റെയ്‍ഞ്ച് റോവർ ഇവോക്ക് കൺവേർട്ടബിൾ 2016ലെ ഓട്ടോ എക്സ്പോയിൽ

ലോകത്തിലെ ആദ്യത്തെ കൺവേർട്ടബിൾ എസ്‌യുവി എന്ന് വിശേഷണം നൽകിയിട്ടുള്ള 'ഇവോക്ക് കൺവേർട്ടബിളിനെ' റെയ്‍ഞ്ച് റോവർ ഇന്ത്യൻ വിപണിയിൽ എത്തിക്കുന്നു. 2016 ഫെബ്രുവരിയിലെ ഓട്ടോ എക്സ്പോയിൽ ഈ ലക്ഷ്വറി കൺവേർട്ടബിളിൾ പ്രദർശനത്തിനായി ഒരുങ്ങുകയാണ്. വിദേശത്താകട്ടെ ഈ വാഹനത്തിന്റെ വിൽപന 2016 ൽ ആരംഭിക്കുമെന്നാണ് പറയപ്പെടുന്നത്.

170 രാജ്യങ്ങളിലോളം ഈ പുതിയ കൺവേർട്ടബിൾ എസ്‌യുവി വിൽക്കപ്പെടുമെന്നാണ് പ്രതീക്ഷിക്കുന്നത്. സിബിയു(Completely Built Unit) ചാനൽ വഴിയാണ് ഈ ടോപ്പ്‌ലെസ് എസ്‌യുവിയെ ഇന്ത്യയിലെത്തിക്കുന്നത്.

അലൂമിനിയത്തിൽ നിർമ്മിച്ചിട്ടുള്ള 2.0 ലിറ്റർ പെട്രോൾ, ഡീസൽ എൻജിനുകളാണ് ഈ വാഹനത്തിനുള്ളത്. 9 സ്പീഡ് സെഡ് എഫ് ഓട്ടോമാറ്റിക്ക് ഗിയർബോക്സും ഉൾപ്പെടുത്തിയിരിക്കുന്നു. പെട്രോൾ, ഡീസൽ എൻജിനുകളുടെ പെർഫോമൻസ് ഇപ്പോഴുള്ള ഇവോക്ക് മോഡലുകൾക്ക് സമാനമാണ്.

ഈ കൺവേര്‍ട്ടബിൾ എസ്‍യുവിക്ക് ടെറൈൻ റെസ്പോൺസ് സിസ്റ്റം എന്ന സാങ്കേതികത ഉള്ളതിനാല്‍ ഏത് സാഹചര്യത്തിലും ഡ്രൈവർമാർക്ക് ധൈര്യപൂർവും വണ്ടി ഓടിക്കാവുന്നതാണ്. അതുകൊണ്ട് ഈ വാഹനം ഓഫ് റോഡിലും മികച്ച പ്രകടനം കാഴ്ച വെയ്ക്കും.

ഉള്ളിലേക്ക് മടക്കി വെക്കാൻ സാധിക്കുന്ന വളരെ മൃദുവായ റൂഫാണ് (Z-Fold system) ഇവോക്ക് കൺവേർട്ടബിളിന് നൽകിയിരിക്കുന്നത്. വെറും18 സെക്കന്റുകൾ കൊണ്ട് റൂഫിനെ മൊത്തമായി ഉള്ളിലേക്ക് വലിക്കാനും തിരിച്ച് പഴയപടി ആക്കാനും കഴിയുമെന്ന് കമ്പനി ഉറപ്പ് നൽകുന്നു. വാഹനം മണിക്കൂറിൽ 48 കിമി വേഗതയിലാണെങ്കിൽ കൂടിയും റൂഫ് മാറ്റാൻ സാധിക്കുന്നതാണ്.