ഇന്ത്യയിലെ ആദ്യത്തെ അണ്ടര്‍ വാട്ടര്‍ റെയില്‍ തുരങ്കം കൊല്‍ക്കത്തയില്‍

2017 ജൂലായ് മാസമാണ് അണ്ടര്‍ വാട്ടര്‍ റെയില്‍ ടണലിന്റെ പൂര്‍ത്തീകരണം പദ്ധതിയിട്ടിരുന്നത്. എന്നാല്‍ മെയ് മാസം തന്നെ റെയില്‍ ടണല്‍ നിര്‍മ്മാണം പൂര്‍ത്തീകരിച്ചത് കൊല്‍ക്കത്ത മെട്രോ റെയില്‍ കോര്‍പറേഷന് പൊന്‍കിരീടം ചാര്‍ത്തി കൊടുത്തിരിക്കുകയാണ്.

വടക്ക് കിഴക്കന്‍ മെട്രോയ്ക്ക് വേണ്ടി കൊല്‍ക്കത്ത മെട്രോ റെയില്‍ കോര്‍പറേഷന്‍ ലിമിറ്റഡും, അഫ്‌കോണ്‍സ് ട്രാന്‍സ്ടണല്‍സ്‌ട്രോയിയും സംയുക്തമായാണ് ഹൂഗ്ലി നദിക്ക് അടിയിലൂടെ തുരങ്ക നിര്‍മ്മിച്ചിരിക്കുന്നത്.

രച്‌ന എന്ന ഭീമാകരമായ തുരങ്ക നിര്‍മ്മാണ യന്ത്രം (ടണല്‍-ബോറിംഗ് മെഷീന്‍) ഉപയോഗിച്ചാണ് അണ്ടര്‍ വാട്ടര്‍ ടണല്‍ നിര്‍മ്മിച്ചിരിക്കുന്നത്. ജര്‍മനിയിലെ ഷ്വാനൊയില്‍ നിന്നുമാണ് യന്ത്രം കൊണ്ട് വന്നത്.

ഹൂഗ്ലി നദിയ്ക്ക് അടിയിലൂടെ 502 മീറ്ററാണ് റെയില്‍ തുരങ്കം കടന്ന് പോകുന്നത്.

16.6 കിലോമീറ്റര്‍ നീളമുള്ള മെട്രോ റയില്‍ പദ്ധതിയുടെ ഭാഗമായാണ് തുരങ്കം നിര്‍മ്മിച്ചത്. ഹൂഗ്ലി നദിക്ക് അടിയിലൂടെയുള്ള 502 മീറ്റര്‍ ഉള്‍പ്പെടെ 10.8 കിലോമീറ്റര്‍ ദൂരം ഭൂഗര്‍ഭ റെയില്‍ തുരങ്കമാണ്.

എട്ട് ഭൂഗര്‍ഭ സ്‌റ്റേഷനുകള്‍ ഉള്‍പ്പെടെ 12 മെട്രോ സ്‌റ്റേഷനുകളാണ് 16.6 കിലോമീറ്റര്‍ നീളമുള്ള നിര്‍ദ്ദിഷ്ട പദ്ധതിയിലുള്ളത്.

2019 ഡിസംബറോടെയാണ് മെട്രോ കമ്മിഷണ്‍ ചെയ്ത് പ്രവര്‍ത്തനം ആരംഭിക്കുമെന്നാണ് പ്രതീക്ഷിക്കുന്നത്. 5000 കോടി രൂപയാണ് മെട്രോ റെയില്‍ പദ്ധതിയുടെ ചെലവ്.