ഡാകാറില്‍ സിഎസ് സന്തോഷ് മുന്നേറുന്നു

ചിത്രങ്ങളിലൂടെ നീങ്ങുക.

റൈഡര്‍മാരെ സംബന്ധിച്ച് കടുത്ത അനിശ്ചിതത്വമാണ് ഡകാര്‍ റാലിയെ ത്രില്ലന്‍ അനുഭവമാക്കുന്നത്. ഒമ്പതിനായിരം കിലോമീറ്റര്‍ ദൂരമാണ് മറികടക്കുന്നത്. ഓരോ ഘട്ടങ്ങളിലും മറികടക്കേണ്ട ദൂരം നേരത്തെ നിശ്ചയിച്ചിരിക്കും. ഓരോ ദിവസവും ഓരോ റൈഡറും ഫിനിഷ് ചെയ്യുന്ന സമയം അവസാനം ഒരുമിച്ച് കണക്കാക്കിയാണ് വിജയിയെ തെരഞ്ഞെടുക്കുക.

ആദ്യത്തെ ഇരുപത് സ്ഥാനങ്ങളില്‍ എത്തിച്ചേരാനാണ് തന്റെ ശ്രമമെന്ന് സിഎസ് സന്തോഷ് പറയുന്നു. ഓരോ സ്‌റ്റേജ് പിന്നിടുമ്പോഴും തന്‍രെ സ്ഥാനം മെച്ചപ്പെടുത്താന്‍ സന്തോഷിന് സാധിക്കുന്നുണ്ട്. മൂന്നാമത്തെ സ്‌റ്റേജിലെത്തുമ്പോള്‍ 53ാം സ്ഥാനത്താണ് സന്തോഷ് നില്‍ക്കുന്നത്.

കെടിഎം മോട്ടോര്‍സൈക്കിളുമായാണ് സിഎസ് സന്തോഷ് റാലിയില്‍ പങ്കെടുക്കുന്നത്. റെഡ് ബുള്‍ സ്‌പോണ്‍സര്‍ഷിപ്പിലാണ് സന്തോഷ് ദക്ഷിണ അമേരിക്കയിലേക്ക് കയറിയിരിക്കുന്നത്. 31 വയസ്സാണ് ഇദ്ദേഹത്തിന്.

ആദ്യസ്ഥാനത്ത് ഇപ്പോഴുള്ളത് ബറേഡ ബോര്‍ട്ട് എന്ന റൈഡറാണ്. ഇദ്ദേഹത്തിനു പിന്നാലെ ഗോണ്‍ക്ലേവ്‌സ് വരുന്നു. ഇരുവരുടെയും പക്കല്‍ ഹോണ്ട ബൈക്കുകളാണുള്ളത്. മൂന്നാാ റാങ്കില്‍ ഇപ്പോള്‍ നില്‍ക്കുന്ന വാക്‌നര്‍ കെടിഎം മോട്ടോര്‍സൈക്കിളിലാണ് ഡകാറിലിറങ്ങിയിരിക്കുന്നത്.

മൂന്ന് സ്‌റ്റേജ് പിന്നിടാന്‍ സന്തോഷ് 12 മണിക്കൂര്‍ 21 മിനിട്ട് 10 സെക്കന്‍ഡ് എടുത്തിട്ടുണ്ട്. ഒന്നാം റാങ്കില്‍ നില്‍ക്കുന്ന റൈഡറെക്കാള്‍ രണ്ടര മണിക്കൂറോളം അധികം സമയം ഇദ്ദേഹമെടുത്തിട്ടുണ്ട്.

മോട്ടോക്രോസ്സ്, സൂപ്പര്‍ക്രോസ് മത്സരങ്ങളിലാണ് തന്റെ കരിയറില്‍ സിഎസ് സന്തോഷ് പ്രത്യേകശ്രദ്ധ നല്‍കിയിട്ടുള്ളത്. ഇന്ത്യയില്‍ ഇപ്പോഴും മോട്ടോക്രോസ് പോലുള്ള സ്‌പോര്‍ട്‌സ് ഇനങ്ങള്‍ കാര്യമായ വളര്‍ച്ച പ്രാപിച്ചിട്ടില്ല. നമ്മുടെ റോഡുകളില്‍ വകതിരിവില്ലാത്ത വീലിപ്പയ്യന്മാര്‍ ചെയ്തുകൂട്ടുന്ന വിക്രിയകള്‍ ഇത്തരം സ്‌പോര്‍ട്‌സ് ഇനങ്ങളോട് നെഗറ്റീവായ പൊതുബോധം വളര്‍ത്തിയിട്ടുണ്ട്. സന്തോഷ് സ്വപ്‌നം കാണുന്നത് മോട്ടോര്‍സ്‌പോര്‍ട്‌സിന് സ്വന്തം രാജ്യത്ത് ഒരു മികച്ച സ്ഥാനം കിട്ടുന്നതാണ്. 'ഇന്ത്യ എന്നാല്‍ ക്രിക്കറ്റ് മാത്രമല്ലെന്ന് ലോകമറിയണം!'