അണിയറയിൽ നിന്ന് അരങ്ങിലേക്ക്! പുത്തൻ Mahindra Scorpio-N ഡീലർഷിപ്പുകളിൽ

എസ്‌യുവി ഇതിനോടകം ഡീലർഷിപ്പുകളിൽ എത്തിത്തുടങ്ങി, തെരഞ്ഞെടുത്ത 30 നഗരങ്ങളിൽ ഉപഭോക്താക്കൾക്ക് പുതിയ സ്കോർപിയോ-N ടെസ്റ്റ് ഡ്രൈവ് ചെയ്യാനുള്ള അവസരം മഹീന്ദ്ര ഒരുക്കിയിട്ടുണ്ട്.

എസ്‌യുവിയുടെ ഔദ്യോഗിക ബുക്കിംഗ് ജൂലൈ 30-ന് മഹീന്ദ്ര ആരംഭിക്കും. വാഹനത്തിന്റെ ഓട്ടോമാറ്റിക്, ഓൾ-വീൽ ഡ്രൈവ് പതിപ്പുകൾ തെരഞ്ഞെടുക്കാൻ ആഗ്രഹിക്കുന്നവർക്കായി, അവയുടെ വിലകൾ ജൂലൈ 21 -ന് ബ്രാൻഡ് പ്രഖ്യാപിക്കും.

ഉപഭോക്താക്കൾക്ക് അവരുടെ റിസർവേഷനുകളിൽ ഭേദഗതി ചെയ്യാൻ അല്ലെങ്കിൽ മാറ്റങ്ങൾ വരുത്താൻ രണ്ടാഴ്ച വരെ സമയം ലഭിക്കും. പുതുതലമുറ ണോഡലിന്റെ ഡെലിവറി വിശദാംശങ്ങൾ കാർ നിർമ്മാതാക്കൾ ഉടൻ പ്രഖ്യാപിക്കും.

Z2, Z4, Z6, Z8, Z8L എന്നീ വേരിയന്റുകളിൽ മഹീന്ദ്ര സ്കോർപിയോ-N ലഭ്യമാണ്. അലക്‌സ, ആപ്പിൾ കാർപ്ലേ, ആൻഡ്രോയിഡ് ഓട്ടോ സപ്പോർട്ടുള്ള 8.0 ഇഞ്ച് ടച്ച്‌സ്‌ക്രീൻ ഇൻഫോടെയിൻമെന്റ് സിസ്റ്റം, ഇലക്ട്രിക് സൺറൂഫ്, പവർഡ് ഡ്രൈവർ സീറ്റ്, റിയർ എയർ കണ്ടീഷൻ വെന്റുകൾ, ഡ്യുവൽ സോൺ ക്ലൈമറ്റ് കൺട്രോൾ, 12 -സ്പീക്കർ സോണി സൗണ്ട് സിസ്റ്റം എന്നിവയുമായി വരും.

അതോടൊപ്പം ഫ്രണ്ട്- ഫേസിംഗ് മൂന്നാം നിര സീറ്റുകൾ, ഡ്യുവൽ-ടോൺ ബ്ലാക്ക് ആൻഡ് ബ്രൗൺ ലെതറെറ്റ് അപ്ഹോൾസ്റ്ററി, എൽഇഡി പ്രൊജക്ടർ ഹെഡ്‌ലാമ്പുകൾ, 18 ഇഞ്ച് അലോയികൾ എന്നിവ ഫീച്ചർ ഹൈലൈറ്റുകളിൽ ഉൾപ്പെടുന്നു.

പവർട്രെയിനിനെ സംബന്ധിച്ചിടത്തോളം, മഹീന്ദ്ര സ്കോർപിയോ-N 2.0 ലിറ്റർ പെട്രോൾ, 2.2 ലിറ്റർ ഡീസൽ എഞ്ചിനുകളിൽ ലഭ്യമാണ്. രണ്ട് പവർട്രെയിനുകളും മാനുവൽ, ഓട്ടോമാറ്റിക് ട്രാൻസ്മിഷനുകൾക്കൊപ്പം ഡീസൽ ഡെറിവേറ്റീവുകൾക്കായുള്ള ഓൾ-വീൽ ഡ്രൈവ് കോൺഫിഗറേഷനുമായി ലഭിക്കും.

പെട്രോൾ മോഡൽ 2WD ഓപ്ഷനുമായി എത്തുമ്പോൾ, സ്കോർപിയോ N ഡീസൽ പതിപ്പ് 2WD, 4WD ഓപ്ഷനുകളിൽ വിൽപ്പനയ്ക്ക് എത്തും. 2022 മഹീന്ദ്ര സ്കോർപിയോ N 4WD/AWD മോഡൽ ഒരു പാർട്ട് ടൈം 4WD സിസ്റ്റത്തോടെയാണ് വരുന്നത്, ഇത് ബ്രാൻഡിന്റെ തന്നെ XUV700 -ൽ കാണപ്പെടുന്ന പെർമെനന്റ് സംവിധാനത്തിൽ നിന്ന് വ്യത്യസ്തമാണ്.

'4Xplorer' എന്നാണ് സ്കോർപിയോയുടെ 4WD സിസ്റ്റത്തെ മഹീന്ദ്ര വിളിക്കുന്നത്. എസ്‌യുവിയുടെ ട്രാൻസ്ഫർ കേസിൽ നാല് ഹൈ & ലോ ഗിയർ അനുപാതത്തിലാണ് ഇത് വരുന്നത്.

റഫ് റോഡ്, സ്നോ, മഡ്, വാട്ടർ എന്നിങ്ങനെ നാല് മോഡുകൾ പുതിയ മഹീന്ദ്ര സ്കോർപിയോ N 4Xplorer വാഗ്ദാനം ചെയ്യുന്നു. ഓഫ്-റോഡിംഗ് കഴിവുകൾ കൂടുതൽ മെച്ചപ്പെടുത്തുന്നതിനായി, മാനുവൽ ലോക്കിംഗ് റിയർ ഡിഫറൻഷ്യലും മഹീന്ദ്ര ഇതിൽ ചേർത്തിരിക്കുന്നു.