മാരുതിക്ക് വീണ്ടുമൊരു പൊന്‍തൂവല്‍ — പൊടിപൊടിച്ച് എഎംടി വില്‍പന

പുതിയ സ്വിഫ്റ്റ്, ഡിസൈര്‍, വിറ്റാര ബ്രെസ്സ മോഡലുകള്‍ക്ക് എഎംടി ലഭിച്ചതോടെ മാരുതി വില്‍പന കുതിക്കുകയാണ്. നഗരങ്ങളിലുള്ളവര്‍ എഎംടി കാറുകളോടു കാട്ടുന്ന പ്രത്യേക മമത മാരുതിയ്ക്ക് മുതല്‍ക്കൂട്ടായി മാറുന്നു.

ഇതുവരെ 3.6 ലക്ഷം ഓട്ടോമാറ്റിക് എഎംടി കാറുകളെയാണ് മാരുതി ഇന്ത്യയില്‍ വിറ്റത്. ഓട്ടോ ഗിയര്‍ ഷിഫ്റ്റ് എന്നാണ് എഎംടി സംവിധാനത്തിന് മാരുതി നല്‍കുന്ന പേര്. മാരുതിയുടെ സിവിടി, ടോര്‍ഖ് കണ്‍വേര്‍ട്ടര്‍ ഓട്ടോമാറ്റിക് കാറുകളുടെ വില്‍പന പോലും എഎംടി കാറുകളുടെ പത്തുശതമാനം മാത്രമാണ്.

ബലെനോയിലാണ് സിവിടി ഗിയര്‍ബോക്‌സ് മാരുതി നല്‍കുന്നത്. സിയാസില്‍ ടോര്‍ഖ് കണ്‍വേര്‍ട്ടര്‍ ഗിയര്‍ബോക്‌സും. കമ്പനി പ്രതിമാസം കുറിക്കുന്ന വില്‍പനയുടെ ഇരുപതു ശതമാനവും എഎംടി കാറുകളില്‍ നിന്നാണ്.

പെട്രോള്‍, ഡീസല്‍ മോഡലുകളില്‍ എഎംടി ഗിയര്‍ബോക്‌സ് ഒരുങ്ങുന്നത് ഓട്ടോമാറ്റിക് കാറുകളുടെ പ്രചാരം കൂട്ടുന്നു. മാരുതിക്ക് പുറമെ ടാറ്റയും റെനോയും എഎംടി മോഡലുകളെ വിപണിയില്‍ കൊണ്ടുവരുന്നുണ്ട്.

ടിയാഗൊ, ടിഗോര്‍, നെക്‌സോണ്‍ എന്നിവരാണ് ടാറ്റയുടെ എഎംടി കാറുകള്‍. ക്വിഡും ഡസ്റ്ററും റെനോയുടെ എഎംടി നിരയില്‍ തലയുയര്‍ത്തുന്നു. ഇന്ത്യയിലെ പ്രധാന നഗരങ്ങള്‍ ലക്ഷ്യമിട്ടു കൂടുതല്‍ എഎംടി കാറുകളെ ലഭ്യമാക്കുകയാണ് ഇതുവരെ കമ്പനി സ്വീകരിച്ചുവരുന്ന തന്ത്രം.

ഈ സാമ്പത്തിക വര്‍ഷം രണ്ടുലക്ഷം എഎംടി കാറുകളെ വിപണിയില്‍ കൊണ്ടുവരണമെന്നാണ് മാരുതിയുടെ ലക്ഷ്യം. 2014 -ല്‍ സെലറിയോ ഹാച്ച്ബാക്കിലൂടെയാണ് മാരുതിയുടെ എഎംടി വിപ്ലവത്തിന് തുടക്കം.

നാലു വര്‍ഷങ്ങള്‍ക്കിപ്പുറം ഏഴു മോഡലുകളില്‍ കമ്പനി എഎംടി പതിപ്പിനെ അവതരിപ്പിച്ചു കഴിഞ്ഞു. ആള്‍ട്ടോ K10, വാഗണ്‍ആര്‍, ഇഗ്നിസ്, പുതിയ സ്വിഫ്റ്റ്, ഡിസൈര്‍, വിറ്റാര ബ്രെസ്സ എന്നിവരാണ് മാരുതിയുടെ എഎംടി മോഡലുകള്‍.

ബജറ്റ് വിലയും ഭേദപ്പെട്ട മൈലേജും; ഇന്ത്യയില്‍ എഎംടി കാറുകള്‍ക്ക് പ്രചാരം കൂടാനുള്ള കാരണങ്ങള്‍ മറ്റൊന്നുമല്ല. ചില അവസരങ്ങളില്‍ മാനുവല്‍ കാറുകളെക്കാള്‍ കൂടുതല്‍ മൈലേജ് എഎംടി കാറുകള്‍ കാഴ്ച്ചവെക്കുന്നുണ്ടുതാനും.

സിവിടി, ടോര്‍ഖ് കണ്‍വേര്‍ട്ടര്‍, ഡിഎസ്ജി ഗിയര്‍ബോക്‌സ് പതിപ്പുകളുള്ള കാറുകളെക്കാള്‍ വളരെ കുറഞ്ഞവിലയില്‍ എഎംടി കാറുകള്‍ നിര്‍മ്മിക്കപ്പെടുന്നു. ഇക്കാരണത്താല്‍ എഎംടി കാറുകള്‍ക്ക് തൊട്ടാല്‍ പൊള്ളുന്ന വിലയില്ല.

Source: CarandBike