മാരുതി സ്റ്റിംഗ്രേ മോഡലില്‍ സെമി ഓട്ടോമാറ്റിക് ചേര്‍ക്കുന്നു

ചിത്രങ്ങളിലൂടെ നീങ്ങുക

വാഗണ്‍ ആറിന്റെ അതേ സൗകര്യമുള്ള വാഹനത്തില്‍ സെമി ഓട്ടോമാറ്റിക് ഗിയര്‍ബോക്‌സ് ഘടിപ്പിക്കുമ്പോള്‍ സ്വാഭാവികമായും കുറെയധികം പേരെ സ്റ്റിംഗ്രേയിലേക്കാകര്‍ഷിക്കാന്‍ സാധിച്ചേക്കും. അതെസമയം, സ്റ്റിംഗ്രേയുടെ ബോക്‌സി ഡിസൈന്‍ ഒരു പ്രശ്‌നം തന്നെയാണ് ഇന്ത്യക്കാരെ സംബന്ധിച്ച് എന്നതും കാണണം.

ഈയിടെയാണ് ആള്‍ട്ടോ കെ10 മോഡലില്‍ സെമി ഓട്ടോമാറ്റിക് ഘടിപ്പിച്ച് മാരുതി വിപണിയെത്തിച്ചത്. നേരത്തെ വിപണിയിലെത്തിയ സെലെരിയോ സെമി ഓട്ടോമാറ്റിക് പതിപ്പിന് ഉയര്‍ന്ന കാത്തിരിപ്പുസമയമാണുള്ളത്. ആള്‍ട്ടോ കെ10 സെമി ഓട്ടോമാറ്റിക്കിനുമുണ്ട് ഒന്നര മാസത്തോളം കാത്തിരിപ്പ്. സമാനമായ തോതിലല്ലെങ്കിലും തരക്കേടില്ലാത്ത തോതില്‍ ആവശ്യക്കാര്‍ സ്റ്റിംേ്രഗ ഓട്ടോമാറ്റിക്കിനും വരുമെന്നാണ് പ്രതീക്ഷ.

ഇറ്റാലിയന്‍ കമ്പനിയായ മാഗ്നറ്റി മാരെല്ലിയാണ് സെമി ഓട്ടോമാറ്റിക് ട്രാന്‍സ്മിഷനുകള്‍ നിര്‍മിച്ച് വിപണിയിലെത്തിക്കുന്നത്. മാഗ്നറ്റിയില്‍ നിന്നും ട്രാന്‍സ്മിഷന്‍ സിസ്റ്റം നിര്‍മിച്ചു കിട്ടുന്നതിനുള്ള കാലതാമസം മാരുതി കാറുകളുടെ ഡെലിവറിയെ ബാധിക്കുന്നുണ്ട്. ഇന്ത്യയില്‍ പ്ലാന്റ് തുടങ്ങി ഈ പ്രശ്‌നം പരിഹരിക്കാന്‍ കമ്പനി ശ്രമിച്ചുവരികയാണിപ്പോള്‍.

മാസത്തില്‍ സെലെരിയോ മോഡലിനു മാത്രമായി 3,500 സെമി ഓട്ടോമാറ്റിക് കിറ്റുകള്‍ മാഗ്നറ്റി നല്‍കുന്നുണ്ട്. ഇത് മാസത്തില്‍ അയ്യായിരമാക്കി ഉയര്‍ത്താന്‍ മാരുതി ആവശ്യപ്പെട്ടിട്ടുണ്ട്. ഫിയറ്റിന്റെ ഉടമസ്ഥതയിലുള്ളതാണ് ഈ കമ്പനി.

നിലവില്‍ പെട്രോള്‍ പതിപ്പുകള്‍ മാത്രമേ സ്റ്റിംഗ്രേക്കുള്ളൂ. ദില്ലി എക്‌സ്‌ഷോറൂം നിരക്ക് പ്രകാരം 4.01 ലക്ഷം രൂപയില്‍ വിലതുടങ്ങുന്നു ഈ വാഹനത്തിന്. 4.56 ലക്ഷം രൂപയിലാണ് വിലകളവസാനിക്കുന്നത്. എആര്‍എഐ സാക്ഷ്യപ്പെടുത്തുന്നതു പ്രകാരം ലിറ്ററിന് 20.51 കിലോമീറ്റര്‍ മൈലേജുണ്ട് വാഹനത്തിന്.