പറക്കുംകാറിനെ നിര്‍മ്മിക്കാന്‍ ടൊയോട്ട — പേറ്റന്റ് വിവരങ്ങള്‍ ചോര്‍ന്നു, ചിത്രങ്ങള്‍ പുറത്ത്

വാണിജ്യാടിസ്ഥാനത്തില്‍ കാറുകളെ ആകാശത്തു പറപ്പിക്കാന്‍ വാഹന നിര്‍മ്മാതാക്കളില്‍ ആര്‍ക്കും ഇതുവരെ സാധിച്ചിട്ടില്ല. കാറുകളെ പറപ്പിക്കാന്‍ ശ്രമിച്ചിട്ടുണ്ട് നിരവധി പേര്‍. അടുത്തിടെ പറക്കുംടാക്‌സികളെ അവതരിപ്പിക്കാന്‍ യൂബര്‍ ശ്രമിച്ചെങ്കിലും വിജയം കണ്ടില്ല.

ഇപ്പോള്‍ ഈ മേഖലയിലേക്കു കൈകടത്തുകയാണ് ജാപ്പനീസ് നിര്‍മ്മാതാക്കളായ ടൊയോട്ട. കമ്പനി പേറ്റന്റിന് സമർപ്പിച്ച പുതിയ പറക്കുംകാറിന്റെ ഡിസൈന്‍ പുറത്തായി. ടൊയോട്ട എഞ്ചിനീയറിംഗ് ആന്‍ഡ് മാനുഫാക്ച്ചറിംഗ് നോര്‍ത്ത് അമേരിക്ക (TEMA) സംഘമാണ് ടൊയോട്ടയുടെ പറക്കുംകാറിന് പിന്നില്‍.

നിരത്തിലും ആകാശത്തിലും പ്രവര്‍ത്തിക്കാന്‍ കഴിയുന്ന 'ഡ്യുവല്‍ മോഡ്' വാഹനമെന്നാണ് പറക്കുംകാറിനെ കമ്പനി വിശേഷിപ്പിക്കുന്നത്. പുറത്തുവന്ന മോഡലിന്റെ രൂപരേഖ നാലു വീലുകളും/റോട്ടറുകളും ഒരുങ്ങുന്ന വലിയ ഡ്രോണിനെ ഓര്‍മ്മപ്പെടുത്തും.

വെവ്വേറെ വൈദ്യുത മോട്ടോറുകളായിരിക്കും ഓരോ വീലിലും/റോട്ടറിലും ഒരുങ്ങുക. ബാറ്ററി പാക്ക് അല്ലെങ്കില്‍ ഗ്യാസ് ടര്‍ബൈന്‍ ജനറേറ്റര്‍ വൈദ്യുത മോട്ടോറുകള്‍ക്കുള്ള ഊര്‍ജ്ജ സ്രോതസ്സായി കമ്പനി തിരഞ്ഞെടുക്കുമെന്നാണ് സൂചന.

ഹൈഡ്രജന്‍ ഫ്യൂവല്‍ സെല്ലിനുള്ള സാധ്യതയും മോഡലില്‍ തള്ളിക്കളയാനാകില്ല. നിരത്തില്‍ നാലു വീലുകളിലെയും വേഗം ആവശ്യാനുസരണം നിയന്ത്രിച്ചു വാഹനം ഉപയോഗിക്കാന്‍ കഴിയും; ടാങ്കുകളിലേതുപോലെ.

Most Read: ലോഡ്ജി സുരക്ഷിതമാണ് — ക്രാഷ് ടെസ്റ്റില്‍ പരാജയപ്പെടാന്‍ കാരണം വിശദീകരിച്ച് റെനോ

റോട്ടറുകളുടെ സഹായത്താല്‍ നിരത്തില്‍ നിന്നുയര്‍ന്ന് വായുവില്‍ പറക്കാന്‍ മോഡലിന് സാധിക്കുമെന്ന് കമ്പനി പറയുന്നു. ബട്ടണ്‍ അമര്‍ത്തുന്നപക്ഷം വീലുകള്‍ റോട്ടറുകളായി രൂപാന്തരപ്പെട്ട് മോഡലിന് ആവശ്യമായ തള്ളല്‍ബലം സമര്‍പ്പിക്കും.

വായുവില്‍ നില്‍ക്കുമ്പോള്‍ അമേരിക്കന്‍ സൈന്യം ഉപയോഗിക്കുന്ന ബെല്‍ ബോയിംഗ് V-22 ഓസ്‌പ്രെയ് റോട്ടര്‍ വിമാനത്തെ ടൊയോട്ടയുടെ മോഡല്‍ അനുസ്മരിപ്പിക്കുമെന്നാണ് വിവരം. നേര്‍കുത്തനെ പറന്നുയരാനും പറന്നിറങ്ങാനും കഴിവുള്ള പ്രത്യേക റോട്ടര്‍ വാഹനമാണ് ഓസ്‌പ്രെയ്.

നിലവില്‍ മോഡലിനെ കുറിച്ചുള്ള കൂടുതല്‍ വിവരങ്ങള്‍ ടൊയോട്ട പുറത്തുവിട്ടിട്ടില്ല. ബോയിംഗ്, സുബ്ബാരു തുടങ്ങിയ നിര്‍മ്മാതാക്കളും പറക്കുംകാറിനെ നിര്‍മ്മിക്കുന്നതില്‍ മുഴുകിയിരിപ്പുണ്ട്.