നെക്‌സോണിന്റെ ടീസറുമായി ടാറ്റ മോട്ടോർസ്; കോമ്പാക്ട് എസ്‌യുവിയുടെ എഞ്ചിന്‍ വിവരങ്ങള്‍ പുറത്ത്

നെക്‌സോണിന്റെ എക്‌സ്റ്റീരിയര്‍ ഘടനയിലേക്ക് വെളിച്ചം വീശുന്നതാണ് ടീസർ. കൂപ്പെ പ്രൊഫൈലിന് സാമ്യമായ രൂപഘടനയില്‍ എത്തുന്ന നെക്‌സോണ്‍, ടാറ്റയുടെ IMPACT ഡിസൈന്‍ തത്വമാണ് പാലിക്കുന്നത്.

ഡ്യൂവല്‍ ടോണ്‍ ടച്ചോട് കൂടിയ എക്‌സ്റ്റീരിയറാണ് നെക്‌സോണില്‍ ഒരുങ്ങുക. ടിയാഗൊ ഹാച്ച്ബാക്ക്, ടിഗോര്‍ കോമ്പാക്ട് സെഡാന്‍ മോഡലുകള്‍ക്ക് സമാനമായ ഇന്റീരിയറാകും നെക്‌സോണില്‍ സാന്നിധ്യമറിയിക്കുക.

1.2 ലിറ്റര്‍ ത്രീ-സിലിണ്ടര്‍ റെവൊട്രണ്‍ ടര്‍ബ്ബോചാര്‍ജ്ഡ് പെട്രോള്‍ എഞ്ചിനാണ് ടാറ്റ നെക്‌സോണിന്റെ പവര്‍ഹൗസ്. 108.5 bhp കരുത്തും 170 Nm torque ഉം ഉത്പാദിപ്പിക്കുന്നതാണ് 1198 സിസി എഞ്ചിന്‍.

1.5 ലിറ്റര്‍ ഫോര്‍-സിലിണ്ടര്‍ റെവൊടോര്‍ഖ് ഡീസല്‍ എഞ്ചിനും നെക്‌സോണില്‍ ഇടംപിടിക്കും. 108.5 bhp കരുത്തും 260 Nm torque ഉം ഏകുന്നതാണ് 1496 സിസി എഞ്ചിന്‍.

ഇക്കോ, സിറ്റി, സ്‌പോര്‍ട് എന്നിങ്ങനെ മൂന്ന് ഡ്രൈവിംഗ് മോഡുകള്‍ക്ക് ഒപ്പമാണ് ഇരു എഞ്ചിന്‍ വേര്‍ഷനുകളും എത്തുക. TA6300 സിക്‌സ് സ്പീഡ് മാനുവല്‍ ഗിയര്‍ബോക്‌സ് മാത്രമാകും നെക്‌സോണില്‍ ഒരുക്കുകയെന്ന് ടാറ്റ വ്യക്തമാക്കി.

പൂനെയിലുള്ള ടാറ്റയുടെ ഉത്പാദനകേന്ദ്രത്തില്‍ നിന്നുമാണ് നെക്‌സോണ്‍ എസ്‌യുവികള്‍ എത്തുക. എവിഎല്‍, ബോഷ്, മഹാലെ, ഹണിവെല്‍ ഉള്‍പ്പെടുന്ന വിതരണക്കാരില്‍ നിന്നുമുള്ള ഘടകങ്ങളും നെക്‌സോണില്‍ ഇടംപിടിക്കുന്നു.

പെട്രോള്‍ റെവൊട്രണ്‍ സാനന്ദ് ഉത്പാദന കേന്ദ്രത്തില്‍ നിന്നും വരുമ്പോള്‍, ഡീസല്‍ റെവൊടോര്‍ഖ് എത്തുന്നത് രഞ്ജന്‍ഗോണ്‍ പ്ലാന്റില്‍ നിന്നുമാണ്.

മാരുതി വിതാര ബ്രെസ്സ, ഫോര്‍ഡ് ഇക്കോസ്‌പോര്‍ട് മോഡലുകള്‍ക്ക് ഭീഷണിയായാണ് ടാറ്റ നെക്‌സോണ്‍ വന്നെത്തുക. കോമ്പാക്ട് എസ്‌യുവി ശ്രേണിയില്‍ നിലകൊള്ളുന്ന മത്സരത്തിന്റെ പശ്ചാത്തലത്തില്‍, 6 മുതല്‍ 9 ലക്ഷം രൂപ വരെ പ്രൈസ് ടാഗിലാകും ടാറ്റ നെക്‌സോണ്‍ അവതരിക്കുക.