മൈലേജിന്റെ കാര്യത്തില്‍ ഇനി വിട്ടുവീഴ്ചയില്ല; Celerio-യുടെ സിഎന്‍ജി വേരിയന്റിനെ അവതരിപ്പിച്ച് Maruti

സ്റ്റാന്‍ഡേര്‍ഡ് സെലെറിയോയുടെ അതേ ഡ്യുവല്‍ജെറ്റ് 1.0-ലിറ്റര്‍ പെട്രോള്‍ എഞ്ചിനാണ് ഇതിനും ലഭിക്കുന്നത്. സിഎന്‍ജി വേരിയന്റില്‍ 35.6 കിലോമീറ്റര്‍ ഇന്ധനക്ഷമതയും കമ്പനി അവകാശപ്പെടുന്നു.

ഡിസൈനും ഫീച്ചറുകളും അടുത്തിടെ വിപണിയില്‍ എത്തിയ പതിപ്പിന് സമാനമായി തുടരുമ്പോള്‍ ഫാക്ടറിയില്‍ ഘടിപ്പിച്ച സിഎന്‍ജി കിറ്റാണ് ഈ മോഡലിന്റെ പ്രധാന സവിശേഷത. സിഎന്‍ജി പവര്‍ട്രെയിന്‍ കാറിന്റെ പ്രവര്‍ത്തനച്ചെലവ് കുറയ്ക്കാന്‍ സഹായിക്കുക മാത്രമല്ല, മലിനീകരണം കുറയ്ക്കാനും സഹായിക്കുന്നു.

ബ്രാന്‍ഡിന്റെ 1.0 ലിറ്റര്‍ K-സീരീസ് എഞ്ചിന്റെ അപ്ഡേറ്റ് ചെയ്ത പതിപ്പ് 2021 നവംബറില്‍ പുതിയ തലമുറ മാരുതി സെലേറിയോ പുറത്തിറക്കി. ഈ എഞ്ചിന്‍ ഹാച്ച്ബാക്കില്‍ 25.24 കിലോമീറ്റര്‍ വരെ ഇന്ധനക്ഷമത നല്‍കാന്‍ പ്രാപ്തമായിരുന്നു, ഇത് ഇന്ത്യന്‍ വിപണിയിലെ ഏറ്റവും കാര്യക്ഷമമായ പെട്രോള്‍ കാറായി മോഡലിനെ മാറ്റുകയും ചെയ്യുന്നു.

സിഎന്‍ജി വേരിയന്റിന്റെ സമാരംഭത്തോടെ, സെലെറിയോ ഇപ്പോള്‍ പ്രവര്‍ത്തിപ്പിക്കാന്‍ കൂടുതല്‍ ലാഭകരമാണെന്ന് കമ്പനി അവകാശപ്പെടുന്നു. പെട്രോളില്‍ പ്രവര്‍ത്തിക്കുമ്പോള്‍ എഞ്ചിന്‍ 65.26 bp കരുത്തും 89 Nm torque ഉം ഉത്പാദിപ്പിക്കുന്നു.

അതേസമയം സിഎന്‍ജിയില്‍ ഇത് 56.70 bhp കരുത്തും 82.1 Nm torque ഉം ആണ് പുറപ്പെടുവിക്കുന്നത്. ഇത് വാഗണ്‍-ആര്‍ സിഎന്‍ജി, എസ്-പ്രസ്സോ സിഎന്‍ജി എന്നിവയേക്കാള്‍ അല്‍പ്പം കൂടുതല്‍ ശക്തമാണെന്നും കമ്പനി അവകാശപ്പെടുന്നു. 5-സ്പീഡ് മാനുവല്‍ ഗിയര്‍ബോക്‌സാണ് ട്രാന്‍സ്മിഷന്‍ ചുമതലകള്‍ കൈകാര്യം ചെയ്യുന്നത്, സിഎന്‍ജി ടാങ്കിന് 60 ലിറ്റര്‍ ശേഷിയുണ്ട്.

എഞ്ചിന്‍ രണ്ട് പരസ്പരാശ്രിത ECU-കളും (ഇലക്ട്രോണിക് കണ്‍ട്രോള്‍ യൂണിറ്റുകള്‍) ഒരു ഇന്റലിജന്റ് ഇഞ്ചക്ഷന്‍ സിസ്റ്റവും ഉപയോഗിക്കുന്നു. ഒപ്റ്റിമല്‍ പെര്‍ഫോമന്‍സ്, മെച്ചപ്പെടുത്തിയ ഡ്രൈവബിലിറ്റി, മികച്ച കാര്യക്ഷമത എന്നിവ നല്‍കുന്നതിന് പ്രത്യേകം ട്യൂണ്‍ ചെയ്തിരിക്കുന്നുവെന്നും കമ്പനി പറയുന്നു.

പ്രകൃതി വാതകത്തില്‍ ഓടുമ്പോള്‍ 35.6 കിലോമീറ്റര്‍ ഇന്ധനക്ഷമത നല്‍കാന്‍ സെലേറിയോ സിഎന്‍ജിക്ക് കഴിയുമെന്ന് മാരുതി സുസുക്കി അവകാശപ്പെടുന്നു. ''ഓള്‍-ന്യൂ സെലേറിയോ എസ്-സിഎന്‍ജിയുടെ സമാരംഭം ഹരിത വാഹനങ്ങള്‍ വന്‍തോതില്‍ സ്വീകരിക്കുന്നതിനുള്ള തങ്ങളുടെ അഭിലാഷത്തിലേക്ക് ഒരു ചുവടുകൂടി അടുപ്പിക്കുന്നുവെന്നാണ് മാരുതി സുസുക്കി ഇന്ത്യ ലിമിറ്റഡ് സീനിയര്‍ എക്സിക്യൂട്ടീവ് ഡയറക്ടര്‍ (മാര്‍ക്കറ്റിംഗ് & സെയില്‍സ്) ശ്രീ. ശശാങ്ക് ശ്രീവാസ്തവ പറഞ്ഞത്.

മുന്‍ തലമുറ സെലേറിയോയിലെ എസ്-സിഎന്‍ജി വേരിയന്റ് മൊത്തം വില്‍പ്പനയുടെ 30 ശതമാനമാണ് സംഭാവന ചെയ്തത്. പുതിയ പതലമുറയിലേക്ക് വരുമ്പോള്‍ അത്, 3D ഓര്‍ഗാനിക് രൂപകല്പന, ഊര്‍ജ്ജസ്വലവും വിശാലവുമായ ക്യാബിന്‍, എസ്-സിഎന്‍ജി സാങ്കേതികവിദ്യ എന്നിവയുള്ള ഓള്‍-ന്യൂ സെലേറിയോ എസ്-സിഎന്‍ജി ഉപഭോക്താക്കള്‍ക്ക് താങ്ങാനാവുന്നതും സുരക്ഷിതവും ഉയര്‍ന്ന പ്രകടനവുമുള്ള മോഡലാണെന്നും അദ്ദേഹം അഭിപ്രായപ്പെട്ടു.

കഴിഞ്ഞ വര്‍ഷം അവസാനത്തോടെയാണ് പുതിയ സെലേറിയോ ഹാച്ച്ബാക്കിനെ നിര്‍മാതാക്കള്‍ ഇന്ത്യയില്‍ അവതരിപ്പിക്കുന്നത്. രണ്ട് മാസത്തിനുള്ളില്‍ 25,000 ബുക്കിംഗുകളാണ് വാഹനത്തിന് ഇതിനോടകം ലഭിച്ചിരിക്കുന്നതും.

ലോഞ്ച് ചെയ്യുമ്പോള്‍ 4.99 ലക്ഷം രൂപ മുതല്‍ 6.94 ലക്ഷം രൂപയായിരുന്നു ഇതിന്റെ എക്‌സ്‌ഷോറൂം വില. പെട്രോള്‍ എഞ്ചിന്‍ ഓപ്ഷന്‍ മാത്രമാണ് ഓഫര്‍ ചെയ്തിരുന്നത്. ഇതിന് പിന്നാലെയാണ് ഇപ്പോള്‍ മാരുതി സെലേറിയോ സിഎന്‍ജി വേരിയന്റിനെയും കമ്പനി വില്‍പ്പനയ്ക്ക് എത്തിച്ചിരിക്കുന്നത്.

സിഎന്‍ജി വേരിയന്റ് കൂടി എത്തുന്നതോടെ വാഹനത്തിന്റെ വില്‍പ്പന വര്‍ധിക്കുമെന്ന കണക്കുകൂട്ടലിലാണ് നിര്‍മാതാക്കള്‍. 2014-ല്‍ ലോഞ്ച് ചെയ്തതു മുതല്‍ കമ്പനിയുടെ ഏറ്റവുമധികം വിറ്റഴിക്കപ്പെടുന്ന മോഡലുകളില്‍ ഒന്നാണ് സെലെറിയോ.

ഇന്നുവരെ, കമ്പനി സെലേറിയോയുടെ 5.9 ലക്ഷം യൂണിറ്റുകള്‍ വിറ്റഴിച്ചു. 2021 മാരുതി സെലേറിയോ അതിന്റെ ഔട്ട്ഗോയിംഗ് എതിരാളിയെ അപേക്ഷിച്ച് പല കാര്യങ്ങളിലും മികച്ചതാണ്. പുതിയ കാലത്തെ സാങ്കേതികവിദ്യയും സൗകര്യ സവിശേഷതകളും ഉള്ള പുതുക്കിയ ഇന്റീരിയറുകള്‍ക്കൊപ്പം പുതുക്കിയ ബാഹ്യ ഡിസൈനുകളും ഇതിന് ലഭിക്കുന്നു.

26.88 km/l മൈലേജുള്ള രാജ്യത്തെ ഏറ്റവും ഇന്ധനക്ഷമതയുള്ള പെട്രോള്‍ കാറാണ് പുതിയ സെലേറിയോയെന്ന് മാരുതി സുസുക്കി അവകാശപ്പെടുന്നു. ആര്‍ട്ടിക് വൈറ്റ്, സില്‍ക്കി സില്‍വര്‍, ഗ്ലിസ്റ്റനിംഗ് ഗ്രേ, കഫീന്‍ ബ്രൗണ്‍ എന്നിവയ്ക്കൊപ്പം സോളിഡ് ഫയര്‍ റെഡ്, സ്പീഡി ബ്ലൂ എന്നീ 6 കളര്‍ ഓപ്ഷനുകളിലാണ് ഇത് അവതരിപ്പിച്ചിരിക്കുന്നത്.

2,435 mm വീല്‍ബേസാണ് വാഹനത്തിന് ലഭിക്കുന്നത്. മാത്രമല്ല 3,695 mm നീളവും 1,555 mm ഉയരവും 1,655 mm വീതിയുമാണ് അളവുകള്‍. പുതിയ റേഡിയേറ്റര്‍ ഗ്രില്ലും വ്യതിരിക്തമായ ഹെഡ്‌ലാമ്പുകളും പുതിയ ഫോഗ് ലാമ്പ് കേസിംഗും ഇതിലുണ്ട്. മുന്‍ ബമ്പറിന് ബ്ലാക്ക് ആക്സന്റുകള്‍ ലഭിക്കുമ്പോള്‍ ഹാച്ച്ബാക്കിന് ബോഡി കളര്‍ റിയര്‍ ബമ്പറും വളഞ്ഞ ടെയില്‍ഗേറ്റും ലഭിക്കുന്നു.

15 ഇഞ്ച് ബ്ലാക്ക് ഫിനിഷ്ഡ് അലോയ് വീലിലാണ് വശങ്ങളെ മനോഹരമാക്കുന്നത്. കൊത്തുപണികളുള്ള വീല്‍ ആര്‍ച്ചുകള്‍ സെലേറിയോയിലും ദൃശ്യമാണ്. പുറകിലേക്ക് നീങ്ങുമ്പോള്‍, കാറിന് ബോഡി-നിറമുള്ള പിന്‍ ബമ്പറും ഫ്‌ലൂയിഡ് ലുക്ക് ടെയില്‍ലൈറ്റുകളും വളഞ്ഞ ടെയില്‍ഗേറ്റും ലഭിക്കുന്നു.

ഇന്റീരിയറുകള്‍ അധിക ഹെഡ്, ലെഗ് റൂമും ലഗേജ് സ്‌പെയ്‌സും വാഗ്ദാനം ചെയ്യുന്നു. സെഗ്മെന്റിലെ നിരവധി സുരക്ഷാ സൗകര്യങ്ങളുള്ള യാത്രക്കാരുടെയും ഡ്രൈവര്‍മാരുടെയും സൗകര്യങ്ങള്‍ക്ക് പ്രത്യേക ശ്രദ്ധ നല്‍കിയിട്ടുണ്ടെന്നും മാരുതി അവകാശപ്പെടുന്നു.

ഉയര്‍ന്ന വേരിയന്റില്‍, ആപ്പിള്‍ കാര്‍പ്ലേ, ആന്‍ഡ്രോയിഡ് ഓട്ടോ എന്നിവയെ പിന്തുണയ്ക്കുന്ന 7 ഇഞ്ച് സ്മാര്‍ട്ട്പ്ലേ സ്റ്റുഡിയോ വഴിയാണ് ഇന്‍ഫോടെയ്ന്‍മെന്റ്. വാഹനത്തില്‍ എഞ്ചിന്‍ പുഷ് സ്റ്റാര്‍ട്ട്/സ്റ്റോപ്പ് ബട്ടണും സ്മാര്‍ട്ട് കീയും കമ്പനി വാഗ്ദാനം ചെയ്യുന്നു.

ഇലക്ട്രിക് അഡ്ജസ്റ്റ് ചെയ്യാവുന്നതും മടക്കാവുന്നതുമായ ORVM-കള്‍, ഇരട്ട സ്ലോട്ട് എസി വെന്റുകള്‍, പുതിയ ഗിയര്‍ ഷിഫ്റ്റ് ഡിസൈന്‍, അപ്ഹോള്‍സ്റ്ററി എന്നിവയ്ക്കൊപ്പമാണ് പുതിയ സെലേറിയോയും എത്തുന്നത്.

ഹില്‍ ഹോള്‍ഡ് അസിസ്റ്റ്, എബിഎസ്, ഇബിഡി എന്നിവയ്ക്കൊപ്പം ഡ്യുവല്‍ എയര്‍ബാഗുകളും സെഗ്മെന്റില്‍ ആദ്യത്തേതായ 12+ സുരക്ഷാ ഫീച്ചറുകളുമായാണ് ഇത് വരുന്നത്. ഫ്രണ്ടല്‍ ഓഫ്സെറ്റ്, സൈഡ് ക്രാഷ്, കാല്‍നട സംരക്ഷണം എന്നിവയുടെ ഇന്ത്യന്‍ സുരക്ഷാ ആവശ്യകതകളും വാഹനം പാലിക്കുന്നുണ്ടെന്നും നിര്‍മാതാക്കള്‍ അവകാശപ്പെടുന്നു.