'ഇതെന്തിനാണ് റോഡില്‍ വെള്ള, മഞ്ഞ വരകള്‍ നല്‍കുന്നത്'? കാരണം ഇതാണ്

ഡ്രൈവിംഗില്‍, റോഡിലെ വരകള്‍ നാം സ്ഥിരം കാണാറുള്ളതാണ്. ചിലപ്പോള്‍ വെള്ള-മഞ്ഞ നിറങ്ങളിൽ നീണ്ടു നിവര്‍ന്നും, മുറിഞ്ഞും മുറിഞ്ഞും കിടക്കുന്ന വരകള്‍ ഡ്രൈവിംഗ് സൈഡ് മനസിലാക്കാന്‍ വേണ്ടി മാത്രമാണോ?

റോഡ് ചിഹ്നങ്ങളുടെ ഭാഗമാണ് ഈ വരകളെന്ന് നിങ്ങള്‍ക്കറിയുമോ? റോഡ് ലൈനുകള്‍ എന്താണ് അര്‍ത്ഥമാക്കുന്നത്? പരിശോധിക്കാം-

• നീണ്ടു നിവര്‍ന്ന വെള്ള റോഡ് വരകള്‍

റോഡ് വരി മാറരുതെന്ന വ്യക്തമായ നിര്‍ദ്ദേശമാണ് നീണ്ടു നിവര്‍ന്നുള്ള വെള്ള റോഡ് ലൈനുകള്‍ സൂചിപ്പിക്കുന്നത്. ഒരു കാരണവശാലും വരിയില്‍ നിന്നും മാറി ഡ്രൈവ് ചെയ്യരുതെന്ന സൂചന ഇന്ന് മിക്കപ്പോഴും പാലിക്കപ്പെടാറില്ല.


• മുറിഞ്ഞ വെള്ള റോഡ് വരകള്‍

ഇത്തരം റോഡില്‍ നിങ്ങള്‍ക്ക് വരി മാറി ഡ്രൈവ് ചെയ്യാം. എന്നാല്‍ മുന്‍കരുതൽ ഉണ്ടായിരിക്കണമെന്ന് മാത്രം. സുരക്ഷിതമായി വരി മാറി ഡ്രൈവ് ചെയ്യാമെന്ന സൂചനയാണ് മുറിഞ്ഞ വെള്ള റോഡ് വരകള്‍ അര്‍ത്ഥമാക്കുന്നത്.



• നീണ്ടു നിവര്‍ന്ന മഞ്ഞ റോഡ് വരകള്‍

ഈ റോഡുകളില്‍ നിങ്ങള്‍ക്ക് മുന്നിലുള്ള വാഹനങ്ങളെ മറികടക്കുന്നതിന് അനുവാദമുണ്ട്. അതേസമയം, റോഡില്‍ നല്‍കിയിട്ടുള്ള മഞ്ഞ വര മറികടക്കാന്‍ നിങ്ങള്‍ക്ക് അനുവദവുമില്ല.



• നീണ്ടു നിവര്‍ന്ന രണ്ട് സമാന്തര മഞ്ഞ വരകള്‍

ഇവിടെ ഒരു കാരണവശാലും മുന്നിലുള്ള വാഹനങ്ങളെ മറികടക്കുന്നതിന് നിങ്ങള്‍ക്ക് അനുവാദമില്ല.


• മുറിഞ്ഞ മഞ്ഞ റോഡ് വരകള്‍

ഓവര്‍ടേക്കിംഗ് അല്ലെങ്കില്‍ മുന്നിലുള്ള വാഹനങ്ങളെ നിങ്ങള്‍ക്ക് മറികടക്കാം. പക്ഷെ, മുന്‍കരുതലുണ്ടാകണമെന്ന് മുറിഞ്ഞ മഞ്ഞ വരകള്‍ സൂചിപ്പിക്കുന്നു.



• നീണ്ടു നിവര്‍ന്ന മഞ്ഞ വരകള്‍ക്ക് സമാന്തരമായ മുറിഞ്ഞ മഞ്ഞ വരകള്‍

ഇവിടെ രണ്ട് തരത്തിലുള്ള അനുവദങ്ങളാണ് റോഡ് നല്‍കുന്നത്. മുറിഞ്ഞ മഞ്ഞ വരയുള്ള വശത്തുള്ളവര്‍ക്ക് ഓവര്‍ടേക്ക് ചെയ്യാം. എന്നാല്‍ നീണ്ടു നിവര്‍ന്ന മഞ്ഞ വരകളുള്ള വശത്തുള്ളവര്‍ ഓവര്‍ടേക്ക് ചെയ്യാന്‍ പാടില്ല.