Fortuner -ന് വെല്ലുവിളിയായി Meridian എത്തുന്നു; ഏഴ് സീറ്റർ എസ്‌യുവിയുടെ ടീസർ പങ്കിട്ട് Jeep

വരാനിരിക്കുന്ന ഏഴ് സീറ്റർ എസ്‌യുവിക്ക് ജീപ്പ് മെറിഡിയൻ എന്നാണ് പേര് നൽകിയിരിക്കുന്നതെന്നും ടീസർ സ്ഥിരീകരിക്കുന്നു. എസ്‌യുവി പൂർണമായും 'മെയ്ഡ്-ഇൻ-ഇന്ത്യ' പ്രൊഡക്ട് ആണെന്നാണ് കമ്പനി അവകാശപ്പെടുന്നത്.

വിവിധ സംസ്ഥാനങ്ങളെയും സംസ്‌കാരങ്ങളെയും ബന്ധിപ്പിക്കുന്ന ഇന്ത്യയുടെ ലെഗ്ത്തിലൂടെ കടന്നുപോകുന്ന രേഖയിൽ നിന്നാണ് "മെറിഡിയൻ" എന്ന പേര് പ്രചോദനം ഉൾക്കൊണ്ടിരിക്കുന്നത്. 2022 -ന്റെ മധ്യത്തിൽ ലോഞ്ച് ചെയ്യാനിരിക്കുന്ന വരാനിരിക്കുന്ന മൂന്ന് വരി ജീപ്പ് മെറിഡിയന്റെ ഒരു ക്യാമൊഫ്ലാഗ് ചിത്രവും ടീസർ വീഡിയോയും കമ്പനി പുറത്തിറക്കിയിട്ടുണ്ട്.

കാശ്മീർ മുതൽ കന്യാകുമാരി വരെയുള്ള 5,000 കിലോമീറ്ററിലധികം ദൂരത്തിൽ പുതിയ മെറിഡിയൻ എസ്‌യുവി തീവ്രമായ പരീക്ഷണത്തിലൂടെ കടന്നുപോയതായി ടീസർ വീഡിയോ വെളിപ്പെടുത്തുന്നു.

വീഡിയോയിൽ കാണുന്ന എസ്‌യുവി വിവിധ സംസ്ഥാനങ്ങളിൽ നിന്നുള്ള ഐക്കണുകൾ വെളിപ്പെടുത്തുന്ന ഒരു പ്രത്യേക ക്യാമൊഫ്ലാജിൽ മൂടിയിരിക്കുന്നു. ഈ ഐക്കണുകളിൽ ചിലത് ഡൽഹിയിൽ നിന്നുള്ള ഇന്ത്യാ ഗേറ്റ്, രാജസ്ഥാനിലെ ഒട്ടകം, മധ്യപ്രദേശിലെ കടുവ, കർണാടകയിലെ ആന തുടങ്ങിയവയാണ്.

ജീപ്പ് മെറിഡിയൻ അടിസ്ഥാനപരമായി കോമ്പസിന്റെ ഏഴ് സീറ്റർ പതിപ്പാണ്, ഇത് ഇതിനകം തന്നെ തെരഞ്ഞെടുത്ത അന്താരാഷ്ട്ര വിപണികളിൽ കമാൻഡർ എന്ന പേരിൽ വിൽപ്പനയ്‌ക്ക് എത്തുന്നുണ്ട്. എന്നിരുന്നാലും, ഈ പേര് ഇതിനോടകം തന്നെ മഹീന്ദ്ര ട്രേഡ്മാർക്ക് ചെയ്തിട്ടുള്ളതാണ്. കമാൻഡർ എന്നൊരു എസ്‌യുവിയെ മഹീന്ദ്ര ഇന്ത്യൻ വിപണിയിൽ വിറ്റിരുന്നു.

എസ്‌യുവിയുടെ ഫ്രണ്ട് പ്രൊഫൈൽ കോമ്പസിന് സമാനമാണ്; എന്നിരുന്നാലും, ജീപ്പ് ഒരു പുതിയ എക്സ്പീരിയൻസ് നൽകുന്നതിന് ചില മാറ്റങ്ങൾ വരുത്തിയിട്ടുണ്ട്. എസ്‌യുവിക്ക് എൽഇഡി ഡിആർഎൽ (ഡേടൈം റണ്ണിംഗ് ലാമ്പുകൾ) ഉള്ള പുതിയതും മെലിഞ്ഞതുമായ എൽഇഡി പ്രൊജക്ടർ ഹെഡ്‌ലാമ്പുകൾ ലഭിക്കുന്നു.

അതോടൊപ്പം സിഗ്നേച്ചർ ഏഴ് സ്ലാറ്റ് ഗ്രില്ലും പരന്ന ബോണറ്റും പരുക്കൻ ലുക്കിനായി ലഭിക്കുന്നു. ചതുരാകൃതിയിലുള്ള വീൽ ആർച്ചുകളുമായാണ് ജീപ്പ് മെറിഡിയൻ വരുന്നത്. ഗ്രാൻഡ് വാഗനീർ, ഗ്രാൻഡ് ചെറോക്കി എന്നിവയുൾപ്പെടെയുള്ള വലിയ ജീപ്പുകളിൽ നിന്ന് പിൻവശത്തെ പ്രൊഫൈൽ വളരെയധികം പ്രചോദനം ഉൾക്കൊണ്ടതായി തോന്നുന്നു.

ജീപ്പ് മെറിഡിയൻ വലിപ്പത്തിൽ കമാൻഡറിന് സമാനമായിരിക്കും. ഇതിന് 4,769 mm നീളവും 1,859 mm വീതിയും 1,682 mm ഉയരവുമുണ്ട്, കൂടാതെ 2,794 mm വീൽബേസുമുണ്ട്. നീളം കൂടിയ ബോഡിയെ ഉൾക്കൊള്ളാൻ വീൽബേസ് 158 mm വർധിപ്പിച്ചിട്ടുണ്ട്. കോമ്പസുമായി താരതമ്യപ്പെടുത്തുമ്പോൾ, പുതിയ മെറിഡിയന് ഏകദേശം 364 mm നീളവും 41 mm വീതിയും 42 mm ഉയരവും കൂടുതലുണ്ട്.

ജീപ്പ് മെറിഡിയന്റെ ഉൾവശം വെളിപ്പെടുത്തിയിട്ടില്ല; എന്നിരുന്നാലും, ഇത് പുതുക്കിയ കോമ്പസിന് സമാനമായിരിക്കാൻ സാധ്യതയുണ്ട്. എസ്‌യുവിയിൽ 10.21 ഇഞ്ച് ഡിജിറ്റൽ ഇൻസ്ട്രുമെന്റ് കൺസോളും വയർലെസ് കണക്റ്റിവിറ്റിയുള്ള 10.1 ഇഞ്ച് ടച്ച്‌സ്‌ക്രീൻ ഇൻഫോടെയിൻമെന്റ് സിസ്റ്റവും ഉണ്ടാകും. രണ്ടാം നിരയിൽ ക്യാപ്റ്റൻ സീറ്റുകളുള്ള ആറ് സീറ്റ് ബെഞ്ച് സീറ്റുകളുള ഏഴ് സീറ്റ് ഓപ്ഷനുകളിൽ ഇത് വാഗ്ദാനം ചെയ്യും.

വരാനിരിക്കുന്ന ജീപ്പ് മെറിഡിയൻ ഏഴ് സീറ്റർ എസ്‌യുവിക്ക് 2.0 ലിറ്റർ നാല് സിലിണ്ടർ ടർബോചാർജ്ഡ് ഡീസൽ എഞ്ചിൻ കരുത്ത് പകരും, ഇതിന് 48V മൈൽഡ് ഹൈബ്രിഡ് സിസ്റ്റം ലഭിക്കാൻ സാധ്യതയുണ്ട്. ഇത് ഏകദേശം 200 bhp പവർ ഉത്പാദിപ്പിക്കാൻ സാധ്യതയുണ്ട്, കൂടാതെ AWD സിസ്റ്റമുള്ള ഒമ്പത് സ്പീഡ് ഓട്ടോമാറ്റിക് ഗിയർബോക്സുമായി ജോടിയാക്കും.

മറ്റ് അനുബന്ധ വാർത്തകളിൽ ഈ മാസം നിശ്ചയിച്ചിരുന്ന കോമ്പസ് ട്രെയിൽഹോക്കിന്റെ ലോഞ്ച് ജീപ്പ് മാർച്ചിലേക്ക് മാറ്റി വെച്ചു. പുതുക്കിയ മോഡലിന് ഇന്റീരിയറിലും എക്സ്റ്റീരിയറിലും ശ്രദ്ധേയമായ പല മാറ്റങ്ങളും ലഭിക്കും, അതേസമയം എഞ്ചിൻ സെറ്റപ്പ് മാറ്റം കൂടാതെ തുടരും എന്നാണ് റിപ്പോർട്ടുകൾ സൂചിപ്പിക്കുന്നത്.

ഇന്ത്യയിൽ അവതരിപ്പിക്കാനിരിക്കുന്ന ജീപ്പ് എസ്‌യുവികളുടെ ലിസ്റ്റിൽ ഒരു പുതിയ സബ് ഫോർ മീറ്റർ എസ്‌യുവിയും ഉണ്ടാവും, സ്റ്റെല്ലാന്റിസിന്റെ പുതിയ കോമൺ മോഡുലാർ പ്ലാറ്റ്ഫോം (CMP) അടിസ്ഥാനമാക്കിയാവും സബ് ഫോർ മീറ്റർ എസ്‌യുവി ഒരുങ്ങുന്നത്. ഇത് 2023-24 കാലയളവിൽ രാജ്യത്ത് വിൽപ്പനയ്‌ക്കെത്തുമെന്ന് ബ്രാൻഡ് സ്ഥിരീകരിച്ചു.