മൂന്ന് മോഡുകളില്‍ ഡസ്റ്റര്‍ ഫോര്‍വീല്‍ ഡ്രൈവ്

റിനോയുടെ 110 കുതിരശക്തി പകരുന്ന ഡീസല്‍ എന്‍ജിനോടൊപ്പമായിരിക്കും ഫോര്‍വീല്‍ ഡ്രൈവ് സിസ്റ്റം ഘടിപ്പിക്കുക. 6 സ്പീഡ് മാന്വല്‍ ഗിയര്‍ബോക്‌സ് എന്‍ജിന്‍ കരുത്ത് ചക്രങ്ങളിലെത്തിക്കും.

നിസ്സാന്‍ എസ്‌യുവിയില്‍ ചേര്‍ത്തിരുന്ന അതേ ഫോര്‍വീല്‍ സിസ്റ്റമാണ് ഡസ്റ്ററിലും ചേര്‍ക്കുക എന്നാണറിയുന്നത്. ഡസ്റ്റര്‍ ഫോര്‍വീല്‍ ഡ്രൈവ് വിപണിയിലെത്തുന്നതിനു പിന്നാലെ നിസ്സാന്‍ ടെറാനോയുടെ ഫോര്‍വീല്‍ പതിപ്പും വിപണിയിലെത്തും.

മൂന്ന് ഡ്രൈവിങ് മോഡുകളില്‍ ഡസ്റ്റര്‍ ഫോര്‍വീല്‍ ഡ്രൈവ് സിസ്റ്റം പ്രവര്‍ത്തിപ്പിക്കാവുന്നതാണ്. ഫ്രണ്ട് വീലുകളിലേക്കു മാത്രം കരുത്ത് പകരുന്ന തരത്തിലായിരിക്കും ഇവയിലൊന്ന്. ഇന്ധനക്ഷമത കൂടുതല്‍ പകരാന്‍ ഈ മോഡിലിരിക്കുമ്പോള്‍ വാഹനത്തിന് സാധിക്കും. മറ്റൊന്ന് ഓട്ടോ മോഡാണ്. ഈ മോഡില്‍ ഓരോ വീലിനും ആവശ്യമായ ചക്രവീര്യം പ്രത്യേകമായി പകരുന്നു. ഇതിനായി ഒരു കമ്പ്യൂട്ടര്‍ സംവിധാനം ചേര്‍ത്തിട്ടുണ്ട്. ഒടുവിലത്തേത് ലോക്ക് മോഡാണ്. ഇത് 'ആള്‍വീല്‍ ഡ്രൈവ്' സംവിധാനമാണ്. എല്ലാ വീലുകളിലേക്കും തുല്യമായ ടോര്‍ക്ക് അഥവാ ചക്രവീര്യം ചെല്ലുന്നു.

റിനോയുടെ 1.5 ലിറ്റര്‍ ഡീസലെഞ്ചിനാണ് വാഹനത്തില്‍ ഘടിപ്പിക്കുന്നത്. 3900 ആര്‍പിഎമ്മില്‍ 110 കുതിരശക്തി പകരുന്നു ഈ എന്‍ജിന്‍. 2250 ആര്‍പിഎമ്മില്‍ 248 എന്‍എം ചക്രവീര്യം ഉല്‍പാദിപ്പിക്കാനും ഈ എന്‍ജിനാകും. പ്രീമിയം നിലവാരത്തിലായിരിക്കും ഫോര്‍വീല്‍ ഡ്രൈവ് പതിപ്പ് വരിക എന്നു പ്രതീക്ഷിക്കാം. ഡസ്റ്ററിന്റെ ആര്‍എക്‌സ്എല്‍ വേരിയന്റിലുള്ള മിക്ക സവിശേഷതകളും ഈ വേരിയന്റിലുണ്ടാകാം.

വാഹനത്തെ കുറെക്കൂടി സ്‌പോര്‍ടി ശരീരഭാഷയുള്ളതാക്കുന്നതിന് ഫോര്‍വീല്‍ ഡ്രൈവ് ഡസ്റ്ററില്‍ ചില മാറ്റങ്ങളുണ്ടായേക്കും. ഡസ്റ്റര്‍ അഡ്വഞ്ചര്‍ പതിപ്പില്‍ കാണുന്നപോലുള്ള സൈഡ് ക്ലാഡിങ്ങുകളും ഫ്രണ്ട് ബംപര്‍ പ്രൊട്ടക്ടറുകളും എക്‌സ്ട്രാ ലാമ്പുകളുമെല്ലാം ഇതിലുണ്ടായേക്കാം.