പോഷെ മകാന്‍ ഇന്ത്യയിലേക്ക്

പോഷെയുടെ മകാന്‍ സ്‌പോര്‍ട്‌സ് എസ്‌യുവി ഇന്ത്യന്‍ നിരത്തിലെത്തുമെന്ന് റിപ്പോര്‍ട്ടുകള്‍. നടപ്പ് വര്‍ഷത്തിന്റെ പകുതി പിന്നിട്ടതിനു ശേഷമായിരിക്കും വാഹനം ഇന്ത്യയില്‍ ലോഞ്ച് ചെയ്യുക.

2013 ലോസ് ആഞ്ജലസ് മോട്ടോര്‍ ഷോയിലാണ് ഈ വാഹനം ആദ്യമായി പ്രദര്‍ശിപ്പിക്കപ്പെട്ടത്. മകാനിന് ഇന്ത്യയില്‍ 70 ലക്ഷം മുതല്‍ 1.2 കോടിവരെ വിലവരുമെന്നാണ് ഊഹിക്കപ്പെടുന്നത്.

മകാന്‍ സ്‌പോര്‍ട്‌സ് കാര്‍ നിലകൊള്ളുന്നത് ഓഡി ക്യു5 പ്ലാറ്റ്‌ഫോമിലാണ്. പെട്രോള്‍, ഡീസല്‍ എന്‍ജിനുകള്‍ ഘടിപ്പിച്ച് ഈ വാഹനം ഇന്ത്യന്‍ നിരത്തുകളിലെത്തും. മകാന്റെ 3 ലിറ്റര്‍ ശേഷിയുള്ള വി6 ഡീസല്‍ എന്‍ജിന്‍ 258 പിഎസ് കരുത്ത് പകരുന്നതാണ്. മണിക്കൂറില്‍ 100 കിലോമീറ്റര്‍ എന്ന വേഗത പിടിക്കാന്‍ 4.8 സെക്കന്‍ഡെടുക്കും വാഹനം.

400 പിഎസ് കരുത്തു പകരുന്നുണ്ട് മകാനിന്റെ പെട്രോള്‍ എന്‍ജിന്‍. മണിക്കൂറില്‍ 100 കിമി പിടിക്കാന്‍ ഈ എന്‍ജിനും 4.8 സെക്കന്‍ഡ് നേരമെടുക്കുന്നു.

ഇന്ത്യയില്‍ നേരത്തെയെത്തിയ കായേന്‍ എസ് യുവി മികച്ച പ്രകടനമാണ് നടത്തുന്നത്. രാജ്യത്ത് ഏറ്റവുമധികം വിറ്റുപോകുന്ന പോഷെ വാഹനമാണ് ഇന്നിത്. മകാന്‍ എസ് യുവിയും ഇന്ത്യയില്‍ തരക്കേടില്ലാത്ത വില്‍പന കണ്ടെത്തുമെന്നാണ് കരുതപ്പെടുന്നത്.