പുണെയില്‍ കോടികള്‍ മുടക്കി Mahindra പുതിയ ഇവി പ്ലാന്റ് തുറക്കുന്നു; വന്‍ നിക്ഷേപ പദ്ധതിയെ കുറിച്ച് അറിയാം...

ഇന്ത്യന്‍ ഇലക്ട്രിക് വാഹന വിപണിയിലെ ടാറ്റ മോട്ടോര്‍സിന്റെ കുത്തക പൊളിക്കാന്‍ ഉറച്ചാണ് മഹീന്ദ്ര ആന്‍ഡ് മഹീന്ദ്ര ഭാവി പദ്ധതികള്‍ ആസൂത്രണം ചെയ്യുന്നത്. തങ്ങളുടെ വരാനിരിക്കുന്ന ഇലക്ട്രിക് വാഹനങ്ങള്‍ക്കായി രാജ്യത്ത് ഒരു വന്‍ സെറ്റപ്പിലുള്ള നിര്‍മ്മാണ കേന്ദ്രം സ്ഥാപിക്കാന്‍ ഒരുങ്ങുകയാണ് മഹീന്ദ്ര ആന്‍ഡ് മഹീന്ദ്ര.

വരാനിരിക്കുന്ന ഈ അത്യാധുനിക ഇവി നിര്‍മ്മാണ പ്ലാന്റ് മഹാരാഷ്ട്രയിലെ പൂനെയിലാണ് സ്ഥിതി ചെയ്യുന്നത്. ഈ സൗകര്യത്തിന്റെ വികസനത്തിനായി വാഹന നിര്‍മ്മാതാവ് 10,000 കോടി രൂപ നിക്ഷേപിക്കുമെന്ന് പറയപ്പെടുന്നു. വിശദാംശങ്ങളിലേക്ക് കടക്കുമ്പോള്‍, മഹീന്ദ്രയുടെ ഈ ഏറ്റവും പുതിയ നിക്ഷേപത്തിന് മഹാരാഷ്ട്ര സര്‍ക്കാരിന്റെ ഇലക്ട്രിക് വാഹനങ്ങള്‍ക്കായുള്ള വ്യാവസായിക പ്രോത്സാഹന പദ്ധതിക്ക് കീഴില്‍ ഇതിനകം അംഗീകാരം ലഭിച്ചിട്ടുണ്ട്. മഹാരാഷ്ട്ര സര്‍ക്കാരിന്റെ തുടര്‍ച്ചയായ പിന്തുണയ്ക്ക് മഹീന്ദ്ര ആന്‍ഡ് മഹീന്ദ്രയുടെ ഓട്ടോ ആന്‍ഡ് ഫാം സെക്ടറിന്റെ എക്സിക്യൂട്ടീവ് ഡയറക്ടര്‍ രാജേഷ് ജജുരിക്കര്‍ നന്ദി അറിയിച്ചു.

കഴിഞ്ഞ 70 വര്‍ഷമായി മഹാരാഷ്ട്ര മഹീന്ദ്രയുടെ 'ഹോം' സംസ്ഥാനമാണെന്നും വ്യാപാരം എളുപ്പമാക്കുന്നതിലും പുരോഗമന നയങ്ങളിലും സംസ്ഥാന സര്‍ക്കാരിന്റെ ശ്രദ്ധയെ അഭിനന്ദിക്കുന്നതായും അദ്ദേഹം കൂട്ടിച്ചേര്‍ത്തു. സംസ്ഥാനത്ത് കൂടുതല്‍ ഇന്ത്യന്‍, വിദേശ നിക്ഷേപം ആകര്‍ഷിക്കുന്നതിലൂടെ മഹാരാഷ്ട്ര ഇന്ത്യയുടെ ഇവി ഹബ്ബായി മാറുമെന്നും അദ്ദേഹം കൂട്ടിച്ചേര്‍ത്തു.നേരത്തെ, മഹീന്ദ്ര അതിന്റെ രണ്ട് ഇലക്ട്രിക് എസ്‌യുവി ബ്രാന്‍ഡുകളായ BE, XUV എന്നിവ അവതരിപ്പിച്ചിരുന്നു. മാത്രമല്ല ഈ രണ്ട് പുതിയ ഇവി ബ്രാന്‍ഡുകള്‍ക്ക് കീഴിലാണ് പുതിയ അഞ്ച് ഫുള്‍ ഇലക്ട്രിക് എസ്‌യുവികള്‍ അവതരിപ്പിക്കാന്‍ മഹീന്ദ്ര ഒരുങ്ങുന്നത്.

ഇതില്‍ XUV.e8, XUV.e9, BE.05, BE.07, BE.09 എന്നിവ ഉള്‍പ്പെടുന്നു.ഈ എസ്‌യുവി കള്‍ രണ്ട് വ്യത്യസ്ത ബ്രാന്‍ഡുകള്‍ക്ക് കീഴിലാണ് വരുന്നതെങ്കിലും, വരാനിരിക്കുന്ന ഈ ഇലക്ട്രിക് വാഹനങ്ങളെല്ലാം മഹീന്ദ്രയുടെ പുതിയ ഹാര്‍ട്ട്കോര്‍ ഡിസൈന്‍ ഫിലോസഫിയും INGLO പ്ലാറ്റ്ഫോമും ഉള്‍ക്കൊള്ളുന്നു എന്നതും എടുത്തുപറയേണ്ടതാണ്. കൂടാതെ, XUV.e8, XUV.e9, BE.05, BE.07 എന്നിവ 2024-നും 2026-നും ഇടയില്‍ പുറത്തിറങ്ങുമെന്നാണ് മഹീന്ദ്ര പറയുന്നത്. അതേസമയം BE.09 ഇലക്ട്രിക് എസ്‌യുവി ഏത് വര്‍ഷം ലോഞ്ച് ആവുമെന്ന കാര്യം മഹീന്ദ്ര ഇതുവരെ വെളിപ്പെടുത്തിയിട്ടില്ല.

പറഞ്ഞുവരുന്നത്, പുതിയ INGLO പ്ലാറ്റ്ഫോം ഓഗ്മെന്റഡ് റിയാലിറ്റി-പ്രാപ്തമാക്കിയ ഹെഡ്സ്-അപ്പ് ഡിസ്പ്ലേകള്‍, 5G നെറ്റ്വര്‍ക്ക് അനുയോജ്യത, കണക്റ്റഡ് കാര്‍ ടെക്, OTA അപ്ഡേറ്റുകള്‍, എഡ്ജ്-ടു-എഡ്ജ് സ്‌ക്രീനുകള്‍ എന്നിവ പോലുള്ള അത്യാധുനിക സവിശേഷതകളുമായി പൊരുത്തപ്പെടും. അതിലുപരിയായി, INGLO പ്ലാറ്റ്ഫോം മോഡുലാര്‍, സ്‌കേലബിള്‍ ഡിസൈന്‍ ഉള്ള വളരെ ഒപ്റ്റിമൈസ് ചെയ്ത ആര്‍ക്കിടെക്ചറാണെന്നാണ് മഹീന്ദ്ര അവകാശപ്പെടുന്നത്. INGLO പ്ലാറ്റ്ഫോം എഞ്ചിനീയര്‍മാരെ ഒന്നിലധികം മഹീന്ദ്ര ഇലക്ട്രിക് എസ്‌യുവികള്‍ വികസിപ്പിക്കാന്‍ അനുവദിക്കുന്നു.

ഇത് കൂടാതെ, INGLO പ്ലാറ്റ്ഫോമില്‍ നിര്‍മ്മിച്ച ഇലക്ട്രിക് എസ്‌യുവികളില്‍ സെമി-ആക്ടീവ് സസ്‌പെന്‍ഷന്‍ സിസ്റ്റം, ഡ്യുവല്‍-പിനിയന്‍ ഹൈ പവര്‍ സ്റ്റിയറിംഗ് സിസ്റ്റം, ബ്രേക്ക്-ബൈ-വയര്‍ ടെക്‌നോളജി തുടങ്ങിയ സാങ്കേതിക വിദ്യകള്‍ ഉണ്ടായിരിക്കുമെന്ന് മഹീന്ദ്ര പറഞ്ഞു. INGLO പ്ലാറ്റ്ഫോം 80kWh വരെയുള്ള ബാറ്ററി ശേഷിയെ പിന്തുണയ്ക്കുമെന്നും 175kW വരെ ഫാസ്റ്റ് ചാര്‍ജ് ചെയ്യാനും കഴിയുമെന്ന് മഹീന്ദ്ര നേരത്തെ സ്ഥിരീകരിച്ചിരുന്നു. വാസ്തവത്തില്‍, INGLO പ്ലാറ്റ്ഫോമില്‍ നിര്‍മ്മിച്ച ഇലക്ട്രിക് വാഹനങ്ങള്‍ക്ക് കേവലം 30 മിനിറ്റിനുള്ളില്‍ അവയുടെ ശേഷിയുടെ 80 ശതമാനം വരെ ചാര്‍ജ് ചെയ്യാന്‍ കഴിയുമെന്ന് മഹീന്ദ്ര പറയുന്നു.

കൂടാതെ, പുതിയ ഇലക്ട്രിക് എസ്‌യുവി ശ്രേണിയില്‍ റിയര്‍-വീല്‍-ഡ്രൈവ്, ഓള്‍-വീല്‍-ഡ്രൈവ് ലേഔട്ടുകള്‍ ഉള്‍പ്പെടുന്നുവെന്ന് മഹീന്ദ്ര അവകാശപ്പെട്ടു. റിയര്‍-വീല്‍ ഡ്രൈവ് മോഡലുകള്‍ക്ക് 228 bhp വരെ പവര്‍ ഔട്ട്പുട്ട് ഉണ്ടെന്ന് അവകാശപ്പെടുമ്പോള്‍, കൂടുതല്‍ ശക്തമായ AWD മോഡലുകള്‍ക്ക് 335 bhp വരെ പവര്‍ ഔട്ട്പുട്ട് ഉണ്ടാകുമെന്ന് പറയപ്പെടുന്നു. മഹീന്ദ്രയില്‍ നിന്ന് പുതിയ തലമുറ ഇലക്ട്രിക് എസ്‌യുവികള്‍ പുറത്തിറക്കുന്നതോടൊപ്പം മറ്റ് കാര്‍ നിര്‍മ്മാതാക്കളും ഇന്ത്യയില്‍ ഇവി വികസനത്തില്‍ വന്‍തോതില്‍ നിക്ഷേപം നടത്താന്‍ തുടങ്ങുന്നുണ്ട്.

ഇതിനാല്‍ തന്നെ സമീപഭാവിയില്‍ ഇന്ത്യന്‍ ഓട്ടോമൊബൈല്‍ വിപണിയില്‍ ധാരാളം മാറ്റങ്ങള്‍ക്ക് സാക്ഷ്യം വഹിക്കാന്‍ നമുക്ക് കഴിഞ്ഞേക്കും. അത്തരമൊരു പരിവര്‍ത്തനത്തിന് ഒരു പുതിയ തരം നിര്‍മ്മാണ പ്ലാന്റും സൗകര്യവും ആവശ്യമാണ്. കൂടാതെ മഹീന്ദ്രയുടെ പൂനെയിലെ വരാനിരിക്കുന്ന ഇവി പ്ലാന്റ് ഇന്ത്യയിലെ ഇവി വിപ്ലവത്തിന്റെ പുതിയ വഴിവെട്ടും.