ജിഎസ്ടി; സ്വിഫ്റ്റിന് പിന്നാലെ മാരുതി ആള്‍ട്ടോയുടെ വില കുറഞ്ഞു

രാജ്യത്തെ ബെസ്റ്റ് സെല്ലിംഗ് കാറായ മാരുതി ആള്‍ട്ടോയുടെ പുതുക്കിയ നിരക്കാണ് ഇപ്പോള്‍ പുറത്ത് വന്നിരിക്കുന്നത്. ജിഎസ്ടിയുടെ അടിസ്ഥാനത്തില്‍ 2300 രൂപ മുതല്‍ 5400 രൂപ വരെയാണ് ആള്‍ട്ടോയില്‍ മാരുതി പ്രഖ്യാപിച്ചിരിക്കുന്ന വിലക്കുറവ്.

അതേസമയം, ജിഎസ്ടിക്ക് മുമ്പ് സംസ്ഥാനങ്ങളില്‍ നിലനിന്നിരുന്ന മൂല്യവര്‍ധിത നികുതിയെ പശ്ചാത്തലമാക്കിയാണ് മോഡലുകളില്‍ വിലക്കുറവ് രേഖപ്പെടുത്തുകയെന്ന് മാരുതി വ്യക്തമാക്കി.

800 സിസി, 1000 സിസി എഞ്ചിന്‍ ശേഷികളിലാണ് മാരുതി ആള്‍ട്ടോ ലഭ്യമാകുന്നത്. 47.3 bhp കരുത്തും 69 Nm torque ഉം ഉത്പാദിപ്പിക്കുന്ന 800 സിസി ആള്‍ട്ടോയില്‍ 5 സ്പീഡ് മാനുവല്‍ ഗിയര്‍ബോക്‌സ് ഇടംപിടിക്കുന്നു.

1000 സിസി വേര്‍ഷനില്‍ എത്തുന്ന ആള്‍ട്ടോ K10 ല്‍, 67 bhp കരുത്തും 90 Nm torque ഉം ഉത്പാദിപ്പിക്കുന്ന എഞ്ചിനാണ് മാരുതി നല്‍കിയിരിക്കുന്നത്.

ആള്‍ട്ടോയ്ക്ക് ഒപ്പം, സ്വിഫ്റ്റ് വേരിയന്റുകളില്‍ 6700 രൂപ മുതല്‍ 10700 രൂപ വരെ മാരുതി കുറച്ചിട്ടുണ്ട് (ബംഗളൂരു എക്സ്-ഷോറൂം വില). വേരിയന്റുകളെയും, സംസ്ഥാനങ്ങളെയും ആശ്രയിച്ച് സ്വിഫ്റ്റ് ഹാച്ച്ബാക്കിന്റെ വിലയില്‍ നേരിയ വ്യത്യാസങ്ങള്‍ രേഖപ്പെടുത്താം.