കേരളത്തിൽ ഡീസൽ വാഹനങ്ങൾക്ക് നിരോധനം

By Praseetha

Published: Tuesday, May 24, 2016, 16:52 [IST]

കേരളത്തിൽ പത്ത് വർഷത്തിലധികം പഴക്കമുള്ള 2000 സിസിക്കു മുകളിലുള്ള ഡീസൽ വാഹനങ്ങൾക്ക് ദേശീയ ഹരിത ട്രൈബ്യൂണൽ വിലക്കേർപ്പെടുത്തിയിരിക്കുന്നു. പൊതുഗതാഗത, തദ്ദേശസ്ഥാപന വാഹനങ്ങളല്ലാതെ പുതിയ ഡീസൽ വാഹനങ്ങൾക്ക് സർക്കാർ റജിസ്റ്ററേഷൻ നൽകരുതെന്നും നിർദേശിച്ചിട്ടുണ്ട്.

ഇന്ത്യയിലെ മികച്ച സിഎൻജി കാറുകൾ

ദേശീയ ഹരിത ട്രൈബ്യൂണലിന്റെ കൊച്ചി സർക്യൂട്ട് ബെഞ്ചിന്റെ ഉദ്ഘാടനത്തിന് ശേഷമാണ് ഈ ഉത്തരവ് ഇറക്കിയിട്ടുള്ളത്. കൊച്ചിയിലെ ലോയേഴ്സ് എൻവയൺമെന്റ് അവേർനെസ് ഫോറം നൽകിയിട്ടുള്ള ഹർജി പ്രകാരം ജസ്റ്റിസ് സ്വതന്തർ കുമാർ, മെംബർ ബിക്രം സിങ് സജ്‌വാൻ എന്നിവരുൾപ്പെട്ട ബെഞ്ചിന്റെ ഉത്തരവാണിത്.

കേരളത്തിൽ തിരുവനന്തപുരം, കൊല്ലം, കൊച്ചി, തൃശൂർ, കോഴിക്കോട്, കണ്ണൂർ എന്നീ നഗരങ്ങളിലാണ് പത്ത് വർഷത്തിനു മുകളിലുള്ള ലൈറ്റ്, ഹെവി വാഹനങ്ങൾക്ക് നിരോധനം ഏർപ്പെടുത്തിയിരിക്കുന്നത്.

ഈ നഗരങ്ങളിൽ ഉത്തരവ് പാലിക്കാതെ വാഹനമോടിച്ചാൽ 5,000 രൂപ വീതമാണ് പിഴ. ഇത്തരത്തിൽ സമാഹരിക്കുന്ന പിഴത്തുകയെല്ലാം പരിസ്ഥിതി ഫണ്ടായി സൂക്ഷിക്കാനാണ് പദ്ധതിയിട്ടിരിക്കുന്നത്.

പിഴത്തുകയെല്ലാം സ്വരൂപിച്ച് അതതു നഗരങ്ങളിലെ പാരസ്ഥിതിക പുനരുദ്ധാരണ പ്രവർത്തനങ്ങൾക്കാണ് ഉപയോഗപ്പെടുത്തുക.

ഉത്തരവ് പ്രകാരം വാഹനപുക പരിശോധനാ സർട്ടിഫിക്കറ്റ് നിർബന്ധമാക്കിയിട്ടുണ്ട്. കൂടാതെ 10 വർഷത്തിലേറെ പഴക്കമുള്ള ഡീസൽ വാഹനങ്ങളാണെങ്കിൽ നിരോധനവും ലംഘിക്കുന്ന പക്ഷം പിഴയും കർശനമാക്കിയിട്ടുണ്ട്.

ഡീസൽ വാഹനങ്ങളുടെ അനിയന്ത്രിത ഉപയോഗം മൂലം പരിസ്ഥിതി മലിനീകരണം വർധിച്ചതിനാൽ ദില്ലിയിൽ ഏർപ്പെടുത്തിയ നിരോധനത്തിന് പിന്നാലെയാണ് കേരളവും മുന്നോട്ട് വന്നിരിക്കുന്നത്.

ഈ നിരോധനം മഹീന്ദ്ര, ടാറ്റ, ടൊയോട്ട, ഓഡി, ബെൻസ്, ബിഎംഡബ്ല്യു പോലുള്ള വാഹന നിർമാതാക്കളെയാണ് കൂടുതൽ ബാധിക്കുക.

കേരളത്തിൽ കൂടുതൽ വിൽപ്പനയുള്ള പല വാഹനങ്ങളുടെ വിൽപ്പനയും നിർത്തിവെയ്ക്കേണ്ടതായി വരും. വാഹന മേഖലയിൽ ജോലി ചെയ്യുന്ന നിരവധിപേരുടെ വരുമാനത്തെ ഇത് സാരമായി ബാധിക്കും.

സെക്കൻഡ് ഹാൻഡ് വിപണിയും തകിടം മറിയും. പുതിയ വാഹനങ്ങൽ വാങ്ങുന്നതിൽ നിന്നും ആളുകളെ പിൻതിരിപ്പിക്കും എന്നിങ്ങനെയാണ് ട്രൈബ്യൂണലിന്റെ ഉത്തരവിനോട് ജനങ്ങളുടെ പ്രതികരണം.