2017 ഹ്യുണ്ടായി വേർണ അടുത്ത മാസം എത്തും; ബുക്കിംഗ് ആരംഭിച്ചു

25,000 രൂപ മുന്‍കൂര്‍ പണം അടച്ചാണ് പുതുതലമുറ ഹ്യുണ്ടായി വേര്‍ണയെ ഉപഭോക്താക്കള്‍ ഡീലര്‍ഷിപ്പുകളില്‍ നിന്നും ബുക്ക് ചെയ്യുന്നത്. വരവിന് മുന്നോടിയായി വേര്‍ണയുടെ ടീസറുകള്‍ ഹ്യുണ്ടായി അടുത്തിടെ പുറത്ത് വിട്ടിരുന്നു.

പുതുക്കിയ ഹെഡ്‌ലാമ്പുകള്‍, ക്രോം ഫിനിഷോടുള്ള ഗ്രില്‍, എല്‍ഇഡി ഡെയ്‌ടൈം റണിംഗ് ലൈറ്റുകള്‍, എലാന്‍ട്രയ്ക്ക് സമാനമായ എല്‍ഇഡി ടെയില്‍ ലാമ്പുകള്‍ എന്നിവയാണ് 2017 വേര്‍ണയിലെ വിശേഷങ്ങള്‍.

ദക്ഷിണ കൊറിയന്‍ നിര്‍മ്മാതാക്കളുടെ ഫ്‌ളൂയിഡിക് ഡിസൈന്‍ സ്റ്റൈലിംഗില്‍ ഒരുങ്ങിയ ആദ്യ മോഡലാണ് വേര്‍ണ. ഗ്രാന്‍ഡ് i10 നും, ക്രെറ്റയ്ക്കും, i20 യ്ക്കും മുമ്പ് ഹ്യുണ്ടായി നിരയില്‍ നിന്നും ജനപ്രീതിയാര്‍ജ്ജിച്ച മോഡല്‍ കൂടിയായിരുന്നു വേര്‍ണ.

എന്തായാലും നിലവിലെ മോഡലില്‍ നിന്നും അടിമുടി മാറിയാണ് 2017 വേര്‍ണയെ ഹ്യുണ്ടായി അവതരിപ്പിക്കുകയെന്നാണ് ടീസര്‍ നല്‍കുന്ന സൂചന. ഹ്യുണ്ടായിയുടെ ഫ്‌ളൂയിഡിക് സ്‌കള്‍ച്ചര്‍ 2.0 ഡിസൈന്‍ തത്വമാണ് 2017 വേര്‍ണ പിന്തുടരുന്നത്.

രാജ്യാന്തര വേദികളില്‍ ഹ്യുണ്ടായി കാഴ്ചവെച്ച വേര്‍ണയില്‍ വലിയ സിംഗിള്‍-ഫ്രെയിം ഗ്രില്ലും, അഗ്രസീവ് ഹെഡ്‌ലാമ്പുകളുമാണ് ഇടംപിടിച്ചത്. ഇന്ത്യന്‍ വരവിലും ഇത് തുടരുമെന്ന് പ്രതീക്ഷിക്കുന്നു.

നിലവിലുള്ള വേര്‍ണയെക്കാളും 70 mm നീളവും, 29 mm വീതിയും കൂടുതലാണ് 2017 വേര്‍ണയ്ക്ക്. വീല്‍ബേസില്‍ 10 mm ന്റെ വര്‍ധനവാണ് രേഖപ്പെടുത്തുന്നത്. ഉയരത്തില്‍ മാറ്റമില്ല.

ആപ്പിള്‍ കാര്‍പ്ലേ, ആന്‍ഡ്രോയ്ഡ് ഓട്ടോ കണക്ടിവിറ്റിയ്ക്ക് ഒപ്പമുള്ള 7 ഇഞ്ച് ടച്ച്സ്‌ക്രീനാണ് ടോപ് വേരിയന്റില്‍ ഇടംപിടിക്കുക. താഴ്ന്ന വേരിയന്റുകളില്‍ 5 ഇഞ്ച് ടച്ച്സ്‌ക്രീനും സാന്നിധ്യമറിയിക്കും.

ഹോണ്ട സിറ്റി, മാരുതി സിയാസ്, ഫോക്‌സ് വാഗണ്‍ വെന്റോ, സ്‌കോഡ റാപ്പിഡ് മോഡലുകള്‍ക്ക് എതിരെയാണ് 2017 വേര്‍ണ മത്സരിക്കുക.