സാങ്‌യോങ് എക്‌സ്100 ജനുവരിയില്‍ വിപണിയിലെത്തും

സാങ്‌യോങ് എക്‌സ്100 ചെറു എസ്‌യുവി കൊറിയന്‍ വിപണിയില്‍ 2015 ജനുവരിയില്‍ ലോഞ്ച് ചെയ്യുമെന്ന് റിപ്പോര്‍ട്ടുകള്‍. ഈ വാഹനത്തെ മഹീന്ദ്ര ഇന്ത്യയിലെത്തിച്ചേക്കുമെന്ന് സ്ഥിരീകരിക്കാത്ത റിപ്പോര്‍ട്ടുകള്‍ നേരത്തെ വന്നിരുന്നു. യൂറോപ്പിലും ആസ്‌ട്രേലിയയിലും ഈ വാഹനം എത്തിച്ചേരുമെന്ന് ഇതിനകം തന്നെ ഉറപ്പായിട്ടുണ്ട്.

ഫോഡ് ഇക്കോസ്‌പോര്‍ട് അടക്കമുള്ള വാഹനങ്ങളോട് എതിരിടുന്ന എന്‍ട്രി ലെവല്‍ എസ്‌യുവിയാണ് സാങ്‌യോങ് എക്‌സ്100. ഈ വാഹനത്തിന്റെ കണ്‍സെപ്റ്റ് കഴിഞ്ഞയാഴ്ച നടന്ന പാരിസ് മോട്ടോര്‍ ഷോയില്‍ അവതരിപ്പിക്കപ്പെട്ടിരുന്നു.

സാങ്‌യോങ് എക്‌സ്100ന്റെ ഉല്‍പാദനപ്പതിപ്പ് ഇതുവരെ പുറത്തുവന്നിട്ടില്ല. ലഭ്യമായ വിവരങ്ങള്‍ പറയുന്നത് കണ്‍സെപ്റ്റ് പതിപ്പിന്റെ 90 ശതമാനം സവിശേഷതകളും ഉല്‍പ്പാദനപ്പതിപ്പിലുണ്ടായിരിക്കുമെന്നാണ് അറിയുന്നത്.

1.6 ലിറ്റര്‍ ശേഷുയുള്ള പെട്രോള്‍-ഡീസല്‍ എന്‍ജിനുകളായിരിക്കും സാങ്‌യോങ് എക്‌സ്100ല്‍ ഉണ്ടായിരിക്കുക എന്നൂഹിക്കപ്പെടുന്നുണ്ട്. 6 സ്പീഡ് ഓട്ടോമാറ്റിക്-മാന്വല്‍ ട്രാന്‍സ്മിഷനുകളും വാഹനത്തിലുണ്ട്. ഫോര്‍വീല്‍ഡ്രൈവിലും ഈ എസ്‌യുവി ലഭ്യമാകും.

ഏഴ് എയര്‍ബാഗുകള്‍, ഹില്‍ അസിസ്റ്റ്, ഡ്യുവല്‍ സോണ്‍ ക്ലൈമറ്റ് കണ്‍ട്രോള്‍, റിവേഴ്‌സ് കാമറ, ബ്ലൂടൂത്ത് കണക്ടിവിറ്റി തുടങ്ങിയ സന്നാഹങ്ങള്‍ യൂറോപ്യന്‍ സാങ്‌യോങ് എക്‌സ്100ല്‍ ഉണ്ടായിരിക്കും. അന്താരാഷ്ട്രവിപണിയില്‍ ഫോഡ് ഇക്കോസ്‌പോര്‍ട്, ഹ്യൂണ്ടായ് ഐഎക്‌സ്25 തുടങ്ങിയ മോഡലുകളുമായി മത്സരിക്കും.