അടിമുടി മാറ്റങ്ങളും പരിഷ്കരണങ്ങളുമായി പുതുതലമുറ Tuscon ഇന്ത്യയിൽ അവതരിപ്പിച്ച് Hyundai

2020 സെപ്റ്റംബറിൽ ആഗോളതലത്തിൽ ആദ്യമായി അവതരിപ്പിച്ച നാലാം തലമുറ ട്യൂസൺ 2022 രണ്ടാം പകുതിയിൽ ഇന്ത്യയിൽ വിൽപ്പനയ്‌ക്കെത്തും.

ഇന്ത്യയുടെ CY2020, CY2021 ഒന്നാം നമ്പർ എസ്‌യുവി ബ്രാൻഡ് എന്ന നിലയിൽ, തങ്ങളുടെ ആഗോളതലത്തിലുള്ള ഏറ്റവും മികച്ചത് അവതരിപ്പിക്കുന്നതിലൂടെ ഉപഭോക്തൃ സന്തോഷവും ആവേശവും ഉളവാക്കാൻ ഹ്യുണ്ടായി ഒരുങ്ങുകയാണ് എന്ന് പ്രഖ്യാപന ചടങ്ങിൽ, ഹ്യുണ്ടായി മോട്ടോർ ഇന്ത്യ ലിമിറ്റഡിന്റെ എംഡിയും സിഇഒയുമായ മിസ്റ്റർ ഉൻസൂ കിം പറഞ്ഞു.

നിരവധി മികച്ച സാങ്കേതിക വിദ്യകളുടെ തുടക്കക്കാരായ ഹ്യുണ്ടായി ഇന്റലിജന്റ് ടെക്‌നോളജി, ഫ്യൂച്ചറിസ്റ്റിക് ഡിസൈൻ, സമാനതകളില്ലാത്ത സുരക്ഷ, സ്മാർട്ട് ഇന്നൊവേഷനുകൾ എന്നിവ ഉപയോഗിച്ച് എസ്‌യുവി ഉപഭോക്താക്കളെ ആവേശം കൊള്ളിക്കാൻ പുതിയ ട്യൂസോൺ സജ്ജമാണ്.

2004 -ൽ ലോഞ്ച് ചെയ്തതിന് ശേഷം ആഗോളതലത്തിൽ ഏഴ് ദശലക്ഷത്തിലധികം യൂണിറ്റുകൾ വിറ്റഴിച്ച് ട്യൂസോൺ ലോകമെമ്പാടുമുള്ള ഉപഭോക്താക്കളുടെ ഹൃദയവും മനസ്സും കീഴടക്കി. ബോൾഡും ഡൈനാമിക്കുമായ അപ്പീലും നൂതന സവിശേഷതകളും ഉപയോഗിച്ച്, ഇന്ത്യയിലെ ഉപഭോക്താക്കളുടെ അഭിലാഷങ്ങളെ ട്യൂസോൺ കീഴടക്കും എന്നും അദ്ദേഹം അഭിപ്രായപ്പെട്ടു.

നാലാം തലമുറ ട്യൂസോൺ അതിന്റെ മുൻഗാമിയേക്കാൾ നീളവും വീതിയും അല്പം ഉയരവുമുള്ള ഒരു പുതിയ എസ്‌യുവിയാണ്. ഹ്യുണ്ടായിയുടെ പുതിയ "പാരാമെട്രിക്" ഡിസൈൻ ശൈലിയിൽ ഇത് ബോൾഡായി സ്റ്റൈൽ ചെയ്തിരിക്കുന്നു, ഇത് ഷാർപ്പ് ക്രീസുകളും ഫ്ലെയർഡ് ചതുരാകൃതിയിലുള്ള വീൽ ആർച്ചുകളും അടങ്ങുന്ന "സെൻസസ് സ്‌പോർടിനസ്" ഫിലോസഫിയുടെ പരിണാമമാണ്.

മുൻവശത്ത്, "പാരാമെട്രിക്" രൂപകൽപ്പനയും വെർട്ടിക്കലായി അടുക്കിയിരിക്കുന്ന ഡിആർഎല്ലുകളും, വിശാലമായ ഫ്രണ്ട് ഗ്രില്ലും ഇത് അവതരിപ്പിക്കുന്നു. വാഹനത്തിന് സ്പ്ലിറ്റ് എൽഇഡി ഹെഡ്‌ലൈറ്റുകളും വെർട്ടിക്കലായി അടുക്കിയ ഫോഗ് ലാമ്പുകളാൽ ചുറ്റുമായി വിശാലമായ ലോവർ എയർ ഡാമും ഉണ്ട്. നിലവിലെ ട്യൂസോണിന്റെ 18 ഇഞ്ച് അലോയ്കളേക്കാൾ വലിപ്പമുള്ള പുതിയ 19 ഇഞ്ച് ഫൈവ് സ്‌പോക്ക് അലോയി വീലുകളുമായാണ് ഇത് വരുന്നത്.

ഫാങ് ആകൃതിയിലുള്ള സ്പ്ലിറ്റ് എൽഇഡി ടെയിൽ‌ലൈറ്റുകളും സ്ലീക്ക് ടെയിൽ‌ഗേറ്റ് ഡിസൈനുമുള്ള പുതിയ ട്യൂസോണിന്റെ പിൻഭാഗവും ഒരുപോലെ ശ്രദ്ധേയമാണ്. താഴെയായി, ബമ്പറിന് സമാനമായ പാരാമെട്രിക് പാറ്റേണും ഒരു ഫോക്സ് സ്കിഡ് പ്ലേറ്റും നിർമ്മാതാക്കൾ ഇതിൽ സ്ഥാപിച്ചിരിക്കുന്നു.

അകത്തളങ്ങളിൽ 2022 ട്യൂസണിന് പോർട്രെയിറ്റ് സ്റ്റൈൽ 10.25-ഇഞ്ച് ഇൻഫോടെയിൻമെന്റ് സ്‌ക്രീനും 10.25-ഇഞ്ച് ഫ്ലോട്ടിംഗ് ഡിജിറ്റൽ ഡ്രൈവർ ഡിസ്‌പ്ലേയും ഉള്ള ഒരു മിനിമലിസ്റ്റിക് ഡാഷ്‌ബോർഡ് ഡിസൈൻ ഉണ്ട്. ഇൻഫോടെയിൻമെന്റ് സ്‌ക്രീൻ നെയിം-ബ്രാൻഡ് ഓഡിയോ സിസ്റ്റവുമായി ജോടിയാക്കാൻ സാധ്യതയുണ്ട്.

പനോരമിക് സൺറൂഫ്, ത്രീ സോൺ ക്ലൈമറ്റ് കൺട്രോൾ, ഡിജിറ്റൽ കീ, എട്ട് തരത്തിൽ പവർഡ് & വെന്റിലേറ്റഡ് ഫ്രണ്ട് സീറ്റുകൾ എന്നിവ വാഹനം വാഗ്ദാനം ചെയ്യാൻ സാധ്യതയുള്ള മറ്റ് ഫീച്ചറുകളിൽ ഉൾപ്പെടുന്നു. ആറ് എയർബാഗുകൾ, 360-ഡിഗ്രി ക്യാമറ, ബ്ലൈൻഡ് സ്‌പോട്ട് മോണിറ്ററിംഗ്, ഓട്ടോ എമർജൻസി ബ്രേക്കിംഗ്, അഡാപ്റ്റീവ് ക്രൂയിസ് കൺട്രോൾ തുടങ്ങിയ ഡ്രൈവർ അസിസ്റ്റൻസ് ഫീച്ചറുകളുമൊത്ത് ഇത് വാഗ്ദാനം ചെയ്യപ്പെടാൻ സാധ്യതയുണ്ട്.

പുതിയ ഹ്യുണ്ടായി ട്യൂസോൺ പവർട്രെയിനുകൾ

മൈൽഡ്-ഹൈബ്രിഡ്, പ്ലഗ്-ഇൻ ഹൈബ്രിഡ് ഡ്രൈവ്ട്രെയിനുകൾ എന്നിവയുൾപ്പെടെ വിപുലമായ പവർട്രെയിനുകൾ വിദേശത്ത് നിർമ്മാതാക്കൾ ഓഫർ ചെയ്യുന്നു. ഇന്ത്യയിൽ ഏത് എഞ്ചിനുകളാണ് കാർ നിർമ്മാതാക്കൾ വാഗ്ദാനം ചെയ്യുന്നത് എന്ന് കണ്ടറിയണം.

നിലവിൽ, ആറ് സ്പീഡ് ഓട്ടോമാറ്റിക് ട്രാൻസ്മിഷനുമായി ജോടിയാക്കിയ 152 PS പവർ പുറപ്പെടുവിക്കുന്ന 2.0 ലിറ്റർ പെട്രോൾ എഞ്ചിനും എട്ട് സ്പീഡ് ഓട്ടോമാറ്റിക്ക് യൂണിറ്റുമായി ജോടിയാക്കിയ 185 PS കരുത്ത് സൃഷ്ടിക്കുന്ന 2.0 ലിറ്റർ ഡീസൽ എഞ്ചിനുമാണ് ട്യൂസോണിൽ വാഗ്ദാനം ചെയ്യുന്നത്. പുതിയ ട്യൂസോണിൽ ഒരു HTRAC ഓൾ വീൽ ഡ്രൈവ് (AWD) സംവിധാനവും നാം കാണും.

നാലാം തലമുറ ഹ്യുണ്ടായി ട്യൂസോൺ ഈ വർഷം രണ്ടാം പകുതിയിൽ വിൽപ്പനയ്‌ക്കെത്തും. 22.69 ലക്ഷം രൂപ എക്‌സ്-ഷോറൂം വിലയുള്ള മുൻഗാമിയേക്കാൾ ഇത് കൂടുതൽ പ്രീമിയമുള്ളതായിരിക്കും ഇതിന്റെ വില. ജീപ്പ് കോമ്പസ്, ഫോക്‌സ്‌വാഗൺ ടിഗ്വാൻ, സിട്രോൺ C5 എയർക്രോസ് എസ്‌യുവികൾ എന്നിവയ്ക്ക് എതിരെ മത്സരിക്കും.