റോഡിലെ രക്ഷകനായി ഓഡി മാട്രിക്‌സ് ഹെഡ്‌ലൈറ്റ്

25 ഹൈ ബീം എല്‍ഇഡികള്‍ ഉള്‍ക്കൊള്ളുന്നതാണ് ഈ ഹെഡ്‌ലാമ്പ്. ഓരോ റിഫ്‌ലക്ടറിലും അഞ്ച് വീതം എല്‍ഇഡ്കള്‍ സ്ഥാപിച്ചിരിക്കുന്നു. വാഹനത്തിന്റെ വേഗതയെ ആശ്രയിച്ചാണ് ഇവയുടെ പ്രവര്‍ത്തനം. ഹൈവേകളില്‍ 30 കിലോമീറ്റര്‍ വേഗത പിടിക്കുമ്പോഴും നഗരപ്രദേശങ്ങളില്‍ 60 കിലോമീറ്റര്‍ വേഗ പിടിക്കുമ്പോഴും ഹൈ ബീം സെറ്റ് പ്രവര്‍ത്തിക്കും.

സ്ഫടികരശ്മികള്‍ പോലുള്ള പ്രകാശം പുറത്തുവിടുന്നവയാണ് മാട്രിക്‌സ് എല്‍ഇഡികളെന്ന് ഓഡി പറയുന്നു. പകല്‍നേരങ്ങളില്‍ ഡേടൈം റണ്ണിംഗ് ലൈറ്റിനോടൊപ്പം പ്രത്യേക സൗന്ദര്യം പകരാന്‍ പുതിയ ഹെഡ്‌ലാമ്പിന്റെ ഡിസൈനിന് സാധിക്കും.

വാഹനത്തില്‍ പ്രത്യേക ഇടങ്ങളില്‍ സ്ഥാപിച്ചിട്ടുള്ള കാമറകളോടൊപ്പം ചേര്‍ന്നാണ് ഈ ഹെഡ്‌ലൈറ്റുകള്‍ പ്രവര്‍ത്തിക്കുക. ഈ കാമറകള്‍ വഴിയാത്രക്കാരെയും എതിരെ വരുന്ന വാഹനങ്ങളെയും തിരിച്ചറിയുന്നു. എതിരെയുള്ള വാഹനങ്ങള്‍ക്ക്, അല്ലെങ്കില്‍ മനുഷ്യര്‍ക്ക് മേല്‍ നേരിട്ട് പ്രകാശം വീഴ്ത്തുകയില്ല. എതിരെ വരുന്ന വസ്തുക്കളില്‍ പതിക്കാനിടയുള്ള ലൈറ്റുകള്‍ മാത്രം തനിയെ പ്രവര്‍ത്തനരഹിതമാകുന്നു. അവ കടന്നുപോകുമ്പോള്‍ പ്രസ്തുത ലൈറ്റുകള്‍ വീണ്ടും പ്രവര്‍ത്തിച്ചു തുടങ്ങുന്നു. എതിര്‍ വാഹനം എത്രത്തോളം അടുത്തെത്തുന്നുവോ അത്രത്തോളം ലൈറ്റുകള്‍ പ്രവര്‍ത്തിക്കാതാവും. എതിര്‍ വാഹനത്തിന്റെ ചുറ്റുമായി വെളിച്ചം നിലനില്‍ക്കുകയും ഡ്രൈവറുടെ കണ്ണുകളിലേക്ക് കുത്തുന്ന പ്രകാശം ചെല്ലുന്നത് തടയുകയും ചെയ്യുന്നു.

മറ്റൊരു സങ്കേതം കൂടി ഇതോടൊപ്പമുണ്ട്. കാല്‍നടയാത്രക്കാര്‍ വാഹനത്തിന്റെ തൊട്ടടുത്ത് വരുന്ന ഘട്ടങ്ങളില്‍ എല്‍ഇഡികള്‍ അയാളിലേക്ക് കേന്ദ്രീകരിച്ച് കൂടുതല്‍ വ്യക്തതയോടെ പ്രകാശം നല്‍കുകയും ഡ്രൈവറെ ജാഗ്രതപ്പെടുത്തുകയും ചെയ്യുന്നു.

ഹെഡ്ലൈറ്റ് കണ്ണിലടിച്ച് ഉണ്ടാകാറുള്ള അപകടങ്ങള്‍ കുറയ്ക്കുന്നതിന് ഈ സംവിധാനം സഹായകമാകും. ഇവയെല്ലാം സാധാരണ വാഹനങ്ങളിലെത്താന്‍ കുറച്ച് സമയമെടുക്കും. ഇന്നല്ലെങ്കില്‍ നാളെ അവ എത്താതിരിക്കില്ല. ഇന്നത്തെ ആഡംബരം നാളത്തെ ആവശ്യം എന്നാണല്ലോ.