നെക്സണുമായി ടാറ്റയും കോംപാക്ട് എസ്‌യുവി സെഗ്മെന്റിലേക്ക്...

ഹോണ്ടയെ പിൻതള്ളിയായിരുന്നു ഇന്ത്യയിൽ മികച്ച വില്പന കാഴ്ചവെക്കുന്ന കാറുകളുടെ പട്ടികയിൽ ടാറ്റ നാലാമതെത്തിയത്. തങ്ങളുടെ വാഹനശൃംഖല വിപുലീകരിക്കുന്നതിന്റെ ഭാഗമായി പുതിയ കാറുകളുമായി വിപണിപിടിക്കാനുള്ള ഒരുക്കത്തിലാണ് ടാറ്റ.

കോംപാക്ട് സെഡാനായ കൈറ്റ് 5, എംപിവി ഹെക്സ എന്നീ വാഹനങ്ങൾ വിപണിപിടിക്കാനിരിക്കെ പുതുപുത്തൻ കോംപാക്ട് എസ്‌യുവിയുമായി കടന്നുവരികയാണ് ടാറ്റ.

ഇന്ത്യയിൽ കോംപാക്ട് എസ്‌യുവി സെഗ്മെന്റിന് ഡിമാന്റ് ഏറിവരുന്ന അവസരത്തിൽ നെക്സൺ എന്ന പേരിൽ ടാറ്റ അവതരിപ്പിക്കുന്ന വാഹനം മത്സരങ്ങൾ ഒന്നുകൂടി കൊഴുപ്പിക്കുമെന്നതിൽ സംശയമില്ല.

വിപണിപിടിക്കുന്നതിന് മുന്നോടിയായുള്ള ഈ വാഹനത്തിന്റെ പരീക്ഷണയോട്ടങ്ങൾ ഇപ്പോൾ പുരോഗമിച്ചു കൊണ്ടിരിക്കുകയാണ്. ഡ്രൈവ്‌സ്പാർക്ക് വായനക്കാരിലൊരാളാണ് പരീക്ഷണയോട്ടം നടത്തുന്നത് സംബന്ധിച്ചുള്ള വിവരങ്ങൾ ഞങ്ങളുമായി പങ്കുവച്ചത്.

ഒരു കൺസ്പെറ്റ് എന്ന രൂപത്തിൽ 2014 ഓട്ടോഎക്സ്പോയിലായിരുന്നു നെക്സണിന്റെ ആദ്യ അവതരണം. പിന്നീട് നിർമാണം പൂർത്തിയാക്കിയ മോഡലായിരുന്നു 2016 എക്സ്പോയിൽ അവതരിച്ചത്.

വാഹനം മൊത്തമായും മൂടപ്പെട്ട നിലയിലാണ് പരീക്ഷണയോട്ടം നടത്തുന്നതായി കാണപ്പെട്ടത്. അതിനാൽ നിർമാണം പൂർത്തിയാക്കിയ മോഡലിൽ കാണപ്പെട്ടിരുന്ന സവിശേഷതകൾ എല്ലാം തന്നെ ടെസ്റ്റിംഗ് നടത്തുന്ന മോഡലിൽ നിന്നും വ്യക്തമാക്കാൻ സാധിച്ചില്ല.

ടാറ്റ ടിയാഗോയിലുള്ള 1.2ലിറ്റർ ത്രീ സിലിണ്ടർ പെട്രോൾ എൻജിന്റെ ടർബോചാർജ്ഡ് പതിപ്പടക്കം രണ്ട് എൻജിൻ ഓപ്ഷനുകളായിരിക്കും ടാറ്റ നെക്സണിൽ ഉൾപ്പെടുത്തുക.

രണ്ടാമതായുള്ള എൻജിൻ ടാറ്റയുടെ പുതിയ 1.5ലിറ്റർ ഡീസൽ എൻജിനായിരിക്കാനാണ് സാധ്യത. രണ്ട് എൻജിനുകളിലും മാനുവലും ഓട്ടോമാറ്റിക് ട്രാൻസ്മിഷനുകളും ഉണ്ടായിരിക്കുന്നതാണ്.

2016 എക്സ്പോയിൽ അവതരിപ്പിച്ച നിർമാണം പൂർത്തിയാക്കിയ മോഡലിന് സമാനമായ ഫീച്ചറുകൾ തന്നെയായിരിക്കും ടെസ്റ്റിംഗ് മോഡലിനുമുള്ളത്. ഡ്യുവൽ ടോൺ എക്സ്റ്റീരിയർ കളർ, ആൻഗുലാർ ഹെഡ്‌ലാമ്പ്, റൂഫ് ലൈൻ എന്നീ സവിശേഷതകൾ അതുപോലെ നിലനിർത്താനുള്ള സാധ്യതയുണ്ട്.

സബ് ഫോർ മീറ്റർ എസ്‌യുവി സെഗ്മെന്റിൽ ടാറ്റ അവതരിപ്പിക്കുന്ന ആദ്യ വാഹനമായിരിക്കും നെക്സൺ. 3.99മീറ്റർ നീളവും 1.73മീറ്റർ വീതിയും 1.6മീറ്റർ ഉയരവുമുള്ള ഈ വാഹനത്തിന് 2.54 മീറ്റർ വീൽബേസാണുള്ളത്.

2017 ആദ്യ പകുതിയിലായിരിക്കും ടാറ്റ നെക്സണിന്റെ വിപണിപ്രവേശം. മാരുതി വിറ്റാര ബ്രെസ, ഫോഡ് ഇക്കോസ്പോർട് എന്നീ വാഹനങ്ങളെ ലാക്കാക്കി കൊണ്ടായിരിക്കും നെക്സണിന്റെ വരവ്.

കോംപാക്ട് എസ്‌യുവി സെഗ്മെന്റിൽ ടാറ്റ അവതരിപ്പിക്കുന്ന പുത്തൻ വാഹനത്തിന് 5 മുതൽ 8ലക്ഷം വരെയായിരിക്കും വിപണിയിലെ വില.

മാരുതി ഇഗ്നിസ് ബുക്കിംഗ് ആരംഭിച്ചു; തുകയറിയാം

വിറ്റാര ബ്രെസയ്ക്കൊരു കരുത്തൻ എതിരാളിയുമായി ഹ്യുണ്ടായ്