ഫെബ്രുവരിയിൽ ഇല്ല! 2022 Compass Trailhawk -ന്റെ ലോഞ്ച് മാർച്ചിലേക്ക് മാറ്റി Jeep

പുതുക്കിയ മോഡലിന് അകത്തും പുറത്തും ശ്രദ്ധേയമായ കുറച്ച് മാറ്റങ്ങൾ ലഭിക്കും, അതേസമയം എഞ്ചിൻ സജ്ജീകരണം മാറ്റം കൂടാതെയിരിക്കും. പുതിയ കോമ്പസ് ട്രെയിൽഹോക്കിൽ പുതുതായി രൂപകൽപന ചെയ്ത ഹെഡ്‌ലാമ്പുകളും പുതിയ ഡയമണ്ട് കട്ട് അലോയി വീലുകളും ഉണ്ടായിരിക്കുമെന്ന് ഏറ്റവും പുതിയ സ്പൈ ചിത്രങ്ങൾ വെളിപ്പെടുത്തുന്നു.

മുന്നിലെയും പിന്നിലെയും ബമ്പറുകൾ വാഹനത്തിന്റെ അപ്പ്രോച്ച് & ഡിപ്പാർച്ചർ ആംഗിളുകൾ മെച്ചപ്പെടുത്തുന്നതിന് പരിഷ്കരിക്കും. A, B, C പില്ലറുകളിൽ ബ്ലാക്ക് ഫിനിഷ്, ഹുഡിലെ ബ്ലാക്ക് ഡിക്കലുകൾ, വിൻഡോ ബെൽറ്റ്‌ലൈനിലെ റെഡ് ഫിനിഷ്, റൂഫ്, റൂഫ് റെയിലുകൾ തുടങ്ങിയ ഡിസൈൻ ഘടകങ്ങൾ വാഹനത്തിന്റെ സ്‌പോർട്ടി രൂപത്തെ കൂടുതൽ മെച്ചപ്പെടുത്തും.

പിന്നിൽ 4X4, ട്രെയിൽഹോക്ക് ബാഡ്ജ് എന്നിവയുണ്ടാകും. സാധാരണ കോമ്പസ് ഫെയ്‌സ്‌ലിഫ്റ്റിന് സമാനമായി, 2022 -ലെ ജീപ്പ് കോമ്പസ് ട്രെയിൽഹോക്ക് ആൻഡ്രോയിഡ് ഓട്ടോ, ആപ്പിൾ കാർപ്ലേ, വോയ്‌സ് റെക്കഗ്നിഷൻ എന്നിവയെ പിന്തുണയ്‌ക്കുന്ന U-കണക്‌ട് 5 സോഫ്‌റ്റ്‌വെയർ സഹിതം പുതിയ 10.1 ഇഞ്ച് ടച്ച്‌സ്‌ക്രീൻ ഇൻഫോടെയിൻമെന്റ് സിസ്റ്റം വാഗ്ദാനം ചെയ്യും.

സോഫ്റ്റ് ടച്ച് ലെതർ സ്റ്റിച്ചിംഗുള്ള പുതുതായി രൂപകൽപ്പന ചെയ്ത ഡാഷ്‌ബോർഡ്, പുതിയ ഇൻസെർട്ടുകളുള്ള ഇൻസ്ട്രുമെന്റ് കൺസോൾ, പുതിയ സ്റ്റിയറിംഗ് വീൽ, 360 ഡിഗ്രി പാർക്കിംഗ് ക്യാമറ, വെന്റിലേറ്റഡ് സീറ്റുകൾ, വയർലെസ് സ്മാർട്ട്‌ഫോൺ ചാർജിംഗ്, കണക്റ്റഡ് കാർ ടെക്‌നോളജി എന്നിവയും ഫീച്ചറുകളുടെ പട്ടികയിൽ ഉൾപ്പെടും.

മുകളിൽ സൂചിപ്പിച്ചതുപോലെ, പുതിയ 2022 ജീപ്പ് കോമ്പസ് ട്രെയിൽ‌ഹോക്ക് ഫെയ്‌സ്‌ലിഫ്റ്റ് അതേ 2.0 ലിറ്റർ മൾട്ടിജെറ്റ് ഡീസൽ എഞ്ചിൻ ഉപയോഗിക്കുന്നത് തുടരും, ഇത് പരമാവധി 170 bhp കരുത്തും 350 Nm torque ഉം ഉത്പാദിപ്പിക്കും. മോട്ടോർ ഒമ്പത് സ്പീഡ് ഓട്ടോമാറ്റിക് ഗിയർബോക്സുമായി ജോടിയാക്കും. ആക്ടിവ് ഡ്രൈവ് 4X4 സിസ്റ്റം, റോക്ക് മോഡ്, ഹിൽ ഡിസന്റ് കൺട്രോൾ എന്നിവയുമായാണ് എസ്‌യുവി വരുന്നത്.

മറ്റ് അപ്‌ഡേറ്റുകളിൽ, 2022 പകുതിയോടെ ജീപ്പ് മെറിഡിയനൊപ്പം ഏഴ് സീറ്റർ എസ്‌യുവി സെഗ്‌മെന്റിലേക്ക് പ്രവേശിക്കാൻ അമേരിക്കൻ വാഹന നിർമ്മാതാക്കൾ തയ്യാറാണ്. 173 bhp കരുത്തും 200 Nm torque ഉം പുറപ്പെടുവിക്കുന്ന 2.0 ലിറ്റർ, ഫോർ സിലിണ്ടർ ടർബോ ഡീസൽ എഞ്ചിനാണ് എസ്‌യുവിക്ക് കരുത്ത് പകരുന്നത്.

48V മൈൽഡ് ഹൈബ്രിഡ് സിസ്റ്റം ഉപയോഗിച്ച് ഓയിൽ ബർണർ ബൂസ്റ്റ് ചെയ്യാൻ സാധ്യതയുണ്ട്. നിലവിൽ ബ്രസീലിയൻ വിപണിയിൽ വിൽപനയിലുള്ള ജീപ്പ് കമാൻഡറിനെ അടിസ്ഥാനമാക്കിയായിരിക്കും മെറിഡിയൻ ഒരുങ്ങുന്നത്. ഏകദേശം 28 ലക്ഷം മുതൽ 35 ലക്ഷം രൂപ വരെയാണ് ഏഴ് സീറ്റർ മോഡലിന് ലഭിച്ചേക്കാവുന്ന എക്സ്-ഷോറൂം വില.

രാജ്യത്ത് വരാനിരിക്കുന്ന ജീപ്പ് എസ്‌യുവികളുടെ പട്ടികയിലെ അടുത്ത മോഡൽ ഒരു പുതിയ സബ് ഫോർ മീറ്റർ എസ്‌യുവിയാണ്, ഇത് നിലവിൽ ബ്രാൻഡിന്റെ അണിയറയിൽ ഒരുക്കത്തിലാണ്.

സ്റ്റെല്ലാന്റിസിന്റെ പുതിയ CMP (കോമൺ മോഡുലാർ പ്ലാറ്റ്ഫോം) അടിസ്ഥാനമാക്കിയുള്ള സബ് ഫോർ മീറ്റർ എസ്‌യുവി 2023-24 -ൽ ഇന്ത്യയിൽ വിൽപ്പനയ്‌ക്കെത്തുമെന്ന് കമ്പനി സ്ഥിരീകരിച്ചു.

റെനഗേഡിന് താഴെ സ്ഥാനം പിടിക്കുന്ന, ചെറിയ എസ്‌യുവി മാരുതി ബ്രെസ, ടാറ്റ നെക്‌സോൺ, ഹ്യുണ്ടായി വെന്യു, മഹീന്ദ്ര XUV300, കിയ സെൽറ്റോസ് എന്നിവയ്‌ക്കെതിരെ കൊമ്പുകോർക്കും.

വാഹനത്തെക്കുറിച്ചുള്ള വിശദാംശങ്ങൾ ഇനിയും പ്രഖ്യാപിച്ചിട്ടില്ലെങ്കിലും, പുതിയ കോംപാക്റ്റ് എസ്‌യുവിയിൽ ഓഫ്-റോഡ് കഴിവുകൾക്കൊപ്പം സിഗ്നേച്ചർ എസ്‌യുവി പോലുള്ള പരുക്കൻ രൂപകൽപ്പനയും ഉണ്ടായിരിക്കുമെന്ന് പ്രതീക്ഷിക്കുന്നു.

റിപ്പോർട്ടുകൾ വിശ്വസിക്കാമെങ്കിൽ, പുതിയ ജീപ്പ് സബ് ഫോർ മീറ്റർ എസ്‌യുവിക്ക് 1.2 ലിറ്റർ ടർബോചാർജ്ഡ് പെട്രോൾ എഞ്ചിനാണ് കരുത്ത് പകരുന്നത്. ഈ എഞ്ചിൻ പരമാവധി 130 bhp കരുത്ത് ഉത്പാദിപ്പിക്കും.

വാഹനത്തിന് ഹൈബ്രിഡ് പവർട്രെയിൻ ലഭിക്കുമെന്ന് റിപ്പോർട്ട് സൂചിപ്പിക്കുന്നു. എന്നിരുന്നാലും, ഹൈബ്രിഡ് അല്ലെങ്കിൽ ഇലക്ട്രിക് പതിപ്പിന്റെ ഇന്ത്യ-ലോഞ്ച് ഇതുവരെ സ്ഥിരീകരിച്ചിട്ടില്ല. 9.0 ലക്ഷം മുതൽ 14 ലക്ഷം രൂപ വരെയാണ് ഈ മോഡലിന് ഞങ്ങൾ പ്രതീക്ഷിക്കുന്ന എക്സ്-ഷോറൂം വില.