ഹോണ്ട അക്കോർഡ് ഹൈബ്രിഡ് വിപണിയിൽ..

പുതിയ ഹൈബ്രിഡ് രൂപത്തിൽ വീണ്ടുമൊരു തിരിച്ചുവരവ് നടത്തി ഹോണ്ട അക്കോർഡ് 37 ലക്ഷം രൂപയ്ക്ക് വിപണിയിൽ

By Praseetha

Published: Tuesday, October 25, 2016, 16:29 [IST]

കഴിഞ്ഞ ഏതാനും വർഷങ്ങൾക്ക് മുൻപാണ് ഹോണ്ടയുടെ പ്രീമിയം സെഡാൻ അക്കോർഡ് വിപണിയിൽ നിന്നും പിൻവലിഞ്ഞത്. പുതിയ ഹൈബ്രിഡ് രൂപത്തിൽ വീണ്ടുമൊരു തിരിച്ചുവരവ് നടത്തിയിരിക്കുകയാണ് അക്കോർഡ്. ഇന്ത്യയിൽ സിബിയു വഴി ഇറക്കുമതി ചെയ്ത ഈ ഹൈബ്രിഡ് പതിപ്പിന് ദില്ലി എക്സ്ഷോറൂം 37 ലക്ഷമാണ് വില.

അക്കോർഡിന്റെ ഓമ്പതാം തലമുറക്കാരനാണ് ഇന്ത്യയിലിപ്പോൾ എത്തിച്ചേർന്നിരിക്കുന്നത്. 2001ലായിരുന്നു ഒന്നാം തലമുറ അക്കോർഡിന്റെ ഇന്ത്യയിലുള്ള അരങ്ങേറ്റം.

2.0ലിറ്റർ 4 സിലിണ്ടർ നാച്ചുറലി ആസ്പിരേറ്റ‍ഡ് പെട്രോൾ എൻജിനും 1.3 കിലോവാട്ട്/എച്ച് ലിതിയം അയേൺ ബാറ്ററിയുമാണ് കരുത്തേകാനായി ഉപയോഗിച്ചിട്ടുള്ളത്.

145ബിഎച്ച്പിയും 175എൻഎം ടോർക്കുമാണ് ഈ പെട്രോൾ എൻജിൻ ഉല്പാദിപ്പിക്കുന്നതെങ്കിൽ 184ബിഎച്ച്പിയും 315എൻഎം ടോർക്കുമാണ് ഇലക്ട്രിക് മോട്ടോർ ഉല്പാദിപ്പിക്കുന്നത്.

സ്പോർടി ഫ്രണ്ട് ബംബർ, ബ്ലാക്ക് ക്രോം ഗ്രിൽ, എൽഇഡി ഹെഡ്‌ലാമ്പ്, ഡെ ടൈം റണ്ണിംഗ് ലാമ്പ്, എൽഇഡി ഫോഗ് ലാമ്പ്, 18 ഇഞ്ച് ടു ടോൺ ഡയമണ്ട് കട്ട് വീൽ, എൽഇഡി ടെയിൽ ലാമ്പ്, ബൂട്ട് സ്പോയിലർ എന്നീ ഫീച്ചറുകളാണ് കാറിന്റെ പുറംമോടി വർധിപ്പിക്കുന്ന സവിശേഷതകൾ.

ഇൻഫോടെയിൻമെന്റ് സിസ്റ്റവും എൻജിൻ സംബന്ധിച്ച വിവരങ്ങൾക്കുമായി രണ്ട് സ്ക്രീനുകൾ മധ്യത്തിലായി ഉൾപ്പെടുത്തിയിട്ടുണ്ട്.

പാസഞ്ചർ സൈഡ് ക്യാമറ, ടു-സ്റ്റേജ് ക്ലൈമറ്റ് കൺട്രോൾ, ക്രൂസ് കൺട്രോൾ, സൺ റൂഫ്, ആപ്പിൾ കാർ പ്ലെ, ആൻഡ്രോയിഡ് ഓട്ടോ എന്നിവയാണ് മറ്റ് സവിശേഷതകൾ.

വൈറ്റ് ഓർക്കിഡ് പേൾ, ലൂണാർ സിൽവർ മെറ്റാലിക്, മോഡേൺ സ്റ്റീൽ മെറ്റാലിക്, ക്രിസ്റ്റൽ ബ്ലാക്ക് പേൾ എന്നീ നിറങ്ങളിലാണ് അക്കോർഡ് ഹൈബ്രിഡ് പതിപ്പ് ലഭ്യമായിട്ടുള്ളത്.