കൊറോണ വൈറസ്; 2020 ഹ്യുണ്ടായി i20 -യുടെ ആഗോള അരങ്ങേറ്റം വൈകും

2020 i20 -ക്ക് ഒപ്പം, ഇന്ന് ജനീവ മോട്ടോർ ഷോയിൽ i30 ഫെയ്‌സ്‌ലിഫ്റ്റ്, പ്രോഫെസി ഇവി കൺസെപ്റ്റ് എന്നിവയും ഹ്യുണ്ടായി പ്രദർശിപ്പിക്കാൻ ഇരിക്കുകയായിരുന്നു. ജനീവ മോട്ടോർ ഷോ റദ്ദാക്കിയതായി അധികൃതർ വെളിപ്പെടുത്തിയിരുന്നു.

അതിനുപുറമെ, ഹ്യുണ്ടായിയുടെ ദക്ഷിണ കൊറിയൻ പ്രവർത്തനങ്ങളും തകരാറിലായിരിക്കുകയാണ്. പെയിന്റ് ഷോപ്പിലെ 300 ജീവനക്കാരിൽ ഒരാളെ കൊറോണ വൈറസ് ബാധിച്ചതായി കണ്ടെത്തിയതിനെ തുടർന്ന് നമ്പർ 2 ഉൽസാൻ പ്ലാന്റിലെ പ്രവർത്തനം താൽക്കാലികമായി നിർത്തിവച്ചിരിക്കുകയാണ്.

പെയിന്റ് ഷോപ്പ് അണുവിമുക്തമാക്കുന്നതിനുപകരം പ്ലാന്റ് തന്നെ അടച്ചുപൂട്ടാൻ കമ്പനി തീരുമാനിച്ചു. ഉൽസാൻ നിർമ്മാണശാലയിൽ ഹ്യുണ്ടായിക്ക് അഞ്ച് പ്ലാന്റുകളുണ്ട്, ഈ പ്ലാന്റിൽ നിന്നാണ് കോന ഇവി ഉത്പാദിപ്പിക്കുന്നത്.

2020 ഹ്യുണ്ടായി i20 -യുടെ ചിത്രങ്ങൾ ഇതിനകം വെളിപ്പെടുത്തിയിട്ടുണ്ട്. വാഹനത്തിന് പുതിയ മുൻ ഗ്രില്ല്, പുനർരൂപകൽപ്പന ചെയ്ത ഹെഡ്‌ലാമ്പുകൾ, എൽഇഡി ഡിആർഎൽ എന്നിവ ലഭിക്കുന്നു.

പുതിയ മുൻ, പിൻ ബമ്പറുകൾ, പുതിയ എൽഇഡി ടെയിൽ ലാമ്പുകൾ, ഒരു ഷാർക്ക് ഫിൻ ആന്റിന എന്നിവയും 17 ഇഞ്ച് അലോയ് വീലുകളും വരുന്നു.

പുതിയ 10.25 ഇഞ്ച് ഡിജിറ്റൽ ക്ലസ്റ്റർ, സെൻട്രൽ ടച്ച്‌സ്‌ക്രീൻ, എട്ട് സ്പീക്കറുകളുള്ള ബോസ് ഓഡിയോ സിസ്റ്റം, വയർലെസ് ചാർജിംഗ്, ബ്ലൂലിങ്ക് കണക്റ്റിവിറ്റി എന്നിവയുള്ള പുതുക്കിയ ഇന്റീരിയറുകളും യൂറോപ്പ് സ്‌പെക്ക് i20 ക്ക് ലഭിക്കും.

ഇന്ത്യ സ്‌പെക്ക് മോഡലിന് ഈ വലിയ സ്‌ക്രീനുകൾ നഷ്‌ടമാകും, പകരം അനലോഗ് ഇൻസ്ട്രുമെന്റ് ക്ലസ്റ്ററിനൊപ്പം 8.0 ഇഞ്ച് ഇൻഫോടെയ്ൻമെന്റ് സിസ്റ്റം ലഭിക്കും.

പുതുതലമുറ i20 2020 ജൂൺ / ജൂലൈയിൽ ഇന്ത്യൻ വിപണിയിൽ വിൽപ്പനയ്ക്ക് എത്തും. പുറത്തിറങ്ങി കഴിഞ്ഞാൽ, കമ്പനിയുടെ ഇപ്പോഴത്തെ വാഹന നിരയിൽ നിന്ന് നിലവിലെ i20 -യെ പുതുമോഡൽ മാറ്റിസ്ഥാപിക്കും.

2020 ഹ്യുണ്ടായി i20 -ക്ക് പെട്രോൾ, ഡീസൽ എഞ്ചിൻ ഓപ്ഷനുകൾ ലഭിക്കും, ഇതെല്ലാം പുതിയ ബിഎസ് VI എമിഷൻ മാനദണ്ഡങ്ങൾ പാലിക്കും. 1.2 ലിറ്റർ പെട്രോൾ, 1.0 ലിറ്റർ ടർബോ-പെട്രോൾ, 1.5 ലിറ്റർ ഡീസൽ എഞ്ചിൻ എന്നിവ ഇന്ത്യയിലുണ്ടാകും.

ആഗോള വിപണിയിൽ 48 V മൈൽഡ് ഹൈബ്രിഡ് സാങ്കേതികവിദ്യയുള്ള ടർബോ പെട്രോൾ എഞ്ചിൻ ലഭിക്കും. 1.2 ലിറ്റർ പെട്രോളിന് ഏകദേശം 84 bhp കരുത്തും 1.0 ലിറ്റർ ടർബോ പെട്രോളിന് 100 bhp -യും 1.5 ലിറ്റർ ഡീസൽ 100 bhp കരുത്തും ലഭിക്കും. ഗിയർ ഓപ്ഷനുകളിൽ മാനുവൽ, ഓട്ടോമാറ്റിക് എന്നിവ ഉൾപ്പെടും.

ലോഞ്ച് ചെയ്തുകഴിഞ്ഞാൽ, പുതിയ ഹ്യുണ്ടായി i20 5.7-10 ലക്ഷം രൂപ വില പരിധി പ്രതീക്ഷിക്കാം. വിലയിൽ വർദ്ധനവ് കാണും. പ്രീമിയം ഹാച്ച്ബാക്ക് വിഭാഗത്തിൽ മാരുതി ബലേനോ, ഹോണ്ട ജാസ്, ടൊയോട്ട ഗ്ലാൻസ, ടാറ്റ ആൾട്രോസ് എന്നിവയുമായുള്ള മത്സരം തുടരും.