കൊടിയ വേഗവുമായി കൊയെനിഗ്‌സെഗ് റെഗെറ എത്തി

ഡയറക്ട് ഡ്രൈവ് എന്ന സാങ്കേതികത വഴിയാണ് റെഗറയില്‍ ഗിയര്‍ബോക്‌സ് ഒഴിവാക്കിയിരിക്കുന്നത്. ഈ സാങ്കേതികത, എന്‍ജിന്‍ കരുത്തിനെ നേരിട്ട് ചക്രങ്ങളിലെത്താന്‍ സഹായിക്കുന്നു. ഗുണം: കരുത്തും ചക്രവീര്യവും ഒട്ടും ചോരാതെ ചക്രങ്ങളിലേക്ക് പകരാന്‍ സാധിക്കുന്നു!

1,500 കുതിരശക്തിയും 2,000 എന്‍എം എന്ന കൊടിയ ടോര്‍ക്കും പകരുന്ന എന്‍ജിനാണ് റെഗെറയില്‍ ഘടിപ്പിച്ചിരിക്കുന്നത്.

റെഗെറ ഒരു ഹൈബ്രിഡ് കാറാണെന്നതും കൗതുകമുണര്‍ത്തുന്നുണ്ട്. കാര്‍ബണ്‍ ഫൈബര്‍ അടക്കമുള്ള ഭാരം കുറഞ്ഞ ദ്രവ്യങ്ങളുടെ സഹായത്താല്‍ റെഗെറയെ പരമാവധി ഭാരക്കുറവില്‍ നിര്‍മിക്കാന്‍ കൊയെനിഗ്‌സെഗ്ഗിന് സാധിച്ചിട്ടുണ്ട്. കാറിന്റെ പ്രകടനശേഷിയില്‍ ഇത് പ്രതിഫലിക്കുന്നുമുണ്ട്.

നേരത്തെ നമ്മള്‍ മനസ്സിലാക്കിയിരുന്ന പോലെ 5.0 ലിറ്റര്‍ ശേഷിയുള്ള വണ്‍:1 എന്‍ജിന്‍ തന്നെയാണ് റെഗെറയില്‍ ഘടിപ്പിച്ചിട്ടുള്ളത്. ഈ പെട്രോള്‍ എന്‍ജിന്‍ ഉല്‍പാദിപ്പിക്കുന്നത് 1,100 കുതിരശക്തിയാണ്. കൂടെയുള്ള മൂന്ന് ഇലക്ട്രിക് മോട്ടോറുകള്‍ 400 കുതിരശക്തിയും ഉല്‍പാദിപ്പിക്കുന്നു.

സ്വീഡിഷ് ഭാഷയില്‍ ആധിപത്യം എന്നാണ് റെഗെറ എന്ന വാക്കിനര്‍ഥം. പോഷെ 918 സ്‌പൈഡര്‍, മക്‌ലാറന്‍ പി1, ഫെരാരി ലാഫെരാരി എന്നിങ്ങനെയുള്ള കിടിലന്‍ സൂപ്പര്‍കാറുകളാണ് വിപണിയില്‍ കൊയെനിഗ്‌സെഗ്ഗിന് എതിരാളികളായി വരിക.

മണിക്കൂറില്‍ 150നും 250നും ഇടയില്‍ വേഗത പിടിക്കാന്‍ 3.2 സെക്കന്‍ഡ് നേരം മാത്രമേ ഈ വാഹനം എടുക്കൂ. ആകെ ഭാരം 1420 കിലോഗ്രാം ആണ്.