ടിയുവി 300: മഹീന്ദ്രയിൽ നിന്നുള്ള പുതിയ എസ്‌യുവി

മഹീന്ദ്രയിൽ നിന്നുള്ള പുതിയ എസ്‌യുവിയുടെ സ്കെച്ചുകൾ പുറത്തുവിട്ടു. ടിയുവി 300 എന്ന പേരിലാണ് ഈ വാഹനം അറിയപ്പെടുക. നേരത്തെ യു301 എന്ന ഒളിപ്പേരിൽ മഹീന്ദ്ര വികസിപ്പിച്ചെടുത്തുകൊണ്ടിരുന്ന വാഹനമാണിത്. ടിയുവി ത്രീ ഡബിൾ ഓ എന്നാണ് വാഹനത്തെ വിളിക്കേണ്ടത്. 300 എന്നത് സീരീസിന്റെ പേരാണ്.

യുദ്ധടാങ്കിന്റെ ഡിസൈനിൽ നിന്നും പ്രചോദനമുൾക്കൊണ്ടാണ് ടിയുവി 300 ഡിസൈൻ ചെയ്യപ്പെട്ടിരിക്കുന്നത്. സ്കെച്ചുകൾ വ്യക്തമാക്കുന്നതു പ്രകാരം, ഉയർന്ന ഗ്രൗണ്ട് ക്ലിയറൻസും മസിലൻ ശരീരവുമുള്ള വാഹനമാണിത്.

ഉൽപാദനപ്പതിപ്പ് ഈ കൺസെപ്റ്റ് ഡിസൈനിനോട് എത്രത്തോളം നീതി പുലർത്തുമെന്നത് കണ്ടറിയേണ്ടതുണ്ട്. സ്കെച്ചുകളെ മാത്രം വിലയിരുത്തുകയാണെങ്കിൽ വാഹനത്തെ കിടിലൻ എന്നുതന്നെ വിശേഷിപ്പിക്കണം.

മഹീന്ദ്ര പുതുതായി നിർമിച്ച പ്ലാറ്റ്ഫോമിലാണ് ടിയുവി 300 വരുന്നത്. പൂർണമായും ചെന്നൈയിലെ മഹീന്ദ്ര ഗവേഷണ-വികസന കേന്ദ്രങ്ങളിൽ വികസിപ്പിച്ചെടുത്തതാണ് ഈ വാഹനം. ഇന്ത്യൻ ഉപഭോക്താക്കൾ കൂടുതൽ മസിലൻ ശരീരമുള്ള വാഹനങ്ങളിലേക്ക് തിരിയുന്നത് മുന്നിൽകണ്ടാണ് ടിയുവി300 നിർമിക്കപെട്ടിട്ടുള്ളത്.

ആഗോളതലത്തിൽ വിൽപന നടത്താനുള്ള പദ്ധതികളോടെയാണ് ടിയുവി 300 നിർമിക്കപെട്ടിരിക്കുന്നത്. ഗുണനിലവാരം സുരക്ഷിതത്വം, കരിമ്പുക നിർഗമനം തുടങ്ങിയ കാര്യങ്ങളിൽ അന്തർദ്ദേശീയ നിലവാരത്തോടെയായിരിക്കും വാഹനം വരിക.