ഗലോബൽ NCAP ക്രാഷ് ടെസ്റ്റിൽ ത്രീ സ്റ്റാർ സേഫ്റ്റി റേറ്റിംഗ് കരസ്ഥമാക്കി Hyundai Creta, i20 മോഡലുകൾ

ടെസ്റ്റിന് ഒടുവിൽ രണ്ട് മോഡലുകളും ത്രീ സ്റ്റാർ ക്രാഷ് ടെസ്റ്റ് റേറ്റിംഗ് കരസ്ഥമാക്കി. പരിശോധനയ്ക്കായി, ക്രെറ്റയുടെയും i20 -യുടെയും എൻട്രി ലെവൽ വേരിയന്റുകളാണ് GNCAP ഉപയോഗിച്ചത്.

ഈ മോഡലുകളിൽ ഇരട്ട ഫ്രണ്ട് എയർബാഗുകൾ, ABS വിത്ത് EBD, ഫ്രണ്ട് സീറ്റ് ബെൽറ്റ് വാർണിംഗ്, പിൻ പാർക്കിംഗ് സെൻസറുകൾ എന്നിവ സ്റ്റാൻഡേർഡായി സജ്ജീകരിച്ചിരിക്കുന്നു.

ഹ്യുണ്ടായി ക്രെറ്റ - ത്രീ സ്റ്റാർ GNCAP റേറ്റിംഗ്

ഫ്രണ്ടൽ ഓഫ്‌സെറ്റ് ക്രാഷ് ടെസ്റ്റിൽ 65 കിലോമീറ്റർ വേഗതയിൽ, ഹ്യുണ്ടായി ക്രെറ്റ എസ്‌യുവി മുതിർന്നവരുടെ സംരക്ഷണത്തിനായി ത്രീ സ്റ്റാർ റേറ്റിംഗ് നേടി. എസ്‌യുവിയുടെ ബോഡി ഷെൽ അൺസ്റ്റേബിളും കൂടുതൽ ലോഡിംഗുകൾ താങ്ങാൻ ശേഷിയില്ലാത്തതുമാണെന്ന് ഇതിൽ കണ്ടെത്തി. ഇതിനോട് അനുബന്ധിച്ച്, കാറിന്റെ ഫുട്‌റെസ്റ്റും അൺസ്റ്റേബിളായി കണ്ടെത്തി.

എസ്‌യുവി മൊത്തം 17 -ൽ 8 പോയിന്റ് നേടി. ഡ്രൈവർക്കും സഹയാത്രികർക്കും ഹെഡ് പ്രൊട്ടക്ഷൻ യഥാക്രമം മതിയായതും മികച്ചതുമായി റേറ്റുചെയ്‌തിരിക്കുന്നു. ഗ്ലോബൽ NCAP -യുടെ റിപ്പോർട്ട് പ്രകാരം എസ്‌യുവി ഡ്രൈവറുടെയും സഹ ഡ്രൈവറുടെയും കഴുത്തിന് നല്ല സംരക്ഷണം നൽകുന്നു.

എന്നാൽ ചെസ്റ്റ് പ്രൊട്ടക്ഷനും ഡ്രൈവർക്ക് നാമമാത്രവും സഹയാത്രികർക്ക് മികച്ചതുമായിരുന്നു എന്നാണ് റിപ്പോർട്ട് സൂചിപ്പിക്കുന്നത്. ഡ്രൈവറും ഫ്രണ്ട് യാത്രക്കാരും ഡാഷ്‌ബോർഡിന് പിന്നിലെ 'അപകടകരമായ ഘടനകളുമായി' ഒരു കൂട്ടിയിടി സമയത്ത് സമ്പർക്കത്തിൽ വന്നേക്കാം എന്നതിനാൽ കാൽമുട്ട് സംരക്ഷണവും എസ്‌യുവി പേരിന് മാത്രമാണ് നൽകുന്നതെന്ന് റിപ്പോർട്ട് വ്യക്തമാക്കുന്നു.

ഹ്യുണ്ടായി ക്രെറ്റയ്ക്ക് കുട്ടികളുടെ സംരക്ഷണത്തിന്റെ കാര്യത്തിലും ത്രീ സ്റ്റാർ റേറ്റിംഗും ലഭിക്കുന്നു. ഇത് പരമാവധി 49 -ൽ 28.29 പോയിന്റുകൾ സ്കോർ ചെയ്യുന്നു. അടിസ്ഥാന വേരിയന്റിന് ISOFIX ചൈൽഡ് സീറ്റ് ആങ്കറേജുകൾ എസ്‌യുവി നഷ്‌ടപ്പെടുത്തുന്നു.

മൂന്ന് വയസ് പ്രായമുള്ള ഫ്രണ്ട് ഫേസിംഗ് ഡമ്മിയുടെ തലയുടെ അമിതമായ ഫോർവേർഡ് മൂവ്മെന്റ് തടയാൻ സീറ്റ് ബെൽറ്റ് പരാജയപ്പെട്ടതായി റിപ്പോർട്ട് അടയാളപ്പെടുത്തുന്നു.

വാസ്തവത്തിൽ, ചെസ്റ്റ് സംരക്ഷണവും 'ദുർബലമായത്' എന്ന് ടെസ്റ്റ് റേറ്റുചെയ്തു. എന്നിരുന്നാലും, 1.5 വയസ്സ് പ്രായമുള്ള പിന്നിലേക്ക് അഭിമുഖീകരിക്കുന്ന ഡമ്മിക്ക് തലയ്ക്കും നെഞ്ചിനും ടെസ്റ്റിൽ മികച്ച സംരക്ഷണം ഉണ്ടായിരുന്നു.

ഹ്യുണ്ടായി i20 - ത്രീ സ്റ്റാർ GNCAP റേറ്റിംഗ്

മുതിർന്നവരുടെ പ്രൊട്ടക്ഷനായിട്ട് ആകെയുള്ള 17 പോയിന്റിൽ 8.84 പോയിന്റാണ് ഹ്യുണ്ടായി i20 നേടിയത്. GNCAP ക്രാഷ് ടെസ്റ്റിൽ ത്രീ സ്റ്റാർ റേറ്റിംഗ് പ്രീമിയം ഹാച്ച് ഉറപ്പാക്കുന്നു.

ബോഡിഷെല്ലും ഫുട്‌വെൽ ഏരിയയും ക്രെറ്റയിലേതിന് സമാനമായി അൺസ്റ്റേബിളും കൂടുതൽ ഭാരം താങ്ങാൻ ശേഷിയില്ലാത്തതുമാണെന്ന് കണ്ടെത്തി. ഡ്രൈവറുടെ ചെസ്റ്റിന് ദുർബലമായ സംരക്ഷണവും ഡ്രൈവറുടെയും സഹയാത്രികന്റെയും കാൽമുട്ടുകൾക്ക് മാർജിനൽ സംരക്ഷണവുമാണ് i20 ഹാച്ച് വാഗ്ദാനം ചെയ്യുന്നത് എന്നും റിപ്പോർട്ടുകൾ സൂചിപ്പിക്കുന്നു.

ഫ്രണ്ട് യാത്രക്കാരന്റെയും ഡ്രൈവറുടെയും തലയ്ക്കും കഴുത്തിനും മതിയായ സംരക്ഷണം i20 വാഗ്ദാനം ചെയ്യുന്നു. കുട്ടികളുടെ ഒക്യുപ്പൻസി ടെസ്റ്റിൽ 49 -ൽ 36.89 പോയിന്റാണ് ഹാച്ച്ബാക്ക് നേടിയത്. ഇതിന് ISOFIX ആങ്കറേജുകൾ സ്റ്റാൻഡേർഡായി ലഭിക്കുന്നു, കൂടാതെ ചൈൽഡ് റെസ്‌ട്രൈന്റ് സിസ്റ്റവും നന്നായി പ്ലേസ് ചെയ്യുകയും മാർക്ക് ചെയ്യുകയും ചെയ്തിരിക്കുന്നു.

പരിശോധനയിൽ, ISOFIX ആങ്കറേജുകൾ ഒരു കൊളീഷനിൽ കുട്ടികളുടെ തലകൾ മുന്നിലേക്ക് അമിതമായ നീങ്ങുന്നത് തടഞ്ഞു. കുട്ടിയുടെ കഴുത്തിന് ഹാച്ച്ബാക്ക് മോശം സംരക്ഷണം നൽകുന്നതായും റിപ്പോർട്ട് സൂചിപ്പിക്കുന്നു.

വിപണിയിൽ പ്രധാന എതിരാളിയായ ഫോർ സ്റ്റാർ ക്രാഷ് ടെസ്റ്റ് റേറ്റിംഗുള്ള ടാറ്റ ആൾട്രോസ് പ്രീമിയം ഹാച്ചുമായി താരതമ്യപ്പെടുത്തുമ്പോൾ ഹ്യുണ്ടായി i20 -ക്ക് സേഫ്റ്റിയുടെ കാര്യത്തിൽ കൂടുതൽ മെച്ചപ്പെടുത്തലുകൾ ആവശ്യമാണ്.

രാജ്യത്ത് ഒക്ടോബർ ഒന്നു മുതൽ പ്രാബല്യത്തിൽ വരുമെന്ന് പറയപ്പെടുന്ന പുത്തൻ സുരക്ഷ മാനദണ്ഡങ്ങൾ എത്തുന്നതോടെ ഈ സ്ഥിതിയ്ക്ക് മാറ്റം വന്നേക്കാം എന്ന് ഞങ്ങൾ പ്രതീക്ഷിക്കുന്നു.