ഷെവർലെ ട്രെയ്ൽബ്ലേസർ ആമസോണിൽ വിൽപനയ്ക്ക്

ട്രെയ്ൽബ്ലേസർ എസ്‌യുവിയുടെ ബുക്കിങ് ഒക്ടോബർ 21ന് തുടങ്ങും. ആമസോണിൽ ബുക്കിങ് നടത്താവുന്നതാണ്.

രാജ്യത്തെ ഷെവർലെ ഷോറൂമുകളിൽ നേരിട്ടും ബുക്കിങ് സ്വീകരിക്കുന്നുണ്ട്.

അന്താരാഷ്ട്രവിപണിയില്‍ വില്‍പനയിലുള്ള 2.8 ലിറ്റര്‍ ശേഷിയുള്ള ഡീസല്‍ ഡ്യൂറാമാക്സ് എന്‍ജിന്‍ ഘടിപ്പിച്ച ട്രെയില്‍ബ്ലേസറാണ്‌ ഇന്ത്യയിൽ വിൽക്കുക.

ഈ എന്‍ജിനോടൊപ്പം ഒരു 6 സ്പീഡ് ഓട്ടോമാറ്റിക് ട്രാന്‍സ്മിഷന്‍ ഘടിപ്പിച്ചിരിക്കുന്നു. 5 സ്പീഡ് മാന്വല്‍ ഗിയര്‍ബോക്‌സിലും വാഹനം ലഭിക്കും. 187 കുതിരശക്തിയും 470 എന്‍എം ചക്രവീര്യവുമാണ് എന്‍ജിന്‍ ഉല്‍പാദിപ്പിക്കുന്നത്.

ജനറല്‍ മോട്ടോഴ്‌സിന്റെ കോളൊറാഡോ പിക്കപ് ട്രക്കിനെ അടിസ്ഥാനമാക്കിയാണ് ട്രെയില്‍ബ്ലേസര്‍ എസ്‌യുവി നിര്‍മിച്ചിരിക്കുന്നത്. വാഹനത്തിന്റെ ബോഡ് ഫ്രെയിം മോണോകോക്ക് അല്ല.

4,878 മില്ലിമീറ്റര്‍ നീളവും 1,902 മില്ലിമീറ്റര്‍ വീതിയും 1,834 മില്ലിമീറ്റര്‍ ഉയരവും ട്രെയില്‍ബ്ലേസറിനുണ്ട്. ഏഴ് സീറ്റുകളായിരിക്കും വാഹനത്തില്‍ ഉണ്ടായിരിക്കുക. ആന്റി ലോക്ക് ബ്രേക്കിങ്, ഇബിഡി തുടങ്ങിയ സുരക്ഷാ സംവിധാനങ്ങള്‍ ഈ വാഹനത്തിലുണ്ടായിരിക്കും.

ഇന്ത്യയില്‍ വന്‍ മത്സരമാണ് ഷെവര്‍ലെ ട്രെയില്‍ബ്ലേസറിന് നേരിടാനുള്ളത്. ടൊയോട്ട ഫോര്‍ച്യൂണറിന്റെ ഏകാധിപത്യ വാഴ്ചയുള്ള സെഗ്മെന്റിലാണ് വാഹനം ഇരുപ്പുറപ്പിക്കേണ്ടത്. മിത്സുബിഷി പജീറോ, ഹ്യൂണ്ടായ് സാന്റ ഫെ, ഫോഡ് എന്‍ഡീവര്‍ എന്നിവയാണ് മറ്റ് എതിരാളികള്‍.