ബിഎംഡബ്ല്യു എക്സ്പീരിയന്‍സ് ടൂര്‍ കൊച്ചിയില്‍

ബിഎംഡബ്ല്യുവിന്‍റെ സെഡാന്‍ എസ്എവി (സ്‌പോര്‍ട്‌സ് ആക്റ്റിവിറ്റി വെഹിക്കിള്‍) എന്നീ വാഹനവിഭാഗങ്ങളിലെ മുഴുവന്‍ വാഹനങ്ങളും അവതരിപ്പിക്കുന്ന വിധത്തിലാണ് ബിഎംഡബ്ല്യു എക്‌സ്പീരിയന്‍സ് ടൂര്‍ 2014 രൂപകല്‍പ്പന ചെയ്തിട്ടുള്ളത്. ഈ ടെസ്റ്റില്‍ വാഹനങ്ങളുടെ ഉയര്‍ന്ന പ്രകനശേഷി പ്രദര്‍ശിപ്പിക്കുകയാണ് ലക്ഷ്യം. കമ്പനിയുടെ ഭാവി ഉപഭോക്താക്കളെ ലാക്കാക്കിയാണ് ഈ ടൂര്‍ സംഘടിപ്പിച്ചിട്ടുള്ളത്.

വെല്ലുവിളി നിറഞ്ഞ സാഹചര്യങ്ങളില്‍ ബിഎംഡബ്ല്യു കാറുകള്‍ എത്രത്തോളം മികവ് പ്രകടിപ്പിക്കുന്നു എന്ന് നേരിട്ട് അനുഭവിച്ചറിയാം എന്നതാണ് ഈ പരിപാടിയുടെ പ്രത്യേകത. ഇത്തരമൊരു പരിപാടി കേരളത്തില്‍ സംഘടിപ്പിക്കാന്‍ കഴിഞ്ഞതിന്‍റെ സന്തോഷം പങ്കുവെക്കുന്നു ബിഎംഡബ്ല്യു ഗ്രൂപ്പ് ഇന്ത്യ പ്രസിഡന്റ് ഫിലിപ്പ് വോണ്‍ സഹര്‍. ഈ സംരംഭത്തിലൂടെ, ഉപഭോക്താക്കളുമായി കൂടുതല്‍ അടുക്കാനും ബിഎംഡബ്ല്യു കുടുംബത്തിലേക്ക് കൂടുതല്‍ ഉപഭോക്താക്കളെ അടുപ്പിക്കാനും സാധിക്കുമെന്നാണ് കരുതുന്നതെന്ന് അദ്ദേഹം വ്യക്തമാക്കി.

കൊച്ചി, ജയ്പ്പൂര്‍, ചണ്ഡിഗഡ്, ഗുഡ്ഗാവ്, അഹമ്മദാബാദ്, പുനെ, മുംബൈ, ചെന്നൈ, ഹൈദരാബാദ്, ബാംഗ്ലൂര്‍, ലക്‌നൗ, ഡല്‍ഹി എന്നീ 12 നഗരങ്ങളിലാണ് ടൂര്‍ എത്തുക. ഈ വിപണികളിലെ ഉപഭോക്താക്കള്‍ക്ക് ബിഎംഡബ്ല്യു ബ്രാന്‍ഡിനെ അനുഭവിച്ചറിയാനും വാഹനങ്ങള്‍ ടെസ്റ്റ് ഡ്രൈവ് നടത്താനും വിദഗ്ധരുമായി ആശയവിനിമയം നടത്താനുമുള്ള കിടിലന്‍ അവസരമാണിത്.

സെഡാനുകള്‍ക്കും എസ്എവി (സ്‌പോര്‍ട്‌സ് ആക്റ്റിവിറ്റി വെഹിക്കിള്‍) കള്‍ക്കുമായി പ്രത്യേകമായ സെഷനുകള്‍ ഈ പ്രോഗാമിലുണ്ടായിരിക്കും. ബിഎംഡബ്ല്യു 1 സീരീസ്, ബിഎംഡബ്ല്യു 3 സീരീസ്, ബിഎംഡബ്ല്യു 5 സീരീസ്, ബിഎംഡബ്ല്യു 7 സീരീസ് എന്നിവ ഉപഭോക്താക്കള്‍ക്ക് ഡ്രൈവ് ചെയ്യാവുന്നതാണ്. ബിഎംഡബ്ല്യു എം കാറുകള്‍ ഡ്രൈവ് ചെയ്യാനുള്ള അവസരവും ഈ പരിപാടിയില്‍ ഉപഭോക്താക്കള്‍ക്ക് ലഭിക്കും.

സ്ത്രീകള്‍ക്കും കുട്ടികള്‍ക്കും വേണ്ടിയുള്ള പ്രത്യേക സോണ്‍ വിനോദ വേളയൊരുക്കും. കുട്ടികള്‍ക്കുള്ള വിഭാഗത്തില്‍ ഒരു പ്രത്യേക 'സോണി പ്ലേസ്റ്റേഷന്‍ സോണ്‍' ഉണ്ടായിരിക്കും. സോണിപ്ലേസ്റ്റേഷന്‍ 3 ഉപയോഗിച്ച് ബിഎംഡബ്ല്യു കാറുകളുടെ ഡ്രൈവിംഗ് ആസ്വദിക്കാന്‍ കുട്ടികള്‍ക്ക് ഇത് അവസരം നല്‍കും.