പുതുക്കിയ ഫോഡ് ഫിഗോ ലോഞ്ച് ചെയ്തു

പുതുക്കിയ ഫോഡ് ഫിഗോ ഹാച്ച്ബാക്ക് ബ്രസീല്‍ വിപണിയില്‍ ലോഞ്ച് ചെയ്തു. കാ എന്ന പേരില്‍ വിവിധ ലോകവിപണിയില്‍ വിറ്റഴിക്കുന്ന ഫിഗോ ഹാച്ച്ബാക്ക് പുതുക്കാനുള്ള തങ്ങളുടെ തീരുമാനം 2014 ആദ്യത്തിലാണ് ഫോഡ് വെളിപ്പെടുത്തിയത്. ഈ വാഹനം ഇന്ത്യയിലേക്ക് 2015ല്‍ എത്തിച്ചേരുമെന്ന് പ്രതീക്ഷിക്കുന്നു.

എസ്ഇ, എസ്ഇഎല്‍ എന്നിങ്ങനെ രണ്ട് ഓപ്ഷനുകളിലാണ് ഫ്‌ഗോ ഹാച്ച്ബാക്ക് ബ്രസീലില്‍ വില്‍ക്കുക. ബേസ് വേരിയന്റായ എസ്ഇ-യുടെ വില ഇന്ത്യന്‍ നിലവാരത്തിലേക്കു മാറ്റിയാല്‍ 9,52,37 രൂപ എന്ന് ലഭിക്കും. ഉയര്‍ന്ന പതിപ്പായ എസ്ഇഎലിന് 10,76,164 രൂപയാണ് വില.

2015 ആദ്യമാസങ്ങളില്‍ തന്നെ ഈ വാഹനത്തിന്റെ ഇന്ത്യന്‍ വരവ് പ്രതീക്ഷിക്കാവുന്നതാണ്. ഇതിനുശേഷമായിരിക്കും ഫിഗോയുടെ സെഡാന്‍ പതിപ്പ് രാജ്യത്തെത്തുക.

2014 ഫിഗോ മോഡലില്‍ 1.3 ലിറ്റര്‍ ശേഷിയുള്ള ഒരു 3 സിലിണ്ടര്‍ പെട്രോള്‍ എന്‍ജിനാണുള്ളത്. 85 കുതിരശക്തിയും 107 എന്‍എം ചക്രവീര്യവും ഉല്‍പാദിപ്പിക്കാന്‍ കഴിവുണ്ട് ഈ എന്‍ജിന്. 5 സ്പീഡ് മാന്വല്‍ ഗിയര്‍ബോക്‌സാണ് എന്‍ജിനോട് ഘടിപ്പിച്ചിരിക്കുന്നത്.

ഇന്ത്യയിലെത്താനിരിക്കുന്ന പുതുക്കിയ ഫിഗോയില്‍ സാങ്കേതികമായ മാറ്റങ്ങളൊന്നുമുണ്ടാവില്ല. സൗന്ദര്യപരമായ മാറ്റങ്ങള്‍ അകത്തും പുറത്തുമുണ്ടായിരിക്കും. 2014 ഇന്ത്യന്‍ എക്‌സ്‌പോയില്‍ അവതരിപ്പിച്ച ഫിഗോ കണ്‍സെപ്റ്റില്‍ നിന്നു സ്വീകരിച്ച ചില ശില്‍പപരമായ മാറ്റങ്ങളായിരിക്കും വാഹനത്തിലുണ്ടാവുക.