയ കാറിനെ വിലയിരുത്താനുള്ള ചില മാര്‍ഗങ്ങള്‍

യഥാര്‍ത്ഥ റോഡ് സാഹചര്യത്തില്‍ കാര്‍ എത്രമാത്രം മികവാര്‍ന്നതാണെന്ന് ടെസ്റ്റ് ഡ്രൈവുകളിലൂടെ തിരിച്ചറിയാം. എന്നാല്‍ ടെസ്റ്റ് ഡ്രൈവ് ചെയ്യുമ്പോള്‍ എന്തൊക്കെ കാര്യങ്ങള്‍ വിലയിരുത്തണം? ശ്രദ്ധിക്കേണ്ട ചില പ്രധാന കാര്യങ്ങള്‍.

• ഒരിക്കലും ധൃതിപിടിച്ച് ടെസ്റ്റ് ട്രൈവ് ചെയ്യരുത്.
• ടെസ്റ്റ് ഡ്രൈവ് ആരംഭിക്കുന്നതിന് മുമ്പ്, കാറുമായി ബന്ധപ്പെട്ട സംശയങ്ങള്‍ക്ക് സെയില്‍സ് എക്‌സിക്യൂട്ടീവില്‍ നിന്നും ഉത്തരം കണ്ടെത്തുക.



• ആദ്യം കാറിന്റെ ഇന്റീരിയര്‍ വിലയിരുത്തുക. നിങ്ങള്‍ പ്രതീക്ഷിക്കുന്ന ക്യാബിന്‍ സ്‌പെയ്‌സ് ഇന്റീരിയര്‍ നല്‍കുന്നുണ്ടോ എന്ന് പരിശോധിച്ച് ഉറപ്പ് വരുത്തുക. ഇന്റീരിയറിനൊപ്പം കാറിന്റെ എക്സ്റ്റീരിയര്‍ വലുപ്പവും ശ്രദ്ധിക്കേണ്ടതുണ്ട്.


• ട്രാഫിക്ക് കുറഞ്ഞ തുറന്ന ഹൈവേകളില്‍ മാത്രമായി ടെസ്റ്റ് ഡ്രൈവിനെ പരിമിതപ്പെടുത്തരുത്. ട്രാഫിക്കില്‍ കാറിന്റെ പ്രകടനം എത്രമാത്രം മികച്ചതാണെന്ന് വിലയിരുത്തേണ്ടതും അനിവാര്യം.



• നിങ്ങള്‍ സ്ഥിരമായി ഡ്രൈവ് ചെയ്യാറുള്ള റൂട്ട്, ടെസ്റ്റ് ഡ്രൈവിനായി തെരഞ്ഞെടുക്കുന്നതാണ് ഉത്തമം. ഇത്തരത്തില്‍ കാറിന്റെ പ്രകടനം നിങ്ങള്‍ക്ക് എളുപ്പത്തില്‍ വിലയിരുത്താം.



• ഡ്രൈവര്‍, പാസഞ്ചര്‍ സീറ്റുകളില്‍ ഇരുന്ന് വേണം കാറിനെ പരിശോധിക്കാന്‍. ഡ്രൈവര്‍ സീറ്റില്‍ ഇരിക്കുമ്പോള്‍ സീറ്റ് അഡജസ്റ്റ്‌മെന്റ്, സ്റ്റീയറിംഗ്, എര്‍ഗണോമിക്‌സ് എന്നിവ പ്രത്യേകം വിലയിരുത്തുക.


• ദീര്‍ഘദൂര യാത്രകളില്‍ സീറ്റ് എത്രമാത്രം അനുയോജ്യമാണെന്നും ഒരുപരിധി വരെ ടെസ്റ്റ് ഡ്രൈവില്‍ മനസിലാക്കാം.



• കാഴ്ച പരിധി മറ്റൊരു നിര്‍ണായക ഘടകമാണ്. മിററുകള്‍ എല്ലാം, പ്രത്യേകിച്ച് വളവുകളില്‍ ഡ്രൈവ് ചെയ്ത് പരിശോധിക്കേണ്ടതാണ്. ഇത്തരത്തില്‍ കാര്‍ മിററുകള്‍ എത്രത്തോളം കാഴ്ചപരിധി നല്‍കുന്നു എന്നതില്‍ ധാരണ ലഭിക്കും.



• ട്രാന്‍സ്മിഷന്‍ വിലയിരുത്തുക. സുഗമമായ ഗിയര്‍ ഷിഫ്റ്റിംഗ് സാധ്യമാണോ എന്ന് പ്രത്യേകം പരിശോധിക്കുക. ഒരുപക്ഷെ, പതുക്കെ ഡ്രൈവ് ചെയ്യാന്‍ സെയില്‍സ് എക്‌സിക്യൂട്ടീവ നിങ്ങളോട് ആവശ്യപ്പെട്ടേക്കാം. എന്നിരുന്നാലും കാറിന്റെ വേഗതയും മനസിലാക്കേണ്ട ഘടകമാണ്.


• അമിത വേഗതയ്ക്ക് ഒപ്പം ബ്രേക്കുകളുടെ പ്രവര്‍ത്തനവും ശ്രദ്ധിക്കണം. അടിയന്തര ഘട്ടങ്ങളില്‍ ആവശ്യമായ ബ്രേക്കിംഗ് കാര്‍ നല്‍കുന്നുണ്ടോ എന്ന് ഉറപ്പായും പരിശോധിച്ച് ഉറപ്പ് വരുത്തണം.



• മുന്‍സീറ്റുകളിലും പിന്‍സീറ്റുകളിലും ഇരുന്ന് ഹെഡ്‌റൂം, ലെഗ് സ്‌പെയ്‌സ് എന്നിവ പരിശോധിക്കുക.



• ടെസ്റ്റ് ഡ്രൈവിനിടെ കാറില്‍ നിന്നും ഉയരുന്ന അനാവശ്യ ശബ്ദങ്ങളും ശ്രദ്ധിക്കുക. കൂടാതെ എഞ്ചിന്‍ ശബ്ദം ക്യാബിനിലേക്ക് കടക്കുന്നുണ്ടോ എന്നും വിലയിരുത്തുക. മികച്ച ക്യാബിനുകള്‍ എഞ്ചിന്‍ ശബ്ദം ഉള്ളിലേക്ക് കടത്താറില്ല.


• കാറിന്റെ ഇന്‍ഫോടെയ്ന്‍മെന്റ് സിസ്റ്റം പരിശോധിക്കാനും മറക്കരുത്.



• ഒറ്റയ്ക്ക് ടെസ്റ്റ് ഡ്രൈവിന് പോകാതിരിക്കുന്നതാണ് ഉചിതം. അനുഭവസമ്പത്തുള്ള ഡ്രൈവറെ കൂടെ കൂട്ടുന്നത്, കാറിനെ കുറിച്ചുള്ള വ്യക്തമായ ധാരണ നല്‍കും.