ഗോ ലൈവ് സ്‌പെഷ്യല്‍ എഡിഷനുമായി ഡാറ്റ്‌സന്‍

ഗോ ഹാച്ച്ബാക്കിന്റെ ഏറ്റവും ഉയര്‍ന്ന വകഭേദം ആധാരമായി ഒരുങ്ങുന്ന ഗോ ലൈവില്‍ പുതിയ ഡിസൈന്‍ ഘടനകള്‍ തന്നെയാണ് പ്രധാന ആകര്‍ഷണം. സ്റ്റാന്‍ഡേര്‍ഡ് മോഡലില്‍ നിന്നും വേറിട്ടുനില്‍ക്കാന്‍ ഡിസൈന്‍ മാറ്റങ്ങള്‍ ഗോ ലൈവ് സ്‌പെഷ്യല്‍ എഡിഷനെ സഹായിക്കും.

പരിമിതകാലത്തേക്ക് മാത്രമെ ഗോ ലൈവ് എഡിഷന്‍ ഇന്തോനേഷ്യന്‍ വിപണിയില്‍ ലഭ്യമാവുകയുള്ളു. 2018 നവംബര്‍ മുതല്‍ ബുക്ക് ചെയ്യുന്ന ഉപഭോക്താക്കള്‍ക്ക് സ്‌പെഷ്യല്‍ എഡിഷനെ കമ്പനി കൈമാറും.

കസ്റ്റം കാറുകളോടു യുവതലമുറ കാട്ടുന്ന അഭിനിവേശം പരിഗണിച്ച് അക്രമണോത്സുകത തെളിഞ്ഞ മുഖഭാവമാണ് പുതിയ ഹാച്ച്ബാക്കിന് കമ്പനി നല്‍കിയിട്ടുള്ളത്. സ്‌പോര്‍ടി പരിവേഷം നേടാന്‍ ബോഡി കിറ്റ് മോഡലിനെ പിന്തുണയ്ക്കുന്നു.

ഹാച്ച്ബാക്കിന് ഗ്രെയാണ് നിറം. എന്നാല്‍ മുന്‍ സ്പ്ലിറ്ററിനും പിന്‍ ഡിഫ്യൂസറിനും മേല്‍ക്കൂരയിലുള്ള സ്‌പോയിലറിനും നിറം മഞ്ഞയാണ്. ഹാച്ച്ബാക്കിന്റെ അകത്തളത്തില്‍ സീറ്റുകള്‍ക്കും സീറ്റ്‌ബെല്‍റ്റുകള്‍ക്കും ഇന്‍സ്ട്രമെന്റ് ക്ലസ്റ്ററിനും മഞ്ഞനിറം വരമ്പിടും.

ഇക്കാരത്താല്‍ തന്നെ കൂടുതല്‍ സ്‌പോര്‍ടിയായി ഹാച്ച്ബാക്ക് അനുഭവപ്പെടും. മഞ്ഞനിറമൊഴികെ മറ്റു കാര്യമായ വ്യത്യാസങ്ങള്‍ അകത്തളത്തിലില്ല. 1.2 ലിറ്റര്‍ പെട്രോള്‍ എഞ്ചിനാണ് ഡാറ്റ്‌സന്‍ ഗോ ലൈവില്‍ തുടിക്കുന്നത്.

എഞ്ചിന് 72 bhp കരുത്തു പരമാവധി സൃഷ്ടിക്കാനാവും. അഞ്ചു സ്പീഡാണ് മാനുവല്‍ ഗിയര്‍ബോക്‌സ്. എക്‌സ്‌ട്രോണിക് സിവിടി ഓട്ടോമാറ്റിക് ഗിയര്‍ബോക്‌സ് ഓപ്ഷനല്‍ വ്യവസ്ഥയിലാണ് ഒരുങ്ങുന്നത്.

ഇന്തോനേഷ്യന്‍ വിപണിയില്‍ ഡീസല്‍ എഞ്ചിന്‍ പതിപ്പുകളെ കമ്പനി പുറത്തിറക്കാറില്ല. മോഡലിന്റെ പ്രീ-ബുക്കിംഗ് കമ്പനി തുടങ്ങിയതായാണ് വിവരം.