കൂടുതൽ പവറും അപ്പ് മാർക്കറ്റ് ഇന്റീരിയറും; 2023 Mahindra XUV300 -ൽ വന്നേക്കാവുന്ന അപ്പ്ഗ്രേഡുകൾ

2023 മഹീന്ദ്ര XUV300 ഫെയ്‌സ്‌ലിഫ്റ്റ് ഒന്നിലധികം തവണ ഇന്ത്യൻ റോഡുകളിൽ പരീക്ഷണയോട്ടത്തിനിടെ ക്യാമറ കണ്ണിൽപ്പെട്ടിട്ടുണ്ട്. ഡിസൈൻ മാറ്റങ്ങളും നവീകരിച്ച ഇന്റീരിയർ സഹിതം കൂടുതൽ ശക്തമായ എഞ്ചിൻ ഓപ്ഷനുമായാണ് ഇത് വരുന്നത്.

2023 മഹീന്ദ്ര XUV300 - എഞ്ചിൻ സവിശേഷതകൾ

2020 ഓട്ടോ എക്‌സ്‌പോയിൽ പുതിയ എംസ്റ്റാലിയൻ സീരീസ് പെട്രോൾ എഞ്ചിനുകൾ മഹീന്ദ്ര പ്രദർശിപ്പിച്ചിരുന്നു. 1.2 ലിറ്റർ, 1.5 ലിറ്റർ, 2.0 ലിറ്റർ ടർബോ പെട്രോൾ എഞ്ചിനുകൾ കമ്പനി പുറത്തിറക്കിയിരുന്നു.

2.0 ലിറ്റർ എഞ്ചിൻ പുതിയ ഥാർ ലൈഫ്‌സ്‌റ്റൈൽ എസ്‌യുവിയിൽ അരങ്ങേറി, കൂടാതെ XUV700 -നൊപ്പവും ഇത് ഓഫർ ചെയ്തിട്ടുണ്ട്. വാസ്‌തവത്തിൽ, വരാനിരിക്കുന്ന സ്‌കോർപിയോയിലും ഈ എഞ്ചിൻ ഉണ്ടായിരിക്കും. ചെറിയ ശേഷിയുള്ള 1.2 ലിറ്റർ ടർബോ എഞ്ചിൻ 2023 മഹീന്ദ്ര XUV300 -ൽ നിർമ്മാതാക്കൾ അവതരിപ്പിക്കും.

XUV300 സ്പോർട്സ് പുതിയ 1.2 ലിറ്റർ എംസ്റ്റാലിയൻ എഞ്ചിനുമായി കമ്പനി പ്രദർശിപ്പിച്ചിരുന്നു; എന്നിരുന്നാലും, ഈ വേരിയന്റ് ഇതുവരെ ഇന്ത്യൻ വിപണിയിൽ അവതരിപ്പിച്ചിട്ടില്ല.

മികച്ച പ്രകടനത്തിനും കാര്യക്ഷമതയ്‌ക്കുമായി സംയോജിത എക്‌സ്‌ഹോസ്റ്റ് മാനിഫോൾഡുകളുള്ള ഡയറക്‌ട് ഇഞ്ചക്ഷനും സിലിണ്ടർ ഹെഡുകളും പുതിയ എഞ്ചിന്റെ സവിശേഷതയാണ്. നവീകരിച്ച ബിഎസ് VI എമിഷൻ മാനദണ്ഡങ്ങൾക്ക് അനുസൃതമായ ഈ എഞ്ചിനുകൾ 2023 -ൽ അവതരിപ്പിക്കും.

പുതിയ 1.2 ലിറ്റർ T-GDI എഞ്ചിന് 130 bhp പവറും 230 Nm torque ഉം ഉൽപ്പാദിപ്പിക്കാൻ കഴിയും, അത് നിലവിലെ 1.2 ലിറ്റർ ടർബോ പെട്രോൾ എഞ്ചിനേക്കാൾ 20 bhp കൂടുതൽ പവറും 30 Nm കൂടുതൽ torque ഉം പുറപ്പെടുവിക്കുന്നു.

പുതിയ എഞ്ചിൻ ടോപ്പ് സ്പെക്ക് വേരിയന്റുകളിൽ വാഗ്ദാനം ചെയ്യാൻ സാധ്യതയുണ്ട്, അതേസമയം ലോവർ-സ്പെക്ക് മോഡലുകൾ നിലവിലുള്ള മോട്ടോറിനൊപ്പം തുടരാം. ഡീസൽ പതിപ്പ് 1.5 ലിറ്റർ എഞ്ചിനോടൊപ്പം വാഗ്ദാനം ചെയ്യുന്നത് തുടരും. AMT -ക്ക് പകരം, പുതിയ XUV300 ഫെയ്‌സ്‌ലിഫ്റ്റിന് ശരിയായ ഓട്ടോമാറ്റിക് ഗിയർബോക്‌സും (ടോർക്ക് കൺവെർട്ടർ അല്ലെങ്കിൽ DCT) ലഭിക്കും.

2023 മഹീന്ദ്ര XUV300 - ഡിസൈനും ഇന്റീരിയറും

പുതിയ XUV700 -നൊപ്പം പുതിയ XUV300 -ന് ഡിസൈൻ മാറ്റങ്ങൾ ലഭിക്കും. ബോൾഡർ ഡിസൈനുമായി ഇത് വരുമെന്ന് പ്രതീക്ഷിക്കുന്നു. വലിയ വെർട്ടിക്കൽ ക്രോം സ്ലാറ്റുകളോട് കൂടിയ, വലുതും ബോൾഡറുമായ ഗ്രില്ല്, പൂർണ്ണ എൽഇഡി ഹെഡ്‌ലാമ്പുകൾ, പുതുക്കിയ ടെയിൽ-ലൈറ്റുകൾ, പുതിയ അലോയ് വീലുകൾ എന്നിവ വാഹനത്തിന് ലഭിക്കുമെന്ന് പ്രതീക്ഷിക്കുന്നു.

2023 മഹീന്ദ്ര XUV300 ഫെയ്‌സ്‌ലിഫ്റ്റ് പുതിയ ഇന്റീരിയറോടെയാണ് വരുന്നത്, പുതിയ ഡാഷ്‌ബോർഡും ഉയർന്ന നിലവാരമുള്ള മെറ്റീരിയലും ഇതിൽ ഫീച്ചർ ചെയ്യുന്നു. ഇത് ഒരു പുതിയ ടച്ച്‌സ്‌ക്രീൻ ഇൻഫോടെയിൻമെന്റ് സിസ്റ്റത്തോടൊപ്പമായിരിക്കും എത്തുക, അത് XUV700 -ൽ നിന്ന് സോഴ്സ് ചെയ്യാൻ സാധ്യതയുണ്ട്. XUV700-ന്റെ ഇൻഫോടെയിൻമെന്റിൽ വാഗ്ദാനം ചെയ്യുന്ന യൂസർ ഇന്റർഫേസിനും സാങ്കേതികവിദ്യയ്ക്കും സമാനമായ ഡിസൈനുള്ള ടച്ച്‌സ്‌ക്രീൻ ഉപയോഗിക്കാനാണ് സാധ്യത.

ലോഞ്ച് ടൈംലൈൻ

2022 ഏപ്രിൽ മുതൽ 2023 മാർച്ച് വരെയുള്ള ഈ സാമ്പത്തിക വർഷത്തിന്റെ അവസാനത്തിന് മുമ്പ് പുതിയ XUV300 ഫേസ്‌ലിഫ്റ്റ് പുറത്തിറക്കുമെന്ന് മഹീന്ദ്ര ഔദ്യോഗികമായി പ്രഖ്യാപിച്ചു. ഇത് 2022 ഡിസംബറിലോ 2023 ജനുവരിയിലോ ലോഞ്ച് ചെയ്യുമെന്നാണ് റിപ്പോർട്ടുകൾ സൂചിപ്പിക്കുന്നത്.