Toyota-യുടെ ആദ്യ ഓള്‍-ഇലക്ട്രിക് എസ്‌യുവിയെക്കുറിച്ച് അറിഞ്ഞിരിക്കണം ഈ കാര്യങ്ങള്‍

ഈ വര്‍ഷം ആദ്യം ഏപ്രിലില്‍ ലോകത്തിന് മുന്നില്‍ പ്രദര്‍ശിപ്പിച്ച കണ്‍സെപ്റ്റ് പതിപ്പിന് സമാനമായ ഡിസൈന്‍ തത്ത്വചിന്തയെ പിന്തുടര്‍ന്നാണ് ഓള്‍-ഇലക്ട്രിക് എസ്‌യുവി വരുന്നതെന്ന് വേണം പറയാന്‍.

ജാപ്പനീസ് വാഹന നിര്‍മാതാക്കളുടെ സീറോ എമിഷന്‍ വാഹന തന്ത്രത്തില്‍ വരാനിരിക്കുന്ന bZ4X ഒരു പ്രധാന പങ്കാണ് വഹിക്കാന്‍ പോകുന്നത്. സീറോ-എമിഷന്‍ ടൊയോട്ട കാറുകള്‍ക്ക് ബിയോണ്ട് സീറോ എന്നതിനെയാണ് bZ നാമകരണം സൂചിപ്പിക്കുന്നതെന്നും കമ്പനി വ്യക്തമാക്കിയിട്ടുണ്ട്.

2025 ഓടെ bZ ബ്രാന്‍ഡിംഗില്‍ ഏഴ് കാറുകള്‍ പുറത്തിറക്കാനാണ് ടൊയോട്ട ലക്ഷ്യമിടുന്നത്. 2050 ഓടെ കാര്‍ബണ്‍ ന്യൂട്രാലിറ്റി കൈവരിക്കാനുള്ള വാഹന നിര്‍മ്മാതാക്കളുടെ ലക്ഷ്യത്തിന്റെ ഭാഗമായാണ് ഇത് വരുന്നത്.

വരാനിരിക്കുന്ന ടൊയോട്ട bZ4X കണ്ണഞ്ചിപ്പിക്കുന്ന ഡിസൈനും ഒരു കൂട്ടം സവിശേഷതകളുമായാണ് വിപണിയില്‍ എത്തുന്നതെന്ന് കമ്പനി തന്നെ വ്യക്തമാക്കുന്നുണ്ട്. ടൊയോട്ട bZ4X ഓള്‍-ഇലക്ട്രിക് എസ്‌യുവിയുടെ ചില പ്രധാന സവിഷേത ഹൈലൈറ്റുകള്‍ എന്തൊക്കെയെന്ന് പരിശോധിക്കാം.

e-TNGA പ്ലാറ്റ്‌ഫോം

ടൊയോട്ടയുടെ സമര്‍പ്പിത ഇലക്ട്രിക് വെഹിക്കിള്‍ ആര്‍ക്കിടെക്ചര്‍ e-TNGA-യെ അടിസ്ഥാനമാക്കിയായിരിക്കും ടൊയോട്ട bZ4X EV ഒരുങ്ങുന്നത്. ഈ ഇവി-നിര്‍ദ്ദിഷ്ട പ്ലാറ്റ്‌ഫോം സുബാരുവുമായി സംയുക്തമായി വികസിപ്പിച്ചെടുത്തതാണ്.

ബിഎംഡബ്ല്യു 7-സീരീസ്, ഓഡി A8, ലെക്സസ് LS, മെര്‍സിഡീസ് ബെന്‍സ് എസ്-ക്ലാസ് തുടങ്ങിയ ആഡംബര സെഡാനുകള്‍ക്ക് സമാനമായ 1,000 mm റിയര്‍ ലെഗ്റൂം ഈ e-TNGA പ്ലാറ്റ്ഫോം ഉറപ്പാക്കുന്നുവെന്ന് ടൊയോട്ട അവകാശപ്പെടുന്നു.

RAV4 പ്രചോദനം ഉള്‍ക്കൊണ്ട ഡിസൈന്‍

ടൊയോട്ട ഇലക്ട്രിക് എസ്‌യുവിക്കായി സമൂലമായ ഡിസൈന്‍ തത്ത്വചിന്തകളൊന്നും ഉണ്ടാക്കിയിട്ടില്ല. പകരം, RAV4-ന്റെ ഡിസൈന്‍ അടിസ്ഥാനകാര്യങ്ങള്‍ എടുക്കാനും അവ bZ4X-ല്‍ ഉള്‍പ്പെടുത്താനും വാഹന നിര്‍മ്മാതാവ് തീരുമാനിച്ചുവെന്ന് പറയേണ്ടിവരും.

ഇലക്ട്രിക് കാറിന് സ്ലീക്ക് സ്വീപ്റ്റ്-ബാക്ക് എല്‍ഇഡി ഹെഡ്‌ലാമ്പുകള്‍, വീല്‍ ആര്‍ച്ചുകള്‍ക്ക് മുകളില്‍ പ്ലാസ്റ്റിക് ക്ലാഡിംഗ് എന്നിവ ഷാര്‍പായിട്ടുള്ള മസ്‌കുലര്‍ രൂപം നല്‍കുന്നു.

എല്‍ഇഡി സ്ലീക്ക് ടെയില്‍ലൈറ്റുകളുള്ള ഒരു മോഡുലാര്‍ റിയര്‍ പ്രൊഫൈലും ഇതിന് ലഭിക്കുന്നു. കാറിന്റെ മൊത്തത്തിലുള്ള ഡിസൈന്‍ സ്പോര്‍ട്ടിയും ഷാര്‍പ്പും എന്ന് വേണം പറയാന്‍.

മേല്‍ക്കൂരയില്‍ സോളാര്‍ പാനല്‍

വരാനിരിക്കുന്ന ടൊയോട്ട ഇവിയുടെ തെരഞ്ഞെടുത്ത വകഭേദങ്ങള്‍ മേല്‍ക്കൂരയില്‍ സോളാര്‍ പാനലുകള്‍ ലഭ്യമാക്കിയിട്ടുണ്ടെന്നും കമ്പനി വ്യക്തമാക്കി.

ഈ മേല്‍ക്കൂര സംയോജിത സോളാര്‍ പാനലിന് പ്രതിവര്‍ഷം 1,800 കിലോമീറ്റര്‍ ഡ്രൈവിംഗ് ദൂരത്തിന് തുല്യമായ വൈദ്യുതി ഉത്പാദിപ്പിക്കാന്‍ കഴിയുമെന്നാണ് കമ്പനി അവകാശപ്പെടുന്നത്. ചാര്‍ജിംഗ് സ്റ്റേഷനുകള്‍ ഇല്ലാതെ പാര്‍ക്കിംഗ് സ്ഥലങ്ങളില്‍ ഇത് ചാര്‍ജ് ചെയ്യന്‍ അനുവദിക്കുകയും ചെയ്യുന്നു.

ടെസ്‌ല മോഡല്‍ S റഫറന്‍സുള്ള ക്യാബിന്‍

ടൊയോട്ട bZ4X അതിന്റെ ക്യാബിനില്‍ ടെസ്‌ല മോഡല്‍ S റഫറന്‍സുമായി വരും. രണ്ട് വ്യത്യസ്ത സ്റ്റിയറിംഗ് വീല്‍ ലേഔട്ടുകളുടെ ഓപ്ഷനുമായാണ് എസ്‌യുവി ലഭ്യമാകുന്നത്.

പരമ്പരാഗത വൃത്താകൃതിയിലുള്ള സ്റ്റിയറിംഗിന് പുറമെ, യോക്ക് പോലെയുള്ള ഒരു ടെസ്‌ല മോഡല്‍ S ഉണ്ടായിരിക്കും. പൂര്‍ണ്ണമായി ഡിജിറ്റല്‍ ഡിസ്പ്ലേകള്‍, സൗണ്ട് പ്രൂഫ് വിന്‍ഡോ ഗ്ലാസുകള്‍, ഹീറ്റഡ് സ്റ്റിയറിംഗ്, സീറ്റുകള്‍, പനോരമിക് സണ്‍റൂഫ് തുടങ്ങിയവയും ഇതിന് ലഭിക്കുന്നു.

ഈ പ്ലാറ്റ്‌ഫോമിന്റെ മറ്റൊരു സവിശേഷതയായി കമ്പനി എടുത്തുകാട്ടുന്നത് ക്യാബിനിലെ സ്‌പെയ്‌സാണ്. ഇത് മികച്ചതെന്നാണ് ജാപ്പനീസ് ബ്രാന്‍ഡ് അവകാശപ്പെടുന്നത്. പിന്‍സീറ്റുകള്‍ മടക്കിവെച്ചാല്‍ ബൂട്ട് സ്‌പേസ് 452 ലിറ്റര്‍ വരെ ലഭിക്കുമെന്നും ടൊയോട്ട വ്യക്തമാക്കുന്നു.

പവര്‍ട്രെയിന്‍

രണ്ട് വ്യത്യസ്ത പവര്‍ട്രെയിന്‍ ഓപ്ഷനുകളില്‍ ടൊയോട്ട bZ4X ലഭ്യമാകുക. FWD വേരിയന്റിന് 71.4 kWh ബാറ്ററി പാക്കില്‍ നിന്നും ഒരു ഇലക്ട്രിക് മോട്ടോറില്‍ നിന്നും പവര്‍ ലഭിക്കും.

ഈ വേരിയന്റിന് 204 പിഎസ് പവര്‍ ഉത്പാദിപ്പിക്കാനും ഒറ്റ ചാര്‍ജില്‍ 500 കിലോമീറ്റര്‍ വരെ സഞ്ചരിക്കാനും കഴിയും. 8.4 സെക്കന്‍ഡ് വേഗത്തില്‍ ഇതിന് 0-100 കിലോമീറ്റര്‍ വേഗത കൈവരിക്കാനും കഴിയും.

മറുവശത്ത് AWD വേരിയന്റിന് രണ്ട് ആക്സിലുകളും പവര്‍ ചെയ്യുന്ന ഡ്യുവല്‍ ഇലക്ട്രിക് മോട്ടോര്‍ ലഭിക്കും. ഇത് 218 പിഎസ് പവര്‍ പുറപ്പെടുവിക്കുകയും ഒറ്റ ചാര്‍ജില്‍ 460 കിലോമീറ്റര്‍ സഞ്ചരിക്കാനും സാധിക്കും. ഈ AWD വേരിയന്റിന് 7.7 സെക്കന്‍ഡില്‍ 0-100 കിലോമീറ്റര്‍ വേഗത കൈവരിക്കാന്‍ കഴിയുമെന്നാണ് കമ്പനി വ്യക്തമാക്കുന്നത്.