2015 സ്‌കോഡ ഫാബിയയുടെ കോക്പിറ്റ് വെളിപ്പെട്ടു

ചിത്രങ്ങളിലൂടെ നീങ്ങുക.

പാരിസ് മോട്ടോര്‍ഷോയിലാണ് സ്‌കോഡ ഫാബിയയുടെ ഭൗതികരൂപം നമുക്ക് കാണാന്‍ കഴിയുക. ഇത് ഒക്ടോബര്‍ മാസത്തില്‍ സംഭവിക്കും. പൂര്‍ണമായും മാറ്റങ്ങള്‍ക്ക് വിധേയമായിട്ടാണ് ഫാബിയ വരുന്നത് എന്നതിനാല്‍ ലോകത്തെമ്പാടുമുള്ള ആരാധകര്‍ ആകാംക്ഷയോടെയാണ് ഈ അവതരണത്തെ കാത്തിരിക്കുന്നത്.

പെട്രോള്‍-ഡീസല്‍ എന്‍ജിനുകളില്‍ സ്‌കോഡ ഫാബിയ വിപണിയിലെത്തും. സ്‌കോഡ പുതുതായി രൂപപ്പെടുത്തിയിട്ടുള്ള ശില്‍പഭാഷയിലാണ് ഫാബിയയുടെ 2015 മോഡല്‍ നിര്‍മിച്ചിട്ടുള്ളത്.

മുന്‍ പതിപ്പിനെ അപേക്ഷിച്ച് 2015 സ്‌കോഡ ഫാബിയ കൂടുതല്‍ സ്‌പോര്‍ടി സൗന്ദര്യം ഉള്‍ക്കൊള്ളുന്നുണ്ട്. ഹെഡ്‌ലാമ്പുകള്‍, ഫ്രണ്ട് ഗ്രില്‍, ഫോഗ് ലാമ്പുകള്‍, ഹൂഡ് എന്നിവ കാര്യമായ ഡിസൈന്‍ മാറ്റത്തിന് വിധേയമായിട്ടുണ്ട്. ഇക്കാരണത്താല്‍ ഫാബിയയുടെ മുഖച്ഛായ വലിയതോതില്‍ മാറിയിരിക്കുന്നു. സ്‌കോഡയുടെ ശില്‍പഭാഷയുടെ അടിസ്ഥാന തീം നിലനിര്‍ത്തിക്കൊണ്ടാണ് മാറ്റങ്ങളെല്ലാം വരുത്തിയിരിക്കുന്നത്.

ഫാബിയയുടെ പിന്‍വശവും കാര്യമായ മാറ്റങ്ങള്‍ക്ക് വിധേയമായിരിക്കുന്നതായി കാണാം. നീല വര്‍ണപദ്ധതിയിലുള്ള മോഡലാണ് സ്‌കോഡ അവതരണത്തിനായി തെരഞ്ഞെടുത്തിട്ടുള്ളത്. വാഹനത്തിന് ഏറ്റവും ചേരുന്ന നിറമായിത്തന്നെ അനുഭവപ്പെടുന്നുണ്ട്.

ഇന്ത്യയില്‍ ഈ വാഹനത്തിന് 5 ലക്ഷത്തിനും 9 ലക്ഷത്തിനുമിടയില്‍ വിലയുണ്ടായിരിക്കും. ഫിയറ്റ് പൂന്തോ ഇവോ, ഫോക്‌സ്‌വാഗണ്‍ പോളോ, ഹ്യൂണ്ടായ് ഐ20, മാരുതി സുസൂക്കി സ്വിഫ്റ്റ് എന്നീ മോഡലുകളാണ് ഫാബിയയ്ക്ക് എതിരാളികളായിട്ടുള്ളത്.

സ്‌കോഡ ഫാബിയുടെ കോക്പിറ്റിന്റെ ഡിസൈനില്‍ ലാളിത്യം കൊണ്ടുവരാന്‍ ശ്രമിച്ചിട്ടുള്ളതായി കാണാം. ഡയലുകള്‍ കാഴ്ചയ്ക്ക് സൗകര്യത്തിന് വലിപ്പത്തില്‍ തന്നെ നല്‍കിയിട്ടുണ്ട്. സ്‌കോഡയുടെ ക്ലാസിക് ഡിസൈന്‍ ശൈലിയോട് നീതി പുലര്‍ത്തിക്കൊണ്ടു തന്നെ ആധുനിക ഡിസൈന്‍ സൗന്ദര്യം പകരാന്‍ സാധിച്ചിരിക്കുന്നു. മൂന്ന് ആരങ്ങളുള്ളതാണ് സ്റ്റീയറിങ് വീല്‍.

മൊബൈല്‍ ആപ്ലിക്കേഷനുകളുടെ ഡിസ്‌പ്ലേ കാറിന്റെ ഇന്‍ഫോടെയ്ന്‍മെന്റ് സിസ്റ്റത്തിന്റെ ഡിസ്‌പ്ലേയില്‍ ലഭ്യമാകുന്ന തരത്തിലാണ് സ്‌കോഡയുടെ മിറര്‍ലിങ്ക് സാങ്കേതികതയുടെ ക്രമീകരണം. സ്മാര്‍ഫോണ്‍ മിറര്‍ലിങ്കുമായി കണക്ട് ചെയ്യുന്നത് യുഎസ്ബി വഴിയാണ്. പുതിയ സ്‌കോഡ ഫാബിയയില്‍ പതിനേഴോളം മാറ്റങ്ങള്‍ വരുത്തിയിട്ടുണ്ടെന്ന് കമ്പനി പറയുന്നു.