ആഗോളതലത്തില്‍ ഫോക്‌സ്‌വാഗണ്‍ വന്‍ വളര്‍ച്ച നേടി

ജനുവരി മുതല്‍ മെയ് വരെയുള്ള കാലയളവില്‍ ഫോക്‌സ്‌വാഗണ്‍ ഗ്രൂപ്പ് ലോകത്തെമ്പാടുമായി 4.11 ദശലക്ഷം വാഹനങ്ങള്‍ വിറ്റഴിച്ചു. ഫോക്‌സ്‌വാഗണ്‍ ഗ്രൂപ്പിന്റെ വളര്‍ച്ചാശതമാനത്തെ 6.3 ശതമാനമായി ഉയര്‍ത്തിയ ഈ പ്രകടനം ഈയടുത്തകാലത്തെ ഏറ്റവും മികച്ചതാണ്.

കമ്പനി മൊത്തം 864,600 വാഹനങ്ങള്‍ ജനുവരി മുതലുള്ള അഞ്ച് മാസക്കാലയളവില്‍ വിറ്റഴിച്ചിട്ടുണ്ട്. വില്‍പനാവളര്‍ച്ചയുടെ ശതമാനം 5.9 ശതമാനമാണ്.

യൂറോപ്പില്‍ ഫോക്‌സ്‌വാഗണ്‍ ഗ്രൂപ്പിനു കീഴിലുള്ള ബ്രാന്‍ഡുകളെല്ലാം ചേര്‍ന്ന് മൊത്തം 1.64 ദശലക്ഷം വാഹനങ്ങള്‍ വിറ്റു. ഇതില്‍ പടിഞ്ഞാറന്‍ യൂറോപ്പില്‍ മാത്രം 502,200 വാഹനങ്ങളാണ് വിറ്റത്. കിഴക്കന്‍ യൂറോപ്പില്‍ 274,000 വാഹനങ്ങള്‍ വില്‍ക്കാന്‍ ഗ്രൂപ്പിനു സാധിച്ചു.

റഷ്യയില്‍ മാത്രമാണ് ഫോക്‌സ്‌വാഗന് പിഴച്ചത്. ഫോക്‌സ്‌വാഗണ്‍ വിറ്റത് 113,800 വാഹനങ്ങളാണ്. ഇത് കഴിഞ്ഞ വര്‍ഷത്തെ അപേക്ഷിച്ച് 5.8 ശതമാനത്തിന്റെ ഇടിവാണ്. വിപണിയില്‍ പൊതുവില്‍ നിലനില്‍ക്കുന്ന ഇടിവ് കമ്പനിയുടെ വില്‍പനയെയും ബാധിച്ചു.

അമേരിക്കന്‍ നാടുകളില്‍ മികച്ച മുന്നേറ്റമാണ് ഫോക്‌സ്‌വാഗണ്‍ നടത്തിയത്. 350,400 യൂണിറ്റാണ് നോര്‍ത്ത് അമേരിക്കയില്‍ വിറ്റത്. ലാറ്റിനമേരിക്കയില്‍ മൊത്തം 296,000 വാഹനങ്ങള്‍ വിറ്റു. ഇത് യഥാക്രമം 2.7 ശതമാനത്തിന്റെയും 4.6 ശതമാനത്തിന്റെയും വര്‍ധനയാണ്.

ഏഷ്യ-പസിഫിക് മേഖലയിലും മികച്ച വളര്‍ച്ചയാണ് ഫോക്‌സ്‌വാഗനുണ്ടായിട്ടുള്ളത്. 1.66 ദശലക്ഷം വാഹനങ്ങളാണ് ഇവിടങ്ങളില്‍ വിറ്റഴിച്ചത്. ചൈനയിലാണ് ഏറ്റവുമദികം വില്‍പനയുണ്ടായിട്ടുള്ളത്. 1.51 ദശലക്ഷം വാഹനങ്ങളാണ് ഇവിടെ മാത്രമായി വിറ്റത്. ഇത് 16.9 ശതമാനത്തിന്റെ വമ്പന്‍ വളര്‍ച്ചയാണെന്നതും ശ്രദ്ധിക്കണം.