ഇനി പ്രീമിയം മുഖം; ഹീറോ മോട്ടോകോര്‍പ് ചുവട് മാറ്റം ആരംഭിച്ചു

വിപണിയില്‍ പ്രീമിയം മുഖം നേടിയെടുക്കാനുള്ള ശ്രമത്തിലാണ് ഹീറോ ഇപ്പോള്‍. തത്ഫലമായാണ് ചില മോഡലുകളെ ഹീറോ പിന്‍വലിച്ചതും, പുത്തന്‍ വേരിയന്റുകളെ മോഡല്‍ പോര്‍ട്ട്‌ഫോളിയോയില്‍ ഹീറോ നല്‍കിയതും.

ഹങ്ക്, ഇഗ്നിറ്റര്‍, എച്ച്എഫ് ഡൊണ്‍ മോഡലുകളെ അടുത്തിടെയാണ് ഹീറോ പിന്‍വലിച്ചത്.

ഗ്ലാമര്‍, മയെസ്‌ട്രൊ എഡ്ജ്, ഡ്യൂവറ്റ് ആന്‍ഡ് പ്ലെഷര്‍ വേരിയന്റുകളെ അവതരിപ്പിച്ച ഹീറോയുടെ നടപടിയും ഇതേ പ്രീമിയം പരിവേഷം നേടിയെടുക്കുന്നതിന്റെ ഭാഗമായാണ്.

മോഡല്‍ പോര്‍ട്ട്‌ഫോളിയോ ക്രമീകരിച്ച് ബലപ്പെടുത്താനാണ് കമ്പനി ഇപ്പോള്‍ ശ്രമിക്കുന്നത്. ഇതിന്റെ ഭാഗമായി പ്രീമിയം സെഗ്മെന്റിലേക്കും ഹീറോ ശ്രദ്ധ ചെലുത്തുമെന്ന് കമ്പനി വക്താവ് പറഞ്ഞു.

100 സിസി, 150 സിസി ശ്രേണിയില്‍ 50 ശതമാനത്തിന് മേലെയാണ് ഹീറോ മോട്ടോകോര്‍പ്പിന്റെ വിപണിവിഹിതം. 2017-18 കാലയളവില്‍ ആറ് പുതിയ മോഡലുകളെ അവതരിപ്പിക്കാനുള്ള തിരക്കിലും കൂടിയാണ് ഹീറോ.

സെപ്തംബര്‍ മാസം കടന്ന് വരുന്ന ഉത്സവ സീസണ്‍ പ്രമാണിച്ച് രണ്ട് മോഡലുകളെ ഹീറോ അവതരിപ്പിക്കുമെന്ന് കമ്പനി വക്താവ് വ്യക്തമാക്കി.

ഇതിന് പിന്നാലെ, 2018 ദില്ലി ഓട്ടോ എക്‌സ്‌പോയില്‍ പുതിയ 200 സിസി മോട്ടോര്‍സൈക്കിളിനെയും ഹീറോ സമര്‍പ്പിക്കുമെന്ന് അദ്ദേഹം കൂട്ടിച്ചേര്‍ത്തു.

വരും മാസങ്ങളിലും ഹീറോ മികച്ച വളര്‍ച്ചാ നിരക്ക് കാഴ്ചവെക്കുമെന്നും വക്താവ് സൂചിപ്പിച്ചു. 2016-17 സാമ്പത്തിക വര്‍ഷം, 6663903 മോട്ടോര്‍സൈസക്കിളുകളാണ് ഹീറോ വില്‍പന നടത്തിയത്. പ്രതിവര്‍ഷ വില്‍പനകളില്‍, ഏറ്റവും ഉയര്‍ന്ന വില്‍പന കണക്കാണ് ഹീറോയുടേത്.

മുന്‍ പങ്കാളിയായ ഹോണ്ടയാണ് വിപണിയില്‍ ഹീറോയുടെ പ്രധാന എതിരാളി.

2020 ഓടെ 50 വിദേശ വിപണികളില്‍ ഹീറോ സാന്നിധ്യമറിയിക്കുമെന്നും, രാജ്യാന്തര തലത്തില്‍ 20 ഓളം ഉത്പാദന കേന്ദ്രങ്ങള്‍ ആരംഭിക്കുമെന്നും ഹീറോ മുമ്പ് വ്യക്തമാക്കിയിരുന്നു.