മൂന്നാംതലമുറ എക്‌സ്5 ഇന്ത്യയിലേക്ക് പുറപ്പെട്ടു

മൂന്നാം തലമുറ ബിഎംഡബ്ല്യു എക്‌സ്5 ഇന്ത്യന്‍ വിപണിയിലേക്ക് പുറപ്പെട്ടു. മെയ് 29നാണ് വാഹനം രാജ്യത്തിന്റെ നിരത്തുകളിലേക്ക് എത്തിച്ചേരുക എന്നറിയുന്നു.

മുന്‍പതിപ്പിനെ അപേക്ഷിച്ച് നിരവധി ഗുണഗണങ്ങളോടെയാണ് ബിഎംഡബ്ല്യൂ എക്‌സ്5-ന്റെ പുതിയ പതിപ്പ് വരുന്നത്. വാഹനത്തിന്റെ ഭാരത്തില്‍ വലിയതോതില്‍ കുറവ് വന്നിട്ടുണ്ട്. 7 സീറ്റര്‍, 5 സീറ്റര്‍ ഓപ്ഷനുകളില്‍ വാഹനം വിപണിയിലെത്തും.

ബിഎംഡബ്ല്യു എക്‌സ്5 മോഡലിന്റെ ബുക്കിംഗ് ഇതിനകം തന്നെ തുടങ്ങിയിട്ടുണ്ടെന്നറിയുന്നു.

ഫെബ്രുവരിയില്‍ നടന്ന ഇന്ത്യന്‍ ഓട്ടോ എക്‌സ്‌പോയിലാണ് ബിഎംഡബ്ല്യു എക്‌സ്5 മോഡലിന്റെ പുതുക്കിയ പതിപ്പ് അവതരിപ്പിക്കപ്പെട്ടത്.

3 ലിറ്റര്‍ ശേഷിയുള്ളതും 2 ലിറ്റര്‍ ശേഷിയുള്ളതുമായ രണ്ട് ഡീസല്‍ എന്‍ജിനുകളാണ് പുതിയ ബിഎംഡബ്ല്യു എക്‌സ്5ല്‍ ഘടിപ്പിക്കുക. 3 ലിറ്റര്‍ എന്‍ജിന്‍ 258 കുതിരകളുടെ കരുത്ത് ഉല്‍പാദിപ്പിക്കുമ്പോള്‍, 2 ലിറ്റര്‍ പതിപ്പ് 218 കുതിരശക്തി പുറത്തെടുക്കുന്നു.

ഇന്ത്യയിലേക്ക് ഘടകഭാഗങ്ങളെത്തിച്ച് ചെന്നൈയിലെ ബിഎംഡബ്ല്യു പ്ലാന്റില്‍ വെച്ച് അസംബ്ള്‍ ചെയ്യുകയാണ് ചെയ്യുക. വാഹനം 2014 ജൂലൈ മാസം മുതല്‍ ഡെലിവറി ചെയ്തു തുടങ്ങുമെന്ന് പ്രതീക്ഷിക്കപ്പെടുന്നു.

ബേസ് വേരിയന്റിന് 68 ലക്ഷത്തിന്റെ പരിസരത്തായിരിക്കും വില. ഏറ്റവുമുയര്‍ന്ന 7 സീറ്റര്‍ മോഡലിന് 72 ലക്ഷം രൂപയുടെ പരിസരത്തില്‍ വില കാണും.