ഡാറ്റ്‌സന്‍, ആള്‍ട്ടോ 800-നെ വെല്ലുവിളിക്കുന്നു!

രാജ്യത്തിന്റെ വോള്യം വിപണി നിയന്ത്രിക്കുന്ന മാരുതിയെ എതിരിടാനുള്ള സന്നാഹങ്ങള്‍ പതുക്കെ ഒരുക്കിവരികയാണ് ഡാറ്റ്‌സന്‍.

എന്‍ജിന്‍

മാരുതി സുസൂക്കിയുടെ 800 സിസി ശേഷിയുള്ള എന്‍ജിന്‍ ഘടിപ്പിച്ചുവരുന്ന ആള്‍ട്ടോയെയാണ് പുതിയ വാഹനം ലക്ഷ്യം വെക്കുക. ഗോ ഹാച്ച്ബാക്കിലുപയോഗിക്കുന്ന 1.2 ലിറ്റര്‍ എന്‍ജിന്‍ തന്നെ ഈ വാഹനത്തിലും ഉപയോഗിക്കുമോ എന്ന കാര്യത്തില്‍ വ്യക്തത വന്നിട്ടില്ല. ഒരുപക്ഷേ, നിലവിലെ എന്‍ജിന്‍ റീട്യൂണ്‍ പണ്ണി 1 ലിറ്റര്‍ ആക്കി ചെറുതാക്കുവാനും സാധ്യതയുണ്ട്.

ചെറുസെഡാന്‍

ഗോ ഹാച്ച്ബാക്കിനും ഗോ പ്ലസ്സിനും ശേഷം ഒരു ചെറു സെഡാന്‍ വിപണിയിലെത്തിക്കുമെന്നായിരുന്നു നേരത്തെ പ്രതീക്ഷിച്ചിരുന്നത്. റഷ്യയില്‍ ഡാറ്റ്‌സന്റെ ഒരു കോംപാക്ട് സെഡാന്‍ ലോഞ്ച് അടുത്തുതന്നെ നടക്കും. എന്നാല്‍ ഈ വാഹനം ഇന്ത്യയിലെത്തുക ആള്‍ട്ടോ എതിരാളിയുടെ വരവിനു ശേഷമാവാന്‍ സാധ്യതയുണ്ട്.

വില

ഗോ ഹാച്ച്ബാക്കിന് താഴെയായിരിക്കും പുതിയ ഹാച്ച്ബാക്കിന് വില കാണുക. ഗോ ഹാച്ച്ബാക്കിന് വില 3 മുതല്‍ 4 ലക്ഷം രൂപ വരെയായിരിക്കും. ഡാറ്റ്‌സന്‍ ആള്‍ട്ടോ എതിരാളി 2 ലക്ഷം മുതല്‍ 3 ലക്ഷം വരെയുള്ള വിലനിലവാരത്തില്‍ നില്‍ക്കും.

'12'

'12' എന്ന രഹസ്യനാമത്തിലാണ് ഡാറ്റ്‌സന്റെ ഗവേഷണവികസനകേന്ദ്രങ്ങളില്‍ ആള്‍ട്ടോ എതിരാളിയുടെ നിര്‍മാണ പ്രവര്‍ത്തനങ്ങള്‍ നടക്കുന്നത്. മാസത്തില്‍ ഒമ്പതിനായിരം യൂണിറ്റുവരെ വിറ്റഴിക്കാന്‍ സാധിക്കണമെന്ന ലക്ഷ്യത്തോടെയാണ് വാഹനം നിര്‍മിക്കുന്നത്. മാരുതി ആള്‍ട്ടോ റെയ്ഞ്ച് വാഹനങ്ങള്‍ നിലവില്‍ 20,000 യൂണിറ്റുവരെ മാസത്തില്‍ വില്‍ക്കുന്നുണ്ട്. രാജ്യത്തെ 117 നിസ്സാന്‍ ഡീലര്‍ഷിപ്പുകള്‍ വഴിയായിരിക്കും ഡാറ്റ്‌സന്‍ വാഹനങ്ങള്‍ തുടക്കത്തില്‍ വില്‍ക്കുക. ക്രമേണ ഡാറ്റ്‌സന്‍ സ്വന്തം ഡീലര്‍ഷിപ്പുകളാരംഭിക്കും.