Click it and Unblock the Notifications
OG ഹോട്ട്ഹാച്ചിനായുള്ള കാത്തിരിപ്പ് വെറുതെയായില്ല! ഫോക്സ്വാഗണ് ഗോള്ഫ് GTI റിവ്യൂ...
'GTI' എന്ന അക്ഷരങ്ങള്ക്ക് ഹോട്ട്ഹാച്ച്പ്രേമികള്ക്കിടയില് പ്രത്യേക അര്ത്ഥമാണുള്ളത്. നെയിംപ്ലേറ്റിന് അടുത്ത് GTI ബാഡ്ജുള്ള ഏറ്റവും പേരുകേട്ട ഹാച്ച്ബാക്ക് ആണ് ഫോക്സ്വാഗണ് ഗോള്ഫ്. ലോകമെമ്പാടുമുള്ള ഡ്രൈവിംഗ് പ്രേമികളുടെ പ്രിയപ്പെട്ട മോഡല് വാരാന്ത്യങ്ങളില് കുടുംബത്തോടൊപ്പം യാത്രകള് പോകാനും അനുയോജ്യമാണ്. എന്നിരുന്നാലും, 2007-ല് ഇന്ത്യന് വിപണിയില് പ്രവേശിച്ച ഫോക്സ്വാഗണ് ഇതുവരെ ഗോള്ഫ് ഇവിടെ വില്പ്പനക്ക് വെച്ചിരുന്നില്ല. ഇന്ത്യയിലെ ഹാച്ച്ബാക്ക് വിഭാഗം കണക്കിലെടുക്കുമ്പോള് ഗോള്ഫിന്റെ വലിപ്പവും വിലയും അല്പ്പം കൂടുതലാണെന്നത് തന്നെയാണ് കാരണം. അതുകൊണ്ടാണ് അടിസ്ഥാനപരമായി സെഡാന് രൂപത്തിലുള്ള ഒരു ഗോള്ഫ് ആയ ജെറ്റ ഇന്ത്യയിലെത്തിയത്. GTI ബാഡ്ജ് കൂടുതല് സൂക്ഷ്മമായി സംരക്ഷിക്കപ്പെട്ട ഒരു നെയിംപ്ലേറ്റായിരുന്നു.
2016-ല് പോളോ GTI ലഭിച്ചെങ്കിലും ആ 3-ഡോര് പോക്കറ്റ് റോക്കറ്റിന് ശേഷം ജര്മന് ബ്രാന്ഡ് ഇന്ത്യയ്ക്കായുള്ള പെര്ഫോമന്സ് നിര പിന്നെ ഇതുവരെ അപ്ഡേറ്റ് ചെയ്തിരുന്നില്ല. പെര്ഫോമന്സ് കാറുകള്ക്ക് മതിയായ പണം മുടക്കാന് ശേഷിയുള്ള വാഹനപ്രേമികളുടെ എണ്ണം ഇന്ത്യയില് കൂടിയെന്ന് മനസ്സിലാക്കിയ ഫോക്സ്വാഗണ് ഒരു പതിറ്റാണ്ടിന് ശേഷം ഗോള്ഫ് GTI-യെ ഇന്ത്യയിലേക്ക് കൊണ്ടുവന്നു. മധ്യപ്രദേശിലെ നാട്രാക്സില് വെച്ച് പുതിയ ഗോള്ഫ് GTI ഓടിച്ച ശേഷം ഞങ്ങള്ക്ക് തോന്നിയ കാര്യങ്ങള് ചുവടെ പങ്കുവെക്കാം.
ഡിസൈനും ഫീച്ചറുകളും: ചുരുക്കത്തില് പറയുമ്പോള് ഒരു ഗോ-ഫാസ്റ്റര് ബോഡി കിറ്റ് അണിഞ്ഞ MK 8.5 ഗോള്ഫ് (ഫെയ്സ്ലിഫ്റ്റഡ് ജെന് 8) ആണ് ഗോള്ഫ് GTI. മുന്വശത്ത് GTI ബാഡ്ജും എല്ഇഡി ഡിആര്എല്ലുകളും ഉള്ക്കൊള്ളുന്ന ഒരു ചെറിയ ടോപ്പ് ഗ്രില് ഉപയോഗിച്ച് മധ്യഭാഗത്ത് ഇല്യുമിനേറ്റഡ് VW ബാഡ്ജുമായി ബന്ധിപ്പിച്ചിരിക്കുന്ന സ്ലീക്ക് മാട്രിക്സ് എല്ഇഡി ഹെഡ്ലൈറ്റുകള് നിങ്ങള്ക്ക് കാണാം.
ഗോള്ഫ് GTI യുടെ മുന്വശത്ത് താഴെയായി വലിയ എയര്ഡാമിന്റെ ഇരുവശത്തുമായി X ആകൃതിയിലുള്ള എല്ഇഡി ഫോഗ് ലൈറ്റുകള് കാണാം. ഇതിന് ചുറ്റും വലിയ L ആകൃതിയിലുള്ള വിംഗ്ലെറ്റുകള് പ്രവര്ത്തിക്കുന്നു.വശങ്ങളില് ഫ്രണ്ട് ഡോറുകളില് ഒആര്വിഎമ്മുകള്ക്ക് കീഴില് ചുവന്ന GTI ബാഡ്ജുകള് ഉണ്ട്. ഇന്ത്യ-സ്പെക്ക് ഗോള്ഫ് GTI-ക്ക് 18 ഇഞ്ച് അലോയ് വീലുകളില് ലഭിക്കുന്നു. പിന്നില് നിങ്ങള്ക്ക് ചുവന്ന ബ്രേക്ക് കാലിപ്പറുകള് കാണാം.
ഫോക്സ്വാഗണ് ഗോള്ഫ് GTI യുടെ പിന്ഭാഗത്തേക്ക് നീങ്ങുമ്പോള് നിങ്ങള്ക്ക് ഒരു ഷാര്ക്ക് ഫിന് ആന്റിന, റൂഫ്-മൗണ്ടഡ് സ്പോയിലര്, സ്മോക്ക്ഡ് എല്ഇഡി ടെയില്ലൈറ്റുകള്, VW ലോഗോയ്ക്ക് കീഴിലുള്ള GTI നെയിംപ്ലേറ്റ് എന്നിവ ദൃശ്യമാകും. റിയര് ബമ്പറില് നിങ്ങള്ക്ക് റിയര് ഡിഫ്യൂസര് കാണാം. അതിന്റെ അരികുകളില് അല്പ്പം പുറത്തേക്കായി തള്ളി നില്ക്കുന്ന രണ്ട് എക്സ്ഹോസ്റ്റ് ടിപ്പുകളുമുണ്ട്.
അന്താരാഷ്ട്ര വിപണികളില് വില്ക്കുന്ന ഹോട്ട് ഹാച്ചിന്റെ പതിപ്പുകളില് കാണുന്ന അതേ ഇന്റീരിയര് തന്നെയാണ് ഇന്ത്യ സ്പെക്കിനും ലഭിക്കുക. സ്റ്റിയറിംഗ് വീലിലും ഐക്കണിക് GTI ടാര്ട്ടന് പാറ്റേണിലുള്ള സീറ്റുകളിലും ചുവന്ന സ്റ്റിച്ചിംഗ് ഉണ്ട്. സ്റ്റിയറിംഗ് വീലിന്റെ താഴത്തെ സ്പോക്കില് കൂടുതല് റെഡ് ഹൈലൈറ്റുകള് കാണാം.ഗോള്ഫ് GTI-യില് ഡാഷില് 10.25 ഇഞ്ച് ഡിജിറ്റല് ഡ്രൈവര് ഡിസ്പ്ലേയും 12.9 ഇഞ്ച് ടച്ച്സ്ക്രീന് ഇന്ഫോടെയ്ന്മെന്റ് യൂണിറ്റുമടങ്ങുന്ന ഡ്യുവല് ഡിസ്പ്ലേ സജ്ജീകരണമുണ്ട്.
ഇത് VW വാഗ്ദാനം ചെയ്യുന്ന എല്ലാ കണക്റ്റിവിറ്റി ഫീച്ചറുകളും കമ്പനിയുടെ ഏറ്റവും പുതിയ MIB4 സോഫ്റ്റ്വെയറുമായാണ് വരുന്നത്. സ്റ്റിയറിംഗ് വീലിലെ ഫിസിക്കല് ബട്ടണുകള് ഉപയോഗിച്ച് ഡ്രൈവര് ഡിസ്പ്ലേയും ഇന്ഫോടെയ്ന്മെന്റ് സ്ക്രീനും നിയന്ത്രിക്കാനും കഴിയും. ക്ലൈമറ്റ് കണ്ട്രോള് സജ്ജീകരണത്തിനായുള്ള മിക്ക കണ്ട്രോളുകളും ഉള്പ്പെടെ നിരവധി ഫീച്ചറുകള് നാവിഗേറ്റ് ചെയ്യാനും ഉപയോഗിക്കാനും യാത്രക്കാരെ സഹായിക്കുന്നതിന് തൊട്ടുമുമ്പില് ഫിസിക്കല് ബട്ടണുകളും ഉണ്ട്.
ഗോള്ഫ് GTI-യുടെ മറ്റൊരു ഹൈലൈറ്റ് വയര്ലെസ് ചാര്ജിംഗ്, ആംബിയന്റ് ലൈറ്റിംഗ്, പനോരമിക് സണ്റൂഫ് എന്നിവയടങ്ങുന്ന വിശാലമായ ക്യാബിന് ആണ്. 45 വാട്ട്സ് വരെ പവര് നല്കാന് കഴിയുന്ന നാല് യുഎസ്ബി ടൈപ്പ് സി പോര്ട്ടുകളും ഉണ്ട്. മുന്വശത്തെ ബക്കറ്റ് സീറ്റുകള്, പ്രത്യേകിച്ച് ഡ്രൈവര് യൂണിറ്റ്, വളരെ സുഖകരമാണ്. ഉയരമുള്ളവര്ക്ക് പോലും പിന്നില് മതിയായ ഹെഡ് സ്പേസും ലോംഗ് ഡ്രൈവിന് പോലും പര്യാപ്തമായ ലെഗ്റൂമും ലഭിക്കുന്നു.
ബൂട്ടിന് നാല് പേരടങ്ങുന്ന കുടുംബത്തിന് ഒരു വാരാന്ത്യ യാത്ര പോകുമ്പോള് ആവശ്യമായ 374 ലിറ്റര് ലഗേജ് ഉള്ക്കൊള്ളാന് കഴിയും. ലെയ്ന് അസിസ്റ്റ്, ട്രാഫിക് ജാം അസിസ്റ്റ്, എമര്ജന്സി അസിസ്റ്റ്, അഡാപ്റ്റീവ് ക്രൂയിസ് കണ്ട്രോള്, എമര്ജന്സി ബ്രേക്കിംഗ് ഫ്രണ്ട് അസിസ്റ്റ് തുടങ്ങി നിരവധി ADAS സവിശേഷതകളും ഗോള്ഫ് GTI-യില് ലഭിക്കുന്നു. കൂടാതെ സാധാരണ എയര്ബാഗുകള്, ഇബിഡിയുള്ള എബിഎസ്, സ്റ്റെബിലിറ്റി കണ്ട്രോള്, ഹില് സ്റ്റാര്ട്ട് അസിസ്റ്റ് എന്നിവയും സേഫ്റ്റി കിറ്റിലുണ്ട്.
സ്പെസിഫിക്കേഷനുകള്: Mk 8.5 VW ഗോള്ഫ് GTI-യില് കമ്പനിയുടെ EA888 EVO4 2.0 ലിറ്റര്, 4 സിലിണ്ടര്, ഡയറക്ട്-ഇഞ്ചക്ഷന് ടര്ബോ പെട്രോള് എഞ്ചിനാണ് ലഭിക്കുന്നത്. ഗോള്ഫ് GTI-യില് എഞ്ചിന് 261bhp പവറും 370Nm പീക്ക് ടോര്ക്കും നല്കുന്നു. ഇത് 7-സ്പീഡ് ഡ്യുവല്-ക്ലച്ച് ഓട്ടോമാറ്റിക് ഗിയര്ബോക്സ് വഴി ഫ്രണ്ട് വീലുകളിലേക്ക് പവര് ചക്രങ്ങളിലേക്ക് അയയ്ക്കുന്നു.
5.9 സെക്കന്ഡിനുള്ളില് കാര് 0-100km/h വേഗത കൈവരിക്കുമെന്ന് കമ്പനി പറയുന്നു. പരമാവധി വേഗത മണിക്കൂറില് 250 കിലോമീറ്ററായി ഇലക്ട്രോണിക്കലി പരിമിതപ്പെടുത്തിയിട്ടുണ്ട്. പവര് കൈകാര്യം ചെയ്യാനായി ഫോക്സ്വാഗണ് ഗോള്ഫ് GTI-യില് മുന്വശത്തെ ആക്സിലില് ലിമിറ്റഡ് സ്ലിപ്പ് ഡിഫറന്ഷന്ഷ്യലുണ്ട്. കൂടാതെ സാധാരണ ഗോള്ഫിനെ അപേക്ഷിച്ച് സസ്പെന്ഷന് സജ്ജീകരണം കൂടുതല് ശക്തമാക്കിയിട്ടുണ്ട്.
225/40/R18 ലോ-പ്രൊഫൈല് ടയറുകളില് പൊതിഞ്ഞ 18 ഇഞ്ച് അലോയ് വീലുകളിലാണ് ഹോട്ട് ഹാച്ച് ഓടുന്നത്. ഫോക്സ്വാഗണ് ഗോള്ഫ് GTI-ക്ക് 4,289mm നീളവും 1,789mm വീതിയും 1,456mm ഉയരവുമുണ്ട്. വീല്ബേസ് അളവ് 2,627mm ആണ്. ടേണിംഗ് സര്ക്കിള് 12 മീറ്ററും 134mm ഗ്രൗണ്ട് ക്ലിയറന്സും വാഗ്ദാനം ചെയ്യുന്നു.
ഡ്രൈവിംഗ് ഇംപ്രഷനുകള്: നാട്രാക്സില് ഗോള്ഫ് GTI, അത് എന്തുകൊണ്ടാണ് ഹോട്ട് ഹാച്ച്ബാക്ക് പ്രേമികള്ക്ക് പ്രിയങ്കരമായി മാറിയതെന്ന് ഞങ്ങള്ക്ക് കാണിച്ചുതന്നു. നാട്രാക്സിലെ പോലെ നിയന്ത്രിത അന്തരീക്ഷത്തില് സ്പ്രിന്റ് സമയം എളുപ്പത്തില് മറികടക്കാന് സാധിക്കുുന്നുണ്ടായിരുന്നു. ബോണറ്റിന് കീഴിലുള്ള ടര്ബോചാര്ജ്ഡ് എഞ്ചിന് റെവ് റേഞ്ചിലുടനീളം മതിയായ പവര് വാഗ്ദാനം ചെയ്യുന്നു. ഗിയറുകള് എളുപ്പത്തില് മുകളിലേക്കും താഴേക്കും മാറ്റുന്ന DSG ഗിയര്ബോക്സ് ഇതിനെ നല്ല രീതിയില് സഹായിക്കുന്നു.
ശരവേഗത്തില് മൂന്നക്ക വേഗത തൊടുന്നതിനാല് പൊതുനിരത്തുകളില് ഓടിക്കുമ്പോള് പ്രത്യേക ശ്രദ്ധ വേണം. ഹൈവേയില് ഓവര്ടേക്ക് ചെയ്യേണ്ട ആവശ്യം വന്നില് DSG ബോക്സ് ഫിനിഷിംഗ് ലൈനിലേക്ക് കുതിക്കുന്ന ഒരു സ്പ്രിന്റര് പോലെ ഗിയര് റേഷ്യോ കുറയ്ക്കും നിങ്ങളുടെ വഴിയിലുള്ള ആരെയും മറികടക്കാന് സഹായിക്കുകയും ചെയ്യും.
സ്റ്റിയറിംഗ് റെസ്പോണ്സീവ് ആണ്, കൂടാതെ സ്റ്റിഫ് സസ്പെന്ഷന് സജ്ജീകരണത്തോടൊപ്പം നിങ്ങള്ക്ക് എളുപ്പത്തില് കോര്ണര് ചെയ്യാന് സാധിക്കും. ഫ്രണ്ട് ആക്സിലില് ബോള്ട്ട് ചെയ്തിരിക്കുന്ന ലിമിറ്റഡ് സ്ലിപ്പ് ഡിഫറന്ഷ്യലും ഇവിടെ ഗുണകരമാണ്. ഓള്-വീല് ഡിസ്ക് സജ്ജീകരണം ഗോള്ഫ് GTI-യെ ഇരട്ടി വേഗത്തില് നിര്ത്താന് സഹായിക്കുന്നു. ഷാര്പ്പായ ബ്രേക്കുകളുടെ പെഡലുകളും പ്രവര്ത്തിപ്പിക്കാന് വളരെ എളുപ്പമാണ്.
ഡ്രൈവ്സ്പാര്ക്ക് കമന്റ്: ദൈനംദിന ആവശ്യങ്ങള്ക്കും മൂഡ് മാറുമ്പോള് ഒരു ത്രില്ലിംഗ് ഡ്രൈവിന് പോകാനുമായി കഴിഞ്ഞ അരനൂറ്റാണ്ടിലേറെയായി വാഹനപ്രേമികള് തിരഞ്ഞെടുത്ത ഹാച്ച്ബാക്കാണ് ഫോക്സ്വാഗണ് ഗോള്ഫ് GTI. പ്രായോഗികവും രസകരവുമായ ഗോള്ഫ് GTI സ്വന്തമാക്കാന് കഴിഞ്ഞ 150 പേരും ഓടിക്കാന് അവസരം ലഭിച്ച ഞങ്ങളെ പോലെ കുറച്ച് പേരും ഭാഗ്യശാലികളാണ്. വര്ഷങ്ങളുടെ കാത്തിരിപ്പിന് ഫലമുണ്ടായി എന്ന് ഉറപ്പിച്ച് പറയാം.
Continue with Google