സെയിം സെയിം, ബട്ട് ഡിഫറന്റ്... റേഞ്ചും സേഫ്റ്റിയും കൂട്ടിയെത്തിയ കിയ EV 6 റിവ്യൂ വായിക്കാം

2025 ഓട്ടോ എക്സ്പോയില്‍ വെച്ചാണ് കിയ EV6 ഫെയ്‌സ്‌ലിഫ്റ്റ് ഇന്ത്യന്‍ വിപണിയില്‍ അവതരിപ്പിച്ചത്. 2025 കിയ EV6 ഫെയ്സ്ലിഫ്റ്റില്‍ പരിഷ്‌കരിച്ച ഡിസൈന്‍, പുതിയ ADAS ഫീച്ചറുകള്‍, കൂടുതല്‍ റേഞ്ച് നല്‍കുന്ന വലിയ ബാറ്ററി പായ്ക്ക് എന്നിവ ഉണ്ടായിരുന്നു. കിയ EV6 65.8 ലക്ഷം രൂപ എക്‌സ്‌ഷോറൂം രൂപ വിലയുള്ള GT ലൈന്‍ ട്രിമ്മില്‍ മാത്രമേ വാഗ്ദാനം ചെയ്യുന്നുള്ളൂ. ആന്ധ്രാപ്രദേശിലുള്ള കിയയുടെ ഫാക്ടറിയില്‍ വെച്ച് മുഖംമിനുക്കിയ EV6 ഓടിച്ച് നോക്കാന്‍ ഞങ്ങള്‍ക്ക് അവസരം ലഭിച്ചു. അപ്ഡേറ്റഡ് ഇലക്ട്രിക് എസ്‌യുവി ഏതാനും മണിക്കൂറുകള്‍ ഓടിച്ച ശേഷം ഞങ്ങള്‍ക്ക് പറയാനുള്ള കാര്യങ്ങള്‍ ചുവടെ വിശദമായി വായിക്കാം.

മാറ്റങ്ങള്‍: ഫെയ്സ്ലിഫ്റ്റഡ് കിയ EV6-ന് പരിഷ്‌കരിച്ച ഡിസൈന്‍ കമ്പനി സമ്മാനിച്ചിട്ടുണ്ട്. 2025 മോഡലില്‍ അപ്ഡേറ്റഡ് ബമ്പറുകളും കിയയുടെ സ്റ്റാര്‍ മാപ്പ് എല്‍ഇഡി ഹെഡ്ലൈറ്റുകളും ഉണ്ട്. ബ്ലാങ്ക്ഡ്-ഓഫ് ഗ്രില്ലിന്റെ നീളത്തില്‍ ഒരു എല്‍ഇഡി ലൈറ്റ് ബാര്‍ ഉപയോഗിച്ച് കണക്റ്റ് ചെയ്തിരിക്കുന്ന ഇന്റഗ്രേറ്റഡ് ഹുക്ക് ആകൃതിയിലുള്ള ഡിആര്‍എല്ലുകളും കാണാം. റിയര്‍ ബമ്പറും 19 ഇഞ്ച് അലോയ് വീലുകളും ട്വീക്ക് ചെയ്തിട്ടുണ്ട്.

ഇവിയുടെ ഇന്റീരിയറും സൂക്ഷ്മമായ ചില മാറ്റങ്ങള്‍ക്ക് വിധേയമായിട്ടുണ്ട്. EV9 മോഡലില്‍ കാണുന്ന 3-സ്‌പോക്ക് സ്റ്റിയറിംഗ് വീലും ഡ്രൈവ് മോഡുകള്‍ സ്വിച്ച് ചെയ്യുന്നതിനുള്ള ഒരു പ്രത്യേക ബട്ടണും ഇതില്‍ ഉള്‍പ്പെടുന്നു. കീ ഇല്ലാതെ തന്നെ EV6 സ്റ്റാര്‍ട്ട് ചെയ്യാന്‍ അനുവദിക്കുന്ന ഫിംഗര്‍പ്രിന്റ് സ്‌കാനറിനൊപ്പം സെന്റര്‍ കണ്‍സോളില്‍ പുതിയ ടെക്‌സ്ചര്‍ഡ് ഫിനിഷ് ചേര്‍ത്തിട്ടുണ്ട്.

ലെയ്ന്‍ കീപ്പിംഗ്, ഫോളോ ആന്‍ഡ് എക്‌സിറ്റ് അസിസ്റ്റ്, സ്റ്റോപ്പ്-ആന്‍ഡ്-ഗോ ശേഷിയുള്ള സ്മാര്‍ട്ട് ക്രൂയിസ് കണ്‍ട്രോള്‍, ബ്ലൈന്‍ഡ്-സ്‌പോട്ട് കൊളീഷന്‍ അവോയ്ഡന്‍സ്, ഫോര്‍വേഡ് കൊളീഷന്‍ അവോയ്ഡന്‍ എന്നിവയുള്‍പ്പെടെ 17 പുതിയ ഫംഗ്ഷനുകള്‍ ഉള്‍ക്കൊള്ളുന്ന ലെവല്‍ 2 ADAS സെറ്റപ്പ് ചേര്‍ത്ത് സേഫ്റ്റി കൂട്ടിയിട്ടുണ്ട്. ബാറ്ററി പാക്കിന്റെ രൂപത്തിലാണ് ഏറ്റവും വലിയ മാറ്റം.

പുതിയ 84 kWh ഉപയോഗിച്ച് പഴയ 77.4 kWh യൂണിറ്റ് മാറ്റിസ്ഥാപിച്ചു. ഭാരം കുറഞ്ഞതും കൂടുതല്‍ ഊര്‍ജ്ജ സാന്ദ്രതയുള്ളതുമാണെന്ന് കിയ അവകാശപ്പെടുന്ന NMC കെമിസ്ട്രി ഈ ബാറ്ററി പായ്ക്കില്‍ ഫീച്ചര്‍ ചെയ്യുന്നു. ഫുള്‍ ചാര്‍ജില്‍ 663 കിലോമീറ്റര്‍ കിലോമീറ്ററാണ് ARAI ക്ലെയിംഡ് റേഞ്ച്.

വലിയ ബാറ്ററി പായ്ക്കിന്റെ ഫലമായി 2025 കിയ EV6 ഇലക്ട്രിക് എസ്‌യുവിക്ക് മുന്‍ പതിപ്പിനേക്കാള്‍ 53 കിലോമീറ്റര്‍ റേഞ്ച് കൂടുതലുണ്ട്. 350 kW ചാര്‍ജര്‍ ഉപയോഗിച്ച് ബാറ്ററി 18 മിനിറ്റിനുള്ളില്‍ 10 മുതല്‍ 80 ശതമാനം വരെ ചാര്‍ജ് ചെയ്യാന്‍ കഴിയും. വേഗത കുറഞ്ഞ 50 kW DC ചാര്‍ജര്‍ ഉപയോഗിക്കുമ്പോള്‍ ചാര്‍ജിംഗ് സമയം 73 മിനിറ്റായി ഉയരും.

ഡ്രൈവിംഗ് ഇംപ്രഷന്‍: ഇലക്ട്രിക് എസ്‌യുവിയുടെ ഇരട്ട-മോട്ടോര്‍ സജ്ജീകരണം 320 bhp പവറും 605 Nm പീക്ക് ടോര്‍ക്കും ഉത്പാദിപ്പിക്കുകയും നാല് വീലുകളിലേക്ക് കൈമാറുകയും ചെയ്യുന്നു. ഇവി 5.3 സെക്കന്‍ഡില്‍ പൂജ്യത്തില്‍ നിന്ന് മണിക്കൂറില്‍ 100 കിലോമീറ്റര്‍ വേഗത കൈവരിക്കുമെന്ന് കിയ അവകാശപ്പെടുന്നു. മുമ്പത്തേക്കാള്‍ 0.1 സെക്കന്‍ കുറവാണ് ഇത്. കമ്പനിയുടെ ടെസ്റ്റ് ട്രാക്കില്‍ ഈ കണക്കുകള്‍ എളുപ്പത്തില്‍ നേടാന്‍ ഞങ്ങള്‍ക്ക് കഴിഞ്ഞു.

എന്നാല്‍, ഓരോ തവണയും അമിതമായി ത്രോട്ടില്‍ പ്രയോഗിക്കുമ്പോള്‍ ചെറിയ അസൗകര്യങ്ങള്‍ അനുഭവപ്പെട്ടു. സസ്‌പെന്‍ഷന്‍ സജ്ജീകരണം സ്‌പെക്ട്രത്തിന്റെ സ്പോര്‍ട്ടിയര്‍ വശത്ത് തുടരുന്നു. കിയ EV6 പോലെ വലിപ്പമുള്ളള ഒരു വാഹനത്തില്‍ നിന്ന് സാധാരണയായി പ്രതീക്ഷിക്കുന്നതിലും വളരെ ചടുലമായ സസ്‌പെന്‍ഷന്‍ സെറ്റപ്പാണ് ലഭിക്കുന്നത്. സ്പോര്‍ട്ടി സസ്പെന്‍ഷന്‍ യാത്ര കഠിനമാക്കുന്നില്ലെന്നതും എടുത്തുപറയണം.

ഡ്രൈവ്‌സ്പാര്‍ക്ക് കമന്റ്: 2022 മുതൽ ഇന്ത്യന്‍ വിപണിയിലുള്ള പ്രീമിയം ഇലക്ട്രിക് എസ്‌യുവിയായ EV6 ഡിസൈന്‍ അപ്‌ഗ്രേഡ്, ഫീച്ചര്‍ കൂട്ടിച്ചേര്‍ക്കല്‍, വലിയ ബാറ്ററി പായ്ക്ക് എന്നിവയുമായാണ് മുഖമിനുക്കിയത് . വലിയ ബാറ്ററി യഥാര്‍ത്ഥ ഡ്രൈവിംഗ് സാഹചര്യത്തിലെ റേഞ്ച് 400 ആക്കി ഉയര്‍ത്തുമെങ്കിലും ഞങ്ങള്‍ക്ക് അത് പരീക്ഷിക്കാന്‍ മതിയായ സമയം ലഭിച്ചില്ല. ഏതായാലും ഈ അപ്‌ഡേറ്റ് പ്രീമിയം ഇലക്ട്രിക് എസ്‌യുവി വിഭാഗത്തിലെ ആകര്‍ഷകമായ ഓഫറുകളില്‍ ഒന്നായി EV6 അടയാളപ്പെടുത്തുന്നു.