Punch -ന്റെ വില ബ്രാക്കറ്റിൽ അകപ്പെടുന്ന മറ്റ് Tata മോഡലുകൾ; ഒരു വിശകലനം

അനാച്ഛാദനത്തോടൊപ്പം വാഹനത്തിനായുള്ള ബുക്കിംഗും കമ്പനി ആരംഭിച്ചു. പഞ്ച് ഒരു യൂണീക്ക് സെഗ്മെന്റ് ഉൾക്കൊള്ളുന്നുണ്ടെങ്കിലും, അതിന്റെ വില ശ്രേണി മറ്റ് ചില ടാറ്റ മോഡലുകളായ ടിയാഗോ, ആൾട്രോസ്, നെക്സോൺ എന്നിവയുമായി മത്സരിക്കുന്നു.

ഈ നാല് ടാറ്റ പാസഞ്ചർ കാറുകളുടെ വിലകളുടെ ഒരു ഹ്രസ്വ താരതമ്യത്തിലൂടെ ഒരു ശരാശരി ഇന്ത്യൻ കാർ ഉപഭോക്താവിനെ ഇത് എങ്ങനെ ആകർഷിക്കുന്നുവെന്ന് നമുക്ക് നോക്കാം.

ടാറ്റ പഞ്ച് പ്യുവർ, അഡ്വഞ്ചർ, അക്കംപ്ലിഷ്ഡ്, ക്രിയേറ്റീവ് എന്നിങ്ങനെ നാല് ട്രിം ലെവലുകളിൽ ലഭ്യമാണ്. വാഹനത്തിന്റെ വില 5.49 ലക്ഷം മുതൽ 9.09 ലക്ഷം രൂപ വരെയാണ്. മൈക്രോ-എസ്‌യുവിക്ക് ഓപ്ഷണൽ പായ്ക്കുകളും ലഭ്യമാണ്.

പ്യുവർ ആൻഡ് അഡ്വഞ്ചർ ട്രിമ്മുകൾക്ക് 35,000 രൂപ നിരക്കിൽ റിഥം പായ്ക്ക് ലഭിക്കുമ്പോൾ, അക്കംപ്ലിഷ്ഡ് മോഡലിന് 45,000 രൂപയ്ക്ക് ഡാസിൽ പായ്ക്കും, 30,000 രൂപയ്ക്ക് ക്രിയേറ്റീവ് വേരിയന്റിന് iRA പായ്ക്കും ലഭിക്കുന്നു.

ടാറ്റ ടിയാഗോയുടെ വില 4.99 ലക്ഷം മുതൽ 7.04 ലക്ഷം രൂപ വരെയാണ്, ഇത് പഞ്ചിനേക്കാൾ താങ്ങാവുന്ന വിലയാണ്. ഹാച്ച്ബാക്ക് ഒരു എഞ്ചിൻ ഓപ്ഷനിൽ മാത്രമേ ലഭ്യമാവൂ.

86 bhp കരുത്തും 113 Nm torque ഉം വികസിപ്പിക്കുന്ന 1.2 ലിറ്റർ നാച്ചുറലി ആസ്പിരേറ്റഡ് (NA) പെട്രോൾ യൂണിറ്റാണ് വാഹനത്തിൽ വരുന്നത്, ഇത് അഞ്ച്-സ്പീഡ് മാനുവൽ അല്ലെങ്കിൽ അഞ്ച്-സ്പീഡ് AMT ഗിയർബോക്സ് ഉപയോഗിച്ച് ലഭ്യമാകും. ടാറ്റ പഞ്ചിലും ഇതേ എഞ്ചിൻ, ഗിയർബോക്സ് ഓപ്ഷനുകൾ വാഗ്ദാനം ചെയ്യുന്നു.

86 bhp കരുത്തും 113 Nm torque ഉം പുറപ്പെടുവിക്കുന്ന 1.2 ലിറ്റർ NA പെട്രോൾ, 110 bhp കരുത്തും 140 Nm torque ഉം സൃഷ്ടിക്കുന്ന 1.2 ലിറ്റർ ടർബോ-പെട്രോൾ, 90 bhp കരുത്തും 200 Nm torque ഉം ഉത്പാദിപ്പിക്കുന്ന 1.5 ലിറ്റർ ടർബോ-ഡീസൽ എന്നിങ്ങനെ മൂന്ന് എഞ്ചിൻ ഓപ്ഷനുകളുമായി ടാറ്റ ആൾട്രോസ് ലഭ്യമാണ്.

മൂന്ന് പവർപ്ലാന്റുകളും അഞ്ച് സ്പീഡ് മാനുവൽ ട്രാൻസ്മിഷനുമായി മാത്രമേ കണക്ട് ചെയ്തിട്ടുള്ളൂ. ആൾട്രോസിന്റെ വില 5.84 ലക്ഷം രൂപയിൽ ആരംഭിച്ച് 9.59 ലക്ഷം രൂപ വരെയാണ്, ഇത് പഞ്ചിനേക്കാൾ അല്പം കൂടുതലാണ്.

നിലവിൽ ബ്രാൻഡിന്റെ നിരയിലെ ഏറ്റവും ജനപ്രിയ മോഡലാണ് ടാറ്റ നെക്‌സോൺ. 7.28 ലക്ഷം രൂപ മുതൽ 13.23 ലക്ഷം രൂപ വരെയാണ് വാഹനത്തിന്റെ എക്സ്-ഷോറൂം വില. രണ്ട് എഞ്ചിൻ ഓപ്ഷനുകൾ ഉണ്ട്-

120 bhp കരുത്തും 170 Nm torque ഉം പുറപ്പെടുവിക്കുന്ന 1.2 ടർബോ-പെട്രോൾ, 110 bhp കരുത്തും 260 Nm torque ഉം സൃഷ്ടിക്കുന്ന 1.5 ലിറ്റർ ടർബോ-ഡീസൽ എന്നിങ്ങനെ രണ്ട് എഞ്ചിനുകളിൽ കോംപാക്ട് എസ്‌യുവി ലഭ്യമാണ്. ഇരു എഞ്ചിനുകളും ആറ്-സ്പീഡ് MT, ആറ്-സ്പീഡ് AMT എന്നീ ട്രാൻസ്മിഷൻ ചോയിസുകളും വാഗ്ദാനം ചെയ്യുന്നു.

നെക്‌സോൺ പഞ്ചിനേക്കാൾ വളരെ ചെലവേറിയതാണ്, അതു പോലെ തന്നെ വലുതുമാണ്, കൂടാതെ കൂടുതൽ സവിശേഷതകളും വാഹനം നൽകുന്നുണ്ട്. ടാറ്റ നെക്സോണിന് ഒരു ഇലക്ട്രിക് പതിപ്പും വിപണിയിൽ ഉണ്ട് (നെക്സോൺ ഇവി),13.99 ലക്ഷം മുതൽ 16.85 ലക്ഷം വരെയാണ് നെക്സോൺ ഇവിയുടെ വില. സമീപഭാവിയിൽ ആൾട്രോസിനും പഞ്ചിനും ഇലക്ട്രിക് പവർട്രെയിൻ ഓപ്ഷനുകൾ ലഭിക്കുമെന്ന് പ്രതീക്ഷിക്കുന്നു.