ഹോണ്ട അമേസിന്റെ ഇന്ത്യന്‍ സഞ്ചാരം ബങ്കളുരുവിലെത്തി

അമേസ് സെഡാനുമായി ഹോണ്ട നടത്തുന്ന 'ലോങ്ങസ്റ്റ് ഡ്രൈവ് അമേസിങ് ഇന്ത്യ' ബങ്കളുരുവിലെത്തി. പശ്ചിമബംഗാള്‍, ഒഡിഷ, ആന്ധ്രപ്രദേശ് എന്നിവിടങ്ങള്‍ പിന്നിട്ടാണ് ഈ യാത്ര കര്‍ണാടകത്തിലെത്തിയിരിക്കുന്നത്.

സെപ്തംബര്‍ 15ന് ജോധ്പൂരില്‍ നിന്നാണ് അമേസിന്റെ യാത്ര തുടങ്ങുന്നത്. രാജ്യത്ത് 23,000 കിലോമീറ്റര്‍ സഞ്ചരിക്കുവാനാണ് അമേസിന്റെ പദ്ധതി. ബങ്കളുരുവിലെത്തുമ്പോള്‍ ആകെ 14,500 കിലോമീറ്റര്‍ പിന്നിട്ടിട്ടുണ്ട്.

ദില്ലിയിലെ ഗ്രെയ്റ്റര്‍ നോയ്ഡയിലാണ് ഈ യാത്ര അവസാനിക്കുക.

ഇന്ത്യയില്‍ ഡീസല്‍ കാര്‍ വിഭാഗത്തിലേക്ക് ഹോണ്ട കയറുന്നത് അമേസ് സെഡാനിലൂടെയാണ്. വാഹനം സെഗ്മെന്റില്‍ വന്‍ ഹിറ്റായി മാറിയിട്ടുണ്ട്. ഇതിനകം തന്നെ അമേസിന്റെ വില്‍പന 1 ലക്ഷത്തിലെത്തി.

1.5 ലിറ്റര്‍ ശേഷിയുള്ള ഐ-ഡിടെക് ഡീസല്‍ എന്‍ജിനാണ് അമേസിലുള്ളത്. ഇന്ത്യയിലെത്തിച്ചേരുന്ന ആദ്യത്തെ ഹോണ്ട ഡീസല്‍ എന്‍ജിനാണിത്. 25.8 കിലോമീറ്റര്‍ മൈലേജ് പകരാന്‍ ഈ എന്‍ജിന് സാധിക്കുന്നു.

ഇതേ എന്‍ജിന്‍ തന്നെയാണ് സിറ്റി സെഡാനിലും ചേര്‍ത്തിരിക്കുന്നത്. 26 കിലോമീറ്റര്‍ മൈലേജ് നല്‍കാന്‍ ട്യൂണിംഗ് വ്യതിയാനം വരുത്തിയ ഈ എന്‍ജിന് ശേഷിയുണ്ട്.