ഇലക്ട്രിക് വിഭാഗത്തില്‍ Hyundai-യുടെ രണ്ടാമനായി Ioniq 5 എത്തുന്നു; അവതരണം നാളെ

കോന ഇലക്ട്രിക് എസ്‌യുവിക്ക് ശേഷം ഇന്ത്യയിലെ രണ്ടാമത്തെ ഇലക്ട്രിക് കാറായ അയോണിക് 5-ന്റെ ഔദ്യോഗിക അരങ്ങേറ്റത്തിനൊരുങ്ങുകയാണ് കൊറിയന്‍ നിര്‍മാതാക്കള്‍. ഹ്യുണ്ടായി മോട്ടോര്‍ നാളെ (ഡിസംബര്‍ 20) ഔദ്യോഗികമായി അവതരിപ്പിക്കുമെന്നാണ് അറിയിച്ചിരിക്കുന്നത്. ആഗോള വിപണിയില്‍ ഇതിനകം ലോഞ്ച് ചെയ്ത ഇലക്ട്രിക് ക്രോസ്ഓവറിന്റെ ബുക്കിംഗ് ഇതിനോടകം തന്നെ രാജ്യത്ത് ആരംഭിക്കുകയും ചെയ്തിട്ടുണ്ട്.

കഴിഞ്ഞ് ഒക്ടോബര്‍ 20 മുതലാണ് കമ്പനി അയോണിക് 5-നായുള്ള ബുക്കിംഗ് ആരംഭിക്കുന്നത്. ഉടന്‍ തന്നെ വാഹനം ഇന്ത്യന്‍ നിരത്തുകളിലെത്തുമെന്ന് വേണം പ്രതീക്ഷിക്കാന്‍. 2022-ല്‍ വേള്‍ഡ് കാര്‍ ഓഫ് ദി ഇയര്‍ നേടിയ മോഡലാണ് അയോണിക് 5. അതുകൊണ്ട് തന്നെ വലിയ പ്രതീക്ഷയിലാണ് കമ്പനി ഈ മോഡലിനെ രാജ്യത്ത് എത്തിക്കുന്നത്. ആദ്യം എത്തിച്ച കോന ഇലക്ട്രിക്കിന് വിപണിയില്‍ കാര്യമായി ഒന്നും തന്നെ ചെയ്യാന്‍ സാധിച്ചില്ല. അതുകൊണ്ട് തന്നെയാണ് വലിയ ഒരു ടൈം ഗ്യാപ്പ് ഇടാതെ അയോണിക്കിനെയും കമ്പനി അവതരിപ്പിക്കുന്നത്.

അടുത്ത മാസം ഡല്‍ഹിയില്‍ നടക്കുന്ന 2023 ഓട്ടോ എക്സ്പോയില്‍ കൊറിയന്‍ കാര്‍ നിര്‍മാതാവ് എല്ലാവര്‍ക്കും ഇലക്ട്രിക് ക്രോസ്ഓവര്‍ പ്രദര്‍ശിപ്പിക്കാന്‍ സാധ്യതയുണ്ട്. ഇവിയെക്കുറിച്ച് അറിഞ്ഞിരിക്കേണ്ട ചില പ്രധാന കാര്യങ്ങളാണ് ഇവിടെ പങ്കുവെയ്ക്കുന്നത്. കൊറിയന്‍ കാര്‍ നിര്‍മാതാക്കളില്‍ നിന്നുള്ള ഏറ്റവും പുതിയ e-GMP അല്ലെങ്കില്‍ ഇലക്ട്രിക് ഗ്ലോബല്‍ മോഡുലാര്‍ പ്ലാറ്റ്ഫോമില്‍ വികസിപ്പിച്ച ആദ്യത്തെ ഇലക്ട്രിക് വാഹനമാണ് ഹ്യുണ്ടായി അയോണിക് 5. അയോണിക് 5 അതിന്റെ സാങ്കേതിക കസിന്‍ കിയ EV6 മായി ഒരേ പ്ലാറ്റ്‌ഫോം പങ്കിടുന്നു.

ഈ വര്‍ഷം ആദ്യമാണ് കിയ EV6-നെ ഇന്ത്യന്‍ വിപണിയില്‍ എത്തിക്കുന്നത്. പരന്ന തറയുടെ അടിയില്‍ ബാറ്ററി പായ്ക്ക് സ്ഥാപിച്ച് സ്‌കേറ്റ്‌ബോര്‍ഡ് പോലെയാണ് പ്ലാറ്റ്‌ഫോം. ഒരാളുടെ ചോയ്സ് അനുസരിച്ച് സീറ്റും സ്റ്റോറേജ് സ്പെയ്സും ഉള്‍പ്പെടെ കസ്റ്റമൈസ് ചെയ്യാവുന്ന ഇന്റീരിയര്‍ അയോണിക് 5 വാഗ്ദാനം ചെയ്യുമെന്ന് ഹ്യുണ്ടായി ഇതിനകം സ്ഥിരീകരിച്ചിട്ടുണ്ട്. ഇവിയുടെ മുന്‍വശത്ത് പ്രീമിയം റിലാക്സേഷന്‍ സീറ്റ് വാഗ്ദാനം ചെയ്യും, ഇത് യാത്രകളിലും വിശ്രമ പ്രവര്‍ത്തനത്തിനും ഒപ്പം റിക്ലൈന്‍ ഫംഗ്ഷന്‍ നല്‍കുന്നു.

ഇലക്ട്രിക് അഡ്ജസ്റ്റ്മെന്റ്, ലംബര്‍ സപ്പോര്‍ട്ട് എന്നിവയും ഇതിലെ സവിശേഷതകളാണ്. ഇതിന്റെ മെലിഞ്ഞ ഡിസൈന്‍ ക്യാബിനിനുള്ളില്‍ കൂടുതല്‍ ഇടം തുറക്കാന്‍ സഹായിക്കും. രണ്ടാമത്തെ നിരയും ഫീച്ചറുകളുടെ കാര്യത്തില്‍ കൂടുതല്‍ വാഗ്ദാനം ചെയ്യുന്നു. കൂടുതല്‍ ലെഗ് സ്‌പേസ് തുറക്കുന്നതിനായി ഒരു ബട്ടണ്‍ അമര്‍ത്തി പിന്നില്‍ നിന്ന് കോ-ഡ്രൈവര്‍ സീറ്റ് ക്രമീകരിക്കുന്നതിന് പിന്നിലെ യാത്രക്കാര്‍ക്ക് അവരുടെ കൈകളില്‍ നിയന്ത്രണം ഉണ്ടായിരിക്കും. മൂന്ന് സീറ്റ് പൊസിഷനുകള്‍ക്കുള്ള ക്രമീകരണങ്ങളോടെയുള്ള മെമ്മറി ഫംഗ്ഷനും സീറ്റുകള്‍ വാഗ്ദാനം ചെയ്യുന്നു.

കൂടുതല്‍ കസ്റ്റമൈസേഷന്‍ ഓപ്ഷന്‍ വാഗ്ദാനം ചെയ്യുന്നതിനായി, 140 mm വരെ നീക്കാന്‍ കഴിയുന്ന സ്ലൈഡിംഗ് സെന്റര്‍ കണ്‍സോളും ഹ്യുണ്ടായി വാഹത്തില്‍ വാഗ്ദാനം ചെയ്യുന്നു. സുഖപ്രദമായ ഇരിപ്പിടവും ഇഷ്ടാനുസൃതമാക്കാവുന്ന സ്ഥലവും കൂടാതെ, ഹ്യുണ്ടായി അയോണിക് 5-ന്റെ ഇന്റീരിയര്‍ 12.3 ഇഞ്ച് HD ടച്ച്സ്‌ക്രീന്‍ പ്രധാന ഡിസ്പ്ലേ, മറ്റൊരു 12.3 ഇഞ്ച് ഡ്രൈവര്‍ ഡിസ്പ്ലേ, വയര്‍ലെസ് ഫോണ്‍ ചാര്‍ജിംഗ്, ഹെഡ്-അപ്പ് ഡിസ്‌പ്ലേ, സണ്‍റൂഫ് എന്നിവയും വാഗ്ദാനം ചെയ്യും. സുരക്ഷയുടെ കാര്യത്തില്‍, ഇന്ത്യന്‍ റോഡുകളിലെ ഏറ്റവും സുരക്ഷിതമായ ഒന്നായിരിക്കും അയോണിക് 5 എന്നാണ് കമ്പനി അവകാശപ്പെടുന്നത്.

യൂറോപ്പിലെ 2021 മോഡല്‍ യൂറോ NCAP ക്രാഷ് ടെസ്റ്റില്‍ 5 സ്റ്റാര്‍ സുരക്ഷാ റേറ്റിംഗ് നേടിയിരുന്നു. ഹ്യുണ്ടായി സ്മാര്‍ട്ട്‌സെന്‍സ് ലെവല്‍ 2 ADAS ഫംഗ്ഷണാലിറ്റി ഉള്‍പ്പെടെയുള്ള സുരക്ഷാ ഫീച്ചറുകളോടെയാണ് അയോണിക് 5 വരുന്നത്. ലെയ്ന്‍ കീപ്പ് അസിസ്റ്റ്, അഡാപ്റ്റീവ് ക്രൂയിസ് കണ്‍ട്രോള്‍, ഫോര്‍വേഡ് കൊളിഷന്‍ വാണിംഗ്, ഡ്രൈവര്‍ അറ്റന്‍ഷന്‍ വാണിംഗ് എന്നിങ്ങനെ 21 ഫീച്ചറുകള്‍ ഇതില്‍ ഉള്‍പ്പെടുന്നു. ഈ ഫീച്ചറുകളില്‍ ചിലത് ഈ വര്‍ഷം ആദ്യം തന്നെ പുതിയ തലമുറ ട്യൂസോണ്‍ എസ്‌യുവിയില്‍ കാര്‍ നിര്‍മ്മാതാവ് അവതരിപ്പിക്കുകയും ചെയ്തിട്ടുണ്ട്.

അതേസമയം ഇന്ത്യ-സ്‌പെക്ക് അയോണിക് 5-നൊപ്പം ലഭ്യമാകുന്ന ബാറ്ററിയുടെ വലുപ്പം ഹ്യുണ്ടായി പ്രഖ്യാപിച്ചിട്ടില്ല. ആഗോള വിപണികളില്‍, രണ്ട് ബാറ്ററി പായ്ക്കുകളോടുകൂടിയ ഇവി ഹ്യുണ്ടായി വാഗ്ദാനം ചെയ്യുന്നു. ചെറിയ 58 kWh ബാറ്ററി പായ്ക്ക് ഒറ്റ ചാര്‍ജില്‍ ഏകദേശം 385 കിലോമീറ്റര്‍ റേഞ്ച് വാഗ്ദാനം ചെയ്യുന്നു. 72.6 kWh ബാറ്ററി പാക്കും ഉണ്ട്, ഒറ്റ ചാര്‍ജില്‍ 480 കിലോമീറ്റര്‍ വരെ സഞ്ചരിക്കാന്‍ സാധിക്കും. 350 kW DC ഫാസ്റ്റ് ചാര്‍ജര്‍ ഉപയോഗിച്ച് 18 മിനിറ്റിനുള്ളില്‍ ബാറ്ററികള്‍ 80 ശതമാനം വരെ റീചാര്‍ജ് ചെയ്യാം.

കൊറിയന്‍ കാര്‍ നിര്‍മ്മാതാക്കളുടെ ഇന്ത്യയിലെ ഏറ്റവും ചെലവേറിയ മോഡലായി ഹ്യുണ്ടായി അയോണിക് 5 ഒരുങ്ങുന്നു. കിയ EV6 വില എന്തെങ്കിലും സൂചനയാണെങ്കില്‍, ഹ്യുണ്ടായി അയോണിക് 5-ന്റെ പ്രതീക്ഷിക്കുന്ന വില 50 ലക്ഷം കവിയാന്‍ സാധ്യതയുണ്ട്. ലോഞ്ച് ചെയ്യുമ്പോള്‍, അയോണിക് 5 വിപണിയില്‍ കിയ EV6 നും വോള്‍വോ XC40 റീചാര്‍ജ് ഉള്‍പ്പെടെയുള്ള മറ്റ് മോഡലുകള്‍ക്ക് എതിരെയാകും മത്സരിക്കുക. വാഹനം സംബന്ധിച്ചുള്ള കൂടുതൽ വിവരങ്ങൾ നാളെ മാത്രമാകും നിർമാതാക്കൾ വെളിപ്പെടുത്തുക.