ടാറ്റയുടെ ട്രക്കില്‍ മെര്‍സിഡീസിന് എന്താ കാര്യം?; ടാറ്റയെ കുറിച്ച് നിങ്ങൾക്ക് അറിയാത്ത ചില കാര്യങ്ങൾ

അതിവേഗ ട്രാക്കിലേക്കുള്ള ടാറ്റയുടെ സംഭാവന – ടമോ റെയ്‌സ്‌മോ, ഇന്ത്യയിലെ ആദ്യ സിഎന്‍ജി ബസ്, ഹൈഡ്രജന്‍ ഫ്യൂവല്‍ സെല്‍ ബസ്, ഇലക്ട്രിക്-ഹൈബ്രിഡ് ബസുകള്‍; ടാറ്റയുടെ നേട്ടങ്ങൾ തീരുന്നില്ല. ട്രക്കു നിർമ്മാണത്തിലൂടെയാണ് ഇന്ത്യൻ നിർമ്മാതാക്കളായ ടാറ്റ വിപണിയിലേക്ക് കടന്നുവന്നത്. ശേഷം വിപണി കണ്ടതു ടാറ്റയുടെ കുതിപ്പും. ടാറ്റയെ കുറിച്ച് കേട്ടറിവില്ലാത്ത ചില കാര്യങ്ങൾ —

• 70 വര്‍ഷം പഴക്കമുണ്ട് ടാറ്റ മോട്ടോര്‍സിന്. 1945 ല്‍ ടാറ്റ എഞ്ചിനീയറിംഗ് ആന്‍ഡ് ലോക്കോമോട്ടീവ് കമ്പനിയില്‍ നിന്നുമാണ് ടാറ്റയുടെ തുടക്കം. പേര് സൂചിപ്പിക്കുന്നത് പോലെ ലോക്കോമോട്ടീവുകളെ ടാറ്റ നിര്‍മ്മിച്ചിട്ടുമുണ്ട്.
Recommended Video



2017 Maruti Suzuki Baleno Alpha Automatic Launched In India | In Malayalam - DriveSpark മലയാളം



• ടാറ്റയുടെ ആദ്യകാല ട്രക്കുകളില്‍ മെര്‍സിഡീസ് ലോഗോയാണ് ഒരുങ്ങിയിരുന്നത്. ഡയമ്ലര്‍ ബെന്‍സുമായുള്ള സാങ്കേതിക പങ്കാളിത്തത്തിന്റെ അടിസ്ഥാനത്തിലായിരുന്നു ഇത്.


• 1955 ല്‍ ടാറ്റയുടെ മൂന്ന് ട്രക്കുകള്‍ ജനീവ-ബോംബെ റാലിയില്‍ പങ്കെടുത്തിരുന്നു. ബ്രേക്ക്ഡൗണുകള്‍ നേരിടാതെ 12874 കിലോമീറ്ററുകളാണ് ഈ ട്രക്കുകള്‍ മുന്നേറിയതും. ട്രക്ക് ഓടിച്ച ഡ്രൈവര്‍മാരെ അഭിനന്ദിക്കുന്ന ജിആര്‍ഡി ടാറ്റയുടെ ചിത്രമാണ് മുകളില്‍.



• വിദേശ വിപണികളില്‍ ടാറ്റ ട്രക്കുകള്‍ എത്താന്‍ തുടങ്ങിയിട്ട് 50 വര്‍ഷത്തിന് മുകളിലായി. നിലവില്‍ 45 രാജ്യങ്ങളിലാണ് ടാറ്റ ട്രക്ക് കയറ്റുമതി ചെയ്യുന്നത്. 1961 ല്‍ ശ്രീലങ്കയിലേക്കാണ് (സീലോണ്‍) ടാറ്റ ആദ്യമായി ട്രക്ക് കയറ്റുമതി ചെയ്തത്.



• 1969 ലാണ് ട്രക്കുകളില്‍ ടാറ്റയുടെ മുഖമുദ്രയായ 'T' പ്രത്യക്ഷപ്പെടുന്നത്.
• 1986 ലാണ് പ്രശസ്തമായ ടാറ്റ 407 പുറത്തിറങ്ങിയത്. ഐഷര്‍-മിത്സുബിഷി, ഡിസിഎം ടൊയോട്ട, സ്വരാജ് മസ്ദ മോഡലുകള്‍ക്ക് കനത്ത ആഘാതമാണ് ടാറ്റ 407 നല്‍കിയത്. ലൈറ്റ് കൊമേഴ്‌സ്യല്‍ വാഹനങ്ങളിലെ ആദ്യ ഇന്ത്യന്‍ മുഖമാണ് ടാറ്റ 407.


• ഇന്ത്യയുടെ ആദ്യ മള്‍ട്ടി-യൂട്ടിലിറ്റി വാഹനം ടാറ്റ സുമോയ്ക്ക് പിന്നിലുമുണ്ട് ചെറിയ രഹസ്യം. സുമന്ത് മൂല്‍ഗൊഖര്‍ എന്ന മുന്‍ എംഡി യെ അനുസ്മരിച്ചാണ് മോഡലിന് സുമോ എന്ന പേര് ടാറ്റ നല്‍കിയത്.



• ഇന്ത്യന്‍ സൈന്യത്തിന് ആവശ്യമായ പ്രതിരോധ വാഹനങ്ങള്‍ ടാറ്റയാണ് നിര്‍മ്മിച്ച് നല്‍കുന്നത്. പതിറ്റാണ്ടുകള്‍ നീളുന്നതാണ് ടാറ്റയും ഇന്ത്യന്‍ സൈന്യവും തമ്മിലുള്ള ബന്ധം.



• ആധുനിക സാങ്കേതികതയില്‍ ഒരുങ്ങിയ ആദ്യ മെയ്ഡ്-ഇന്‍-ഇന്ത്യ കാര്‍ ഏതാണ്? ടാറ്റ ഇന്‍ഡിക്ക!