അഞ്ചാം തലമുറ ബെൻസ് ഇ-ക്ലാസ് മാർച്ചിൽ...

നിലവില്‍ 2 ലക്ഷം രൂപ അഡ്വാൻസ് നൽകി ഇന്ത്യയിലെ ചില ബെന്‍സ് ഡീലര്‍ഷിപ്പുകള്‍ ബുക്കിംഗും ആരംഭിച്ചുക്കഴിഞ്ഞു. എസ് ക്ലാസ്, സി ക്ലാസ് മോഡലുകളോട് സമാനമായ ഡിസൈനിലാണ് പുത്തൻ തലമുറ ഇ-ക്ലാസ് രൂപപ്പെടുത്തിയിരിക്കുന്നത്.

2013-ല്‍ പുറത്തിറങ്ങിയ നാലാം തലമുറയിൽ നിന്ന് നിരവധി മാറ്റങ്ങളോടെയാണ് അഞ്ചാം തലമുറക്കാരന്റെ വരവ്.

സുരക്ഷയ്ക്ക് കൂടുതൽ മുൻതൂക്കവും ഈ വാഹനത്തിന് നൽകിയിട്ടുണ്ട്. എൻസിപി ക്രാഷ് ടെസ്റ്റില്‍ 5 സ്റ്റാര്‍ റേറ്റിംഗ് സ്വന്തമാക്കിയതിനൊപ്പം ചൈല്‍ഡ് സേഫ്റ്റി സംവിധനവും പുത്തന്‍ ഇ-ക്ലാസിലുണ്ട്.

2016 ഫെബ്രുവരിയില്‍ പ്രദേശിക അസംബ്ലിള്‍ യൂണിറ്റ് വഴി ഇ-ക്ലാസ് നിര്‍മിച്ചതിന്റെ ഇരുപതാമത് വാര്‍ഷിക വേളയില്‍ 'എഡിഷന്‍ ഇ' എന്ന പേരില്‍ പ്രത്യേക പതിപ്പിനെ ഇറക്കിയിരുന്നു.

അലൂമിനിയം ചാസി ഉപയോഗിച്ച് നിര്‍മിച്ചതിനാല്‍ പുത്തൻ തലമുറ ഇ-ക്ലാസിന് നിലവിലുള്ളതിനേക്കാൾ 70 കിലോഗ്രാം ഭാരം കുറവുണ്ടെന്നാണ് കമ്പനി അവകാശപ്പെടുന്നത്.

നീളം 65 എംഎം ആയി വര്‍ധിപ്പിച്ചപ്പോള്‍ വീതിയും ഉയരവും യഥാക്രമം 2 എംഎം, 6 എംഎം ആക്കി കുറച്ചിട്ടുണ്ട്. 65 എംഎം ആണ് ഈ വാഹനത്തിന്റെ വീല്‍ബേസ്.

പെട്രോള്‍, ഡീസല്‍ വകഭേദങ്ങളിലാണ് ഈ വാഹനം ലഭ്യമാക്കിയിരിക്കുന്നത്. ഇതിലെ 2.0 (ഇ 200) ലിറ്റര്‍ പെട്രോള്‍ എൻജിൻ184 പിഎസ് കരുത്തും 300 എന്‍എം ടോര്‍ക്കുമാണ് ഉല്പാദിപ്പിക്കുന്നത്.

2.1 ലിറ്റര്‍ ഡീസല്‍ എൻജിൻ (ഇ 250 ഡി) 204 പിഎസ് കരുത്തും 500 എന്‍എം ടോര്‍ക്കും പ്രദാനം ചെയ്യും.

ഇതോടൊപ്പം 3.0 ലിറ്റര്‍ എൻജിനിലും ന്യൂജെൻ ഇ-ക്ലാസ് പുറത്തിറങ്ങാനുള്ള സാധ്യതയുണ്ട്. ഇ 350 മോഡലില്‍ ഈ എൻജിൻ 258 പിഎസ് കരുത്തും 620 എന്‍എം ടോര്‍ക്കുമായിരിക്കും ഉല്പാദിപ്പിക്കുക.

ആഗോള തലത്തില്‍ 1985-1996 കാലയളവിലായി 27 ലക്ഷം ഇ-ക്ലാസ് യൂണിറ്റുകളാണ് ബെൻസ് വിറ്റഴിച്ചിരിക്കുന്നത്.

1995-ന് ശേഷം ഇന്ത്യയില്‍ അസംബ്ലിള്‍ യൂണിറ്റ് ആരംഭിച്ചതിനു ശേഷം മൊത്തത്തിൽ 32000 ഇ-ക്ലാസ് യൂണിറ്റുകളാണ് വിറ്റഴിച്ചത്.

അഞ്ചാം തലമുറ ഇ-ക്ലാസ് വഴി കൂടുതല്‍ വില്പനയും വിപണിവിഹിതവും ഉണ്ടാക്കാമെന്ന പ്രതീക്ഷയിലാണ് കമ്പനി.