ഗ്ലോസ്റ്ററിന് 80,000 രൂപ വരെ വില വർധനയുമായി എംജി

2020 ഒക്ടോബറിൽ ആരംഭിച്ച എം‌ജി ഗ്ലോസ്റ്ററിന് ഉപഭോക്താക്കളിൽ നിന്ന് നല്ല പ്രതികരണമാണ് ലഭിച്ചത്. അടിസ്ഥാന മോഡലിന് 28.98 ലക്ഷം രൂപയും ടോപ്പ് എൻഡ് മോഡലിന് 35.38 ലക്ഷം രൂപ ആമുഖ വിലയ്ക്കാണ് എസ്‌യുവി പുറത്തിറക്കിയത്.

ഈ വിലകൾ ആദ്യത്തെ 2,000 യൂണിറ്റുകൾക്ക് അല്ലെങ്കിൽ 2020 ഒക്ടോബർ 31 വരെ സാധുവായിരുന്നു. അതിനുശേഷം വാഹനത്തിന്റെ വില ഒരു ലക്ഷം രൂപ വരെ കമ്പനി ഉയർത്തിയിരുന്നു.

കഴിഞ്ഞ 4-5 മാസത്തിനുള്ളിൽ പുതിയ ഗ്ലോസ്റ്ററിനുള്ള രണ്ടാമത്തെ വിലവർധനയാണിത്. സൂപ്പർ, സ്മാർട്ട്, ഷാർപ്പ്, സാവി എന്നീ 4 വേരിയന്റുകളിൽ ആറ്, ഏഴ് സീറ്റർ ഓപ്ഷനുകളിൽ എംജി ഗ്ലോസ്റ്റർ ലഭ്യമാണ്. എസ്‌യുവി ഇപ്പോൾ 29.98 ലക്ഷം മുതൽ 36.88 ലക്ഷം രൂപ വരെ വിലയിൽ ലഭ്യമാണ്.

എം‌ജി ഗ്ലോസ്റ്റർ സ്മാർട്ട് ആറ് സീറ്റർ വില 50,000 രൂപ വർധിപ്പിച്ചു, ഇപ്പോൾ ഇത് 31.98 ലക്ഷം രൂപയിൽ ലഭ്യമാണ്. ഏഴ് സീറ്റർ ഷാർപ്പ്, ആറ് സീറ്റർ ഷാർപ്പ് വേരിയന്റുകൾ ഇപ്പോൾ 35.38 ലക്ഷം രൂപയിൽ ലഭ്യമാണ്, ഇവയുടെ വില 70,000 രൂപയാണ് ഉയർന്നിരിക്കുന്നത്. ടോപ്പ്-സ്പെക്ക് ഗ്ലോസ്റ്റർ സാവി ആറ് സീറ്ററിന് ഇപ്പോൾ 36.88 ലക്ഷം രൂപയാണ് വില, ഇതിന് 80,000 രൂപയുടെ വിലവർധനവ് ലഭിക്കുന്നു.

70 നൂതന സവിശേഷതകൾ വാഗ്ദാനം ചെയ്യുന്ന എം‌ജിയുടെ ഐസ്‌മാർട്ട് കണക്റ്റഡ് കാർ സാങ്കേതികവിദ്യ ഗ്ലോസ്റ്ററിൽ സജ്ജീകരിച്ചിരിക്കുന്നു. അഡാപ്റ്റീവ് ക്രൂയിസ് കൺട്രോൾ, ഓട്ടോമാറ്റിക് പാർക്കിംഗ് അസിസ്റ്റ്, ഫോർവേഡ് കൊളീഷൻ ബ്രേക്കിംഗ്, ഓട്ടോമാറ്റിക് എമർജൻസി ബ്രേക്കിംഗ് (AEB), ബ്ലൈൻഡ് സ്പോട്ട് ഡിറ്റക്ഷൻ (BSD), ലെയിൻ ഡിപ്പാർച്ചർ വാർണിംഗ് (LDW) തുടങ്ങിയ സവിശേഷതകൾ വാഗ്ദാനം ചെയ്യുന്ന ADAS (അഡ്വാൻസ്ഡ് ഡ്രൈവർ അസിസ്റ്റന്റ് സിസ്റ്റം) ഇതിലുണ്ട്.

യാത്രക്കാരുടെ സുരക്ഷയ്ക്കായി എം‌ജി ഗ്ലോസ്റ്ററിന് ആറ് എയർബാഗുകൾ, 360 ഡിഗ്രി വ്യൂ ക്യാമറ, ESP, ട്രാക്ഷൻ കൺട്രോൾ സിസ്റ്റം, ABS+EBD, ബ്രേക്ക് അസിസ്റ്റ്, EDL (ഇലക്ട്രോ-മെക്കാനിക്കൽ ഡിഫറൻഷ്യൽ ലോക്ക്), ഹിൽ ഹോൾഡ് ആൻഡ് ഡിസെന്റ് കൺട്രോൾ, റോൾ മൂവ്മെന്റ് ഇന്റർവെൻഷൻ (RMI), ഓട്ടോഹോൾഡുള്ള ഇലക്ട്രിക് പാർക്കിംഗ് ബ്രേക്ക് തുടങ്ങിയവ ലഭിക്കുന്നു.

എം‌ജി ഗ്ലോസ്റ്റർ 2.0 ലിറ്റർ ടർബോചാർജ്ഡ്, 2.0 ലിറ്റർ ട്വിൻ-ടർബോ എന്നിങ്ങനെ രണ്ട് ഡീസൽ എഞ്ചിൻ ഓപ്ഷനുകളിൽ ലഭ്യമാണ്. ടർബോ യൂണിറ്റ് 163 bhp കരുത്തും 375 Nm torque ഉം വികസിപ്പിക്കുന്നു.

ട്വിൻ-ടർബോചാർജ്ഡ് യൂണിറ്റ് 218 bhp കരുത്തും 480 Nm torque ഉം ഉൽ‌പാദിപ്പിക്കുന്നു. സ്റ്റാൻഡേർഡായി എട്ട് സ്പീഡ് ഓട്ടോമാറ്റിക് ഗിയർബോക്‌സ് വാഗ്ദാനം ചെയ്യുന്നു.