പ്രാരംഭ വില 20.45 ലക്ഷം രൂപ; ബിഎസ്-VI R 1250 GS സീരീസ് മോഡലുകൾ ഇന്ത്യയിലെത്തി

ബിഎംഡബ്ല്യു R 1250 GS പ്രോ പത്പ്പിന് 20.45 ലക്ഷം രൂപയും R 1250 GS അഡ്വഞ്ചർ പ്രോ മോഡലിന് 22.40 ലക്ഷം രൂപയുമാണ് രാജ്യത്തെ എക്സ്ഷോറൂം വില. കംപ്ലീറ്റ്ലി ബിൽറ്റ്-അപ്പ് യൂണിറ്റുകളായാണ് മോട്ടോർസൈക്കിളുകൾ ഇന്ത്യയിൽ ഇറക്കുമതി ചെയ്യുന്നത്.

1,254 സിസി, എയര്‍ / ലിക്വിഡ്-കൂള്‍ഡ്, ഫ്ലാറ്റ്-ട്വിൻ എഞ്ചിനാണ് അഡ്വഞ്ചർ ടൂറർ സീരീസ് മോഡലുകൾക്ക് തുടിപ്പേകുന്നത്. ഇത് 7,750 rpm-ൽ 134 bhp പരമാവധി കരുത്തും 6,250 rpm-ൽ 143 Nm torque ഉം ആണ് ഉത്പാദിപ്പിക്കുന്നത്.

എഞ്ചിൻ ആറ് സ്പീഡ് ഗിയർബോക്സുമായാണ് ജോടിയാക്കിയിരിക്കുന്നത്. പുതിയ ഫീച്ചറുകളും, കളര്‍ ഓപ്ഷനുകളും ബൈക്കുകളുടെ പ്രധാന ഹൈലൈറ്റുകളാണ്. അസിമെട്രിക് ഹെഡ്‌ലൈറ്റ്, ബീക്ക്-സ്റ്റൈൽ ഫ്രണ്ട്, ക്രമീകരിക്കാവുന്ന വിൻഡ്‌സ്ക്രീൻ എന്നിവയാണ് R 1250 GS സീരീസിലെ സ്റ്റൈലിംഗ് ഘടകങ്ങൾ.

പൂർണ-എൽഇഡി ലൈറ്റിംഗ്, അഡാപ്റ്റീവ് ഹെഡ്‌ലൈറ്റ്, ബ്ലൂടൂത്ത് പ്രാപ്തമാക്കിയ ടിഎഫ്ടി കളർ ഡിസ്പ്ലേ, ട്രാക്ഷൻ കൺട്രോൾ സിസ്റ്റം, എബിഎസ് പ്രോ, ഇക്കോ, റോഡ്, റെയ്ൻ എന്നീ മൂന്ന് സവാരി മോഡുകൾ, ഹിൽ സ്റ്റാർട്ട് കൺട്രോൾ, യുഎസ്ബി ചാർജിംഗ് സോക്കറ്റ് എന്നിവയാണ് പ്രീമിയം R 1250 GS പ്രോ, 1250 GS അഡ്വഞ്ചർ പ്രോ മോഡലുകളുടെ പ്രധാന സവിശേഷതകൾ.

ഒരു വലിയ ഫ്യുവൽ ടാങ്ക്, സ്പ്ലിറ്റ്-സ്‌റ്റൈല്‍ സീറ്റുകള്‍, ഉയരമുള്ള സെറ്റ് എക്‌സോസ്റ്റ്, ഷാഫ്റ്റ് ഡ്രൈവ് സിസ്റ്റം എന്നിവയും മോട്ടോര്‍സൈക്കിളുകളെ വ്യത്യസ്തരാക്കുന്നുണ്ട്. R 1250 GS പ്രോ അലോയ് വീലുകളാണ് ഉപയോഗിക്കുന്നത്.

അതേസമയം ഓഫ്-റോഡിന് അനുകൂലമാവാൻ അഡ്വഞ്ചര്‍ വേരിയന്റില്‍ ട്യൂബ്‌ലെസ് ടയര്‍ അനുയോജ്യമായ സ്പോക്ക് വീലുകളാണ് ബിഎംഡബ്ല്യു മോട്ടോറാഡ് ചേർത്തിരിക്കുന്നത്.

പുതിയ ബി‌എം‌ഡബ്ല്യു R 1250 GS പ്രോ, 1250 GS അഡ്വഞ്ചർ എന്നിവ സ്റ്റൈൽ‌ ട്രിപ്പിൾ‌ ബ്ലാക്ക് വേരിയൻറ്, സ്റ്റൈൽ‌ റാലി വേരിയന്റ് എന്നിവയിൽ‌ ലഭ്യമാണ്. ലിമിറ്റഡ് എഡിഷൻ സ്‌പെഷ്യൽ '40 ഇയേഴ്‌സ് GS എഡിഷനും ഇന്ത്യൻ വിപണിയിൽ കമ്പനി വാഗ്ദാനം ചെയ്യും.

ബി‌എം‌ഡബ്ല്യു R‌ 1250 GS സീരീസ് ഇന്ത്യൻ വിപണിയിൽ ഡ്യുക്കാട്ടി മൾട്ടിസ്ട്രാഡ V4, കവസാക്കി വെർസിസ് 1000 എന്നിവയ്ക്ക് എതിരാളികളാകും. കവസാക്കി വെർസിസ് 1000 ഇതിനകം ഇന്ത്യയിൽ ലഭ്യമാണ്. അതേസമയം ഡ്യുക്കാട്ടി മൾട്ടിസ്ട്രാഡ ഈ മാസമാകും വിൽപ്പനയ്ക്ക് എത്തുക.